Hesekiel 36:1-38
36 “Onipa ba, hyɛ Israel mmepɔw ho nkɔm na ka sɛ, ‘O Israel mmepɔw,+ muntie Yehowa asɛm.
2 Nea Awurade Tumfoɔ Yehowa aka ni: “Ɔtamfo no dii mo ho fɛw sɛ,+ ‘Ahaa! Tete nkoko+ no abɛyɛ yɛn dea!’”’+
3 “Eyi nti hyɛ nkɔm na ka sɛ, ‘Nea Awurade Tumfoɔ Yehowa aka ni: “Esiane sɛ wɔasɛe mo,+ na wɔabuma mo wɔ afã nyinaa,+ na aman a aka no afa mo sɛ wɔn agyapade,+ na daa moda wɔn tɛkrɛma so,+ na nnipa ka mo ho nsɛmmɔne+ nti,
4 O Israel mmepɔw,+ muntie Awurade Tumfoɔ Yehowa asɛm! Nea Awurade Tumfoɔ Yehowa aka akyerɛ mmepɔw ne nkoko ne nsuten ne abon ne mmeae a asɛe adan amamfõ+ ne nkurow a ɛda mpan a ayɛ afowde a aman a atwa ahyia di ho fɛw no ni;+
5 enti nea Awurade Tumfoɔ Yehowa aka ni, ‘M’anibere gya mu na mɛkasa+ atia aman a aka ne Edom nyinaa,+ aman a mmoa adidibea ne afowde nti, wɔde komam ahurusidi+ ne ɔkra mu animtiaabu+ afa m’asase no.’”’+
6 “Enti hyɛ Israel asase ho nkɔm na ka kyerɛ mmepɔw ne nkoko, nsubɔnten ne abon sɛ, ‘Nea Awurade Tumfoɔ Yehowa aka ni: “Hwɛ, m’anibere ne m’abufuw mu na mɛkasa, efisɛ amanaman no agu mo anim ase.”’+
7 “Enti nea Awurade Tumfoɔ Yehowa aka ni, ‘Mama me nsa so aka ntam+ sɛ aman a atwa mo ho ahyia no ankasa bɛsoa wɔn animguase.+
8 Mo Israel mmepɔw de, mubeyiyi mmãã na moasow aba ama me man Israel+ efisɛ wɔn ba abɛn.+
9 Hwɛ, migyina mo akyi, na mɛdan m’ani akyerɛ mo,+ na wɔbɛdɔw mo adua mo so aba.+
10 Mɛma moanya nnipa pii, Israel fie mũ no nyinaa,+ na nnipa bɛtenatena nkurow no mu,+ na wɔbɛsan akyekyere mmeae a adan amamfõ no.+
11 Yiw, mɛma moanya nnipa ne mmoa+ pii na wɔadɔ ayɛ bebree, na mɛma nnipa abɛtena mo mu te sɛ kan no,+ na me ne mo bedi no yiye asen kan no.+ Na mubehu sɛ mene Yehowa.+
12 Mɛma nnipa anantew mo so, me man Israel mpo, na wɔbɛfa mo+ ayɛ wɔn agyapade.+ Na morenkunkum+ wɔn mma bio.’”
13 “Nea Awurade Tumfoɔ Yehowa aka ni, ‘Esiane sɛ eyinom ka kyerɛ mo sɛ: “Wo de, womemene nnipa na wukunkum wo man mu mmofra”+ nti,’
14 ‘worenwe nnipa+ bio na worenkunkum wo man mu mmofra bio,’+ Awurade Tumfoɔ Yehowa asɛm ni.
15 ‘Na meremma amanaman no nkeka nsɛm ngu w’anim ase bio,+ na aman remmɔ wo ahohora bio,+ na worento wo man hintidua bio.’ Awurade Tumfoɔ Yehowa asɛm ni.”
16 Na Yehowa ka kyerɛɛ me bio sɛ:
17 “Onipa ba, bere a Israel fie te wɔn asase so no, wɔde wɔn akwan ne wɔn nneyɛe guu asase no ho fĩ.+ Wɔn akwan te sɛ brayɛ mu fĩ pɔtɔɔ wɔ m’ani so.+
18 Mogya a wohwie guu asase no so ne abosom fĩ a wɔde guu asase no ho fĩ nti,+ mihwiee m’abufuw guu wɔn so.+
19 Mebɔɔ wɔn hwetee aman so, na wɔpansam nsase so.+ Na mibuu wɔn atɛn sɛnea wɔn akwan ne wɔn nneyɛe te.+
20 Na bere a wɔkɔɔ aman no so no, nkurɔfo bɔɔ me din kronkron no ahohora+ kae sɛ, ‘Yehowa nkurɔfo ni, nanso wɔafi n’asase so kɔ.’+
21 Na mɛte nka ama me din kronkron a Israel fie guu ho fĩ bere a wɔkɔɔ amanaman so no.”+
22 “Enti ka kyerɛ Israel fie sɛ, ‘Nea Awurade Tumfoɔ Yehowa aka ni: “O Israel fie, ɛnyɛ mo nti na mereyɛ eyi, na mmom me din kronkron a muguu ho fĩ bere a mokɔɔ amanaman no so ntia.”’+
23 Awurade Tumfoɔ Yehowa asɛm ni, ‘Mɛtew me din kɛse+ a woguu ho fĩ wɔ amanaman mu, edin a muguu ho fĩ wɔ wɔn mfinimfini no ho, na sɛ amanaman no hu sɛ matew me din ho wɔ mo mu a,+ wobehu sɛ mene Yehowa.+
24 Na meyi mo afi aman so na maboaboa mo ano afi nsase nyinaa so de mo aba mo asase so.+
25 Na mede nsu kurennyenn bɛpete mo so ama mo ho atew.+ Mɛtew mo ho afi mo fĩ+ ne mo abosom fĩ nyinaa ho.+
26 Mɛma mo koma foforo+ na mede honhom foforo ahyɛ mo mu,+ na meyi ɔbo koma afi mo honam mu na mama mo koma a ɛyɛ mmerɛw.+
27 Mede me honhom bɛhyɛ mo mu,+ na mɛma moanantew m’ahyɛde mu+ na moadi m’atemmusɛm so.+
28 Na mobɛtena asase a mede maa mo agyanom no so,+ na mobɛyɛ me man na me nso mayɛ mo Nyankopɔn.’+
29 “‘Meyi mo afi mo fĩ+ nyinaa mu na mama aburow abu so, na meremma munhu ɔkɔm bio.+
30 Mɛma nnua so aba ne afuw mu nnɔbae abu so, na ɔkɔm nti mo anim angu ase bio wɔ amanaman no mu.+
31 Afei mobɛkae mo akwammɔne ne mo nneyɛe a ɛnteɛ nyinaa.+ Na mo bɔne ne mo akyide nti, mo ankasa mo ho bɛyɛ mo abofono.+
32 Munhu sɛ ɛnyɛ mo nti na mereyɛ eyi.+ O Israel fie, momma mo ani nwu na mo anim ngu ase, mo akwan nti,’+ Awurade Tumfoɔ Yehowa asɛm ni.
33 “Nea Awurade Tumfoɔ Yehowa aka ni, ‘Ɛda a mɛtew mo ho afi mo bɔne nyinaa ho no, mɛma nnipa abɛtenatena nkurow no mu,+ na wɔbɛsan akyekyere mmeae a adan amamfõ no.+
34 Na asase a asɛe a obiara a ɔretwam ani tua sɛ asɛe pasaa no, wɔbɛsan adɔw.+
35 Na nkurɔfo bɛka sɛ: “Asase a na asɛe pasaa no abɛyɛ sɛ Eden turo,+ na nkurow a asɛe adan amamfõ a edwiriw gui no, wɔato ho ɔfasu, na nnipa abɛtena mu.”+
36 Na aman a ɛbɛka wɔ mo ho nyinaa no behu sɛ me Yehowa na mato nea wodwiriw gui no,+ na miduaa asase a asɛe no so nneɛma. Me Yehowa na maka na mayɛ nso.’+
37 “Nea Awurade Tumfoɔ Yehowa aka ni, ‘Nea mɛma Israel fie abisa afi me hɔ bio na mayɛ ama wɔn ni:+ Mɛma wɔn ho nnipa adɔɔso sɛ nguankuw.+
38 Wɔbɛyɛ sɛ akronkronfo dɔm, te sɛ Yerusalem nguankuw wɔ afahyɛ bere mu.+ Enti nnipadɔm bɛhyɛ nkurow a asɛe no mu mã.+ Na nnipa behu sɛ mene Yehowa.’”
