Hesekiel 3:1-27
3 Na ɔka kyerɛɛ me sɛ: “Onipa ba, di nea wuhu yi. Di nhoma mmobɔwee yi+ na kɔkasa kyerɛ Israel fie.”
2 Enti mibuee m’anom, na ɔma midii nhoma mmobɔwee no.+
3 Afei ɔka kyerɛɛ me sɛ: “Onipa ba, di gu wo yafunu mu, na ma nhoma mmobɔwee a mede rema wo yi nhyɛ wo nsono mã.” Enti midii, na ɛyɛɛ m’anom dɛdɛɛdɛ te sɛ ɛwo.+
4 Na ɔtoaa so ka kyerɛɛ me sɛ: “Onipa ba, kɔ Israel fie+ kɔka m’anom asɛm kyerɛ wɔn.
5 Ɛnyɛ ɔman a wɔka pɔtɔ kasa+ anaa ɔman a wɔn tɛkrɛma yɛ duru+ nkyɛn na meresoma wo, mmom Israel fie.
6 Dabi, ɛnyɛ aman pii a wɔka pɔtɔ kasa anaa wɔn a wɔn tɛkrɛma yɛ duru a wonte wɔn kasa.+ Sɛ saafo no nkyɛn na mesomaa wo a, anka wobetie wo.+
7 Nanso Israel fie de, wɔrentie wo, efisɛ wɔmpɛ sɛ wobetie me,+ na Israel fie nyinaa kɔn asen* na wɔn koma yɛ den.+
8 Hwɛ, mama w’anim ayɛ den te sɛ wɔn anim+ na wo moma so ayɛ den te sɛ wɔn moma so.+
9 Mama wo moma so ayɛ sɛ dɛnkyɛmmo, na ayɛ den sen twɛrebo.+ Nsuro wɔn+ na mmɔ hu wɔ wɔn anim,+ efisɛ wɔyɛ atuatew fie.”+
10 Na ɔtoaa so ka kyerɛɛ me sɛ: “Onipa ba, ma nsɛm a mɛka akyerɛ wo no nyinaa nna wo koma so,+ na fa w’aso tie.
11 Kɔ nkurɔfo a wɔafa wɔn nnommum no,+ wo manfo no nkyɛn, na sɛ wotie oo, wɔantie oo,+ ka kyerɛ wɔn sɛ, ‘Nea Awurade Tumfoɔ Yehowa aka ni.’”
12 Na honhom bi maa me so,+ na metee biribi te sɛ ahum kɛse+ bi wɔ m’akyi sɛ: “Nhyira mfi ne tenabea hɔ nka Yehowa anuonyam.”+
13 Na metee honhom abɔde no ntaban a ɛretwitwiw mu no nnyigyei,+ ne ntwahonan a ɛwɔ nkyɛn no nnyigyei,+ ne ahum kɛse bi nnyigyei.
14 Na honhom no maa me so kɔe,+ na mede abufuw na ɛkɔe, me honhom anibere mu; na Yehowa nsa yɛɛ den wɔ me so.+
15 Enti mekɔɔ nnommum a wɔtete+ Kebar asubɔnten+ ho no nkyɛn wɔ Tel-Abib, na mekɔtenaa wɔn mu. Midii nnanson wɔ hɔ, na me ho dwiriw me wɔ wɔn mu.+
16 Nnanson no awiei no, Yehowa ka kyerɛɛ me sɛ:
17 “Onipa ba, mayɛ wo ɔwɛmfo ama Israel fie,+ enti tie m’anom asɛm na bɔ wɔn kɔkɔ ma me.+
18 Sɛ meka kyerɛ ɔbɔnefo sɛ, ‘Owu na wubewu,’+ na woammɔ no kɔkɔ, na woankasa ankyerɛ ɔbɔnefo no ma wamfi ne kwammɔne so na wannya nkwa a,+ ɔno ɔbɔnefo no bewu n’amumɔyɛ mu,+ nanso ne mogya de, mebisa afi wo nsam.+
19 Na sɛ wobɔ ɔbɔnefo kɔkɔ+ na wamfi n’amumɔyɛ ho ne ne kwammɔne so a, obewu n’amumɔyɛ mu,+ na wo de, wubegye wo kra.+
20 Sɛ ɔtreneeni dan fi ne trenee ho+ kodi amumɔyɛsɛm na mede hintidua to n’anim a,+ obewu efisɛ woammɔ no kɔkɔ. Ne bɔne nti obewu,+ na wɔrenkae adetrenee a ɔyɛe no,+ nanso ne mogya de, mebisa afi wo nsam.+
21 Na sɛ wobɔ ɔtreneeni kɔkɔ sɛ ɛnsɛ sɛ ɔtreneeni yɛ bɔne,+ na sɛ wanyɛ bɔne a, obenya nkwa efisɛ woabɔ no kɔkɔ,+ na wo nso wubegye wo kra.”+
22 Afei Yehowa nsa baa me so wɔ hɔ, na ɔka kyerɛɛ me sɛ: “Sɔre kɔ asasetaw no so,+ na me ne wo bɛkasa wɔ hɔ.”
23 Enti mesɔre kɔɔ asasetaw no so, na mihuu Yehowa anuonyam sɛ egyina hɔ+ te sɛ anuonyam a mihui wɔ Kebar asubɔnten+ ho no, na mede m’anim butuw fam.+
24 Na honhom bi baa me mu,+ na ɛma migyinaa me nan so,+ na ɔne me kasae sɛ:
“Kɔhyɛ wo fie na tom.
25 Na wo, onipa ba, wɔde ntampehama bɛkyekyere wo, na worentumi mfi adi nkɔ wɔn nkyɛn.+
26 Na mɛma wo tɛkrɛma afam wo dodom+ na woatɔ mum,+ na worentumi nkasa nkyerɛ wɔn,+ efisɛ wɔyɛ atuatew+ fie.
27 Na sɛ me ne wo kasa a, mebue w’ano na woaka akyerɛ wɔn sɛ,+ ‘Nea Awurade Tumfoɔ Yehowa aka ni.’ Nea obetie ntie,+ na nea ɔrentie nnyae, efisɛ wɔyɛ atuatew fie.+
Ase Hɔ Nsɛm
^ Nea ɛkyerɛ ankasa ne “wɔn moma yɛ den.”
