Hebrifo 7:1-28
7 Na saa Melkisedek yi, Salem hene, Ɔsorosoroni Nyankopɔn sɔfo,+ a bere a Abraham kokum ahene no a ɔresan aba no, okohyiaa no hyiraa no+
2 na Abraham kyɛɛ nneɛma nyinaa mu maa no ntotoso du du+ no, nea edi kan no, ne din ase ne, “Trenee Hene,” na afei nso ɔyɛ Salem hene,+ a ɛkyerɛ, “Asomdwoe Hene.”
3 Esiane sɛ onni papa nni maame, na onni abusua santen nni nna mfiase+ anaa nkwa awiei, na mmom wɔayɛ no sɛ Onyankopɔn Ba+ no nti, ɔkɔ so di sɔfo daa.+
4 Enti monhwɛ sɛnea onipa yi a abusua ti Abraham maa no asade akɛse no so ntotoso du du+ no yɛ kɛse fa.
5 Nokwarem no, mmarima a wofi Lewi mma+ mu a wonya asɔfodwuma no wɔ ahyɛde bi sɛ wogye ntotoso du du+ fi ɔman no hɔ+ sɛnea Mmara no kyerɛ no, kyerɛ sɛ, wogye fi wɔn nuanom nkyɛn, ɛwom mpo sɛ wofi Abraham asen mu+ de;
6 nanso ɔbarima a omfi saa abusua no mu+ no gyee Abraham hɔ ntotoso du du,+ na ohyiraa nea wɔhyɛɛ no bɔ no.+
7 Nanso akyinnye biara nni ho sɛ nea ɔyɛ kɛse na ohyira nea ɔyɛ akumaa no.+
8 Na asɛm biako mu no, nnipa a wowu na wogye ntotoso du du,+ nanso nea ɛka ho no mu de, ɛyɛ obi a wodi ne ho adanse sɛ ɔte ase.+
9 Na sɛ mɛka a, ɛdenam Abraham so no, Lewi a ogye ntotoso du du no mpo maa ntotoso du du no bi,
10 efisɛ na ɔda so ara wɔ ne nanabarima asen mu+ bere a Melkisedek behyiaa no no.+
11 Enti afei sɛ Lewi asɔfodi so na pɛyɛ+ nam a,+ (efisɛ ɛno yɛ ade titiriw a wɔde kaa Mmara no ho maa ɔman no)+ anka ɛbɛyɛ dɛn na ɛho abehia bio+ sɛ ɔsɔfo foforo bɛsɔre wɔ Melkisedek kwan so+ na wɔanka sɛ Aaron kwan so de?
12 Na esiane sɛ wɔresesa asɔfodi+ no nti, ehia sɛ wɔsesa mmara+ no nso.
13 Na ɔbarima a wɔaka nsɛm yi afa ne ho no fi abusuakuw foforo+ a obiara mfii mu mmɛyɛɛ afɔremuka so adwuma+ da mu.
14 Na ɛda adi fann sɛ Yuda mu na yɛn Awurade fi puei,+ nanso Mose anka asɔfodi ho hwee amfa saa abusuakuw yi ho.
15 Na emu da hɔ koraa sɛ ɔsɔfo foforo+ a ɔne Melkisedek di nsɛ+ sɔre,
16 nea wamfa mmara mu ahyɛde bi a egyina ɔhonam+ so na ɔbɛyɛɛ saa, na mmom ɔnam nkwa a ɛnsɛe+ tumi so,
17 efisɛ wɔka de di adanse sɛ: “Woyɛ ɔsɔfo daa wɔ Melkisedek kwan so.”+
18 Enti nokwarem no wɔde mmara a edii anim no too nkyɛn esiane sɛ ɛyɛ mmerɛw+ na enni mũ+ nti.
19 Efisɛ Mmara no amma biribiara anwie pɛyɛ,+ na mmom anidaso+ a ɛkyɛn ɛno a ɛbae no na ɛyɛɛ saa, na ɛno so na yɛnam bɛn Onyankopɔn.+
20 Afei nso, bere dodow a wɔankwati ntanka anyɛ eyi no,
21 (asɛm no ne sɛ mmarima bi bɛyɛɛ asɔfo a ntanka amma mu, nanso obiako wɔ hɔ a wɔkaa ntam faa ne ho, na Onii a ɔkaa ntam no kaa ne ho asɛm sɛ: “Yehowa aka ntam+ (na ɔrennu ne ho) sɛ, ‘Woyɛ ɔsɔfo daa,’”)+
22 saa ara nso na Yesu abɛyɛ nea wɔde no adi agyinam ama apam a ɛkyɛn ɛno.+
23 Bio nso, ɛho behiae sɛ nnipa pii didi so bɛyɛ asɔfo+ esiane sɛ owu amma wɔantoa so+ saa daa nti,
24 nanso ɔno de, esiane sɛ ɔte ase daa+ nti, obiara nni n’ade sɛ ɔsɔfo.
25 Ne saa nti obetumi nso agye wɔn a wɔnam no so ba Onyankopɔn nkyɛn no koraa, efisɛ ɔte ase daa a ɔbɛsrɛ ama wɔn.+
26 Na ɔsɔfo panyin a ɔte saa no fata yɛn,+ odi nokware,+ bɔne nni no mu,+ efĩ nni ne ho,+ ɔmfra abɔnefo mu,+ na wɔama no so asen ɔsoro.+
27 Enhia sɛ da biara+ odi kan bɔ afɔre ma n’ankasa bɔne+ sɛnea saa asɔfo mpanyin no yɛe no, ansa na wabɔ bi ama ɔman no:+ (na eyi na ɔyɛɛ no prɛko+ bere a ɔde ne ho mae+ no;)
28 na Mmara no paw nnipa a wɔyɛ mmerɛw+ asɔfo mpanyin,+ nanso ntanka asɛm+ a ɛbae wɔ Mmara no akyi no paw Ɔba a wayɛ pɛ+ daa.
