Hesekiel 26:1-21
26 Afe a ɛto so dubiako, ɔsram no da a edi kan no, Yehowa ka kyerɛɛ me sɛ:
2 “Onipa ba, Tiro+ adi Yerusalem+ ho fɛw sɛ, ‘Ahaa, wɔabubu+ aman apon no.+ Afei wɔbɛdan aba me nkyɛn. Wɔasɛe no yi, mɛyɛ mã.’+ Eyi nti,
3 nea Awurade Tumfoɔ Yehowa aka ni, ‘Tiro, me ne wo anya asɛm, na mede aman pii bɛba wo so+ sɛnea po bɔ n’asorɔkye ba no.+
4 Na wɔbɛsɛe Tiro afasu+ adwiriw n’aban agu,+ na mɛwerɛwerɛw ne ho dɔte ma wayɛ ɔbotan kwaboo.
5 Ɔbɛdan beae a wɔhata asau+ wɔ po mfinimfini.’+
“Awurade Tumfoɔ Yehowa asɛm ni, ‘Me na maka, na amanaman bɛfa no sɛ asade.
6 Na nkuraa-nkuraa a atwa ho ahyia nyinaa bɛtotɔ nkrante ano, na nnipa behu sɛ mene Yehowa.’+
7 “Nea Awurade Tumfoɔ Yehowa aka ni, ‘Mɛma Babilon hene Nebukadresar, ahene mu hene no,+ afi atifi fam aba Tiro so.+ Na ɔde apɔnkɔ+ ne nteaseɛnam+ ne apɔnkɔsotefo ne asafodɔm+ kɛse na ɛbɛba.
8 Nkuraa-nkuraa a atwa wo ho ahyia nyinaa bɛtotɔ nkrante ano, na ɔbɛto akoban na wasi pempe+ atwa wo ho ahyia na ɔde kyɛm kɛse aba wo so;
9 na ɔde n’afiri bedwiriw w’afasu na ɔde n’akode abubu w’aban.
10 N’apɔnkɔ manyamanya no bɛma mfutuma akata wo so.+ Na apɔnkɔsotefo ne ntwahonan ne nteaseɛnam bɛma w’afasu awosow, bere a ɔfa w’apon mu ba wo so te sɛ kurow a abubu ma akwan abɛdeda mu no.
11 Ɔde n’apɔnkɔ nan betiatia wo mmorɔn so akwan nyinaa so.+ Na ɔde nkrante bekunkum wo nkurɔfo na w’ahoɔden adum ahwehwe fam.
12 Wɔbɛfa w’ahode+ na wɔafom w’aguade,+ na wobebubu w’afasu na wɔadwiriw w’adan fɛfɛ no agu. Na wɔde w’abo ne wo nnua ne wo dɔte begu nsu mu.’
13 “‘Mɛma wo dwonto gyegyeegye no agyae,+ na wɔrente w’asanku nne bio.+
14 Mɛma woayɛ ɔbotan kwaboo+ na woadan asau hatabea.+ Wɔrenkyekye wo bio; me Yehowa na maka,’ Awurade Tumfoɔ Yehowa asɛm ni.+
15 “Nea Awurade Tumfoɔ Yehowa aka akyerɛ Tiro ni, ‘Sɛ wɔte w’asehwe, na wɔn a wɔapirapira no penepene, na wokunkum wo mu nnipa a, nsuano aman renwosow+ anaa?
16 Ɛpo so abirɛmpɔn nyinaa befi wɔn agua so+ asisi fam,+ na wobeyiyi wɔn ntade nguguso ne wɔn nwentama agu hɔ. Na wobefura ahopopo na wɔatenatena fam.+ Wɔn ho bɛpopo bere biara+ na wɔatɛɛ wɔn anom ahwɛ wo.
17 Na wobetwa wo ho kwadwom+ aka akyerɛ wo sɛ:
“‘“O hwɛ sɛnea woahwe ase, kurow a po sofo bɛtenaa wo mu,+ kurow a wɔkamfo no, kurow dennen a ɛda po so,+ ɔno ne wɔn a wɔtete mu, wɔn a wɔmaa asase sofo nyinaa bɔɔ hu no!
18 Ɛda a wobɛhwe ase no, nsuano aman ho bɛpopo. W’awiei bɛma po mu nsupɔw awosow.”’+
19 “Nea Awurade Tumfoɔ Yehowa aka ni, ‘Sɛ mema wodan amamfõ te sɛ nkurow a obiara nte mu, na mema subun kata wo so na nsu pii yiri fa wo so a,+
20 mede wo bɛka wɔn a wɔrekɔ adamoa mu no ho akɔka tetefo ho,+ na mɛma woatena asase ase tɔnn,+ te sɛ tete amamfõ so, wo ne wɔn a wɔrekɔ adamoa mu no,+ na obiara rentena wo mu bio. Na mesiesie ateasefo asase so+ fɛfɛɛfɛ.
21 “‘Mɛma ehu atɔ wo so+ na worentena hɔ bio; nnipa bɛhwehwɛ wo,+ nanso wɔrenhu wo da,’+ Awurade Tumfoɔ Yehowa asɛm ni.”
