Hesekiel 37:1-28
37 Na Yehowa nsa baa me so,+ na Yehowa nam ne honhom+ so de me kogyinaa obon kɛse no mfinimfini, na na nnompe ayɛ mu mã.+
2 Na ɔde me faa ho nyinaa hyiae, na hwɛ, ayɛ obon no mu bebree, na na ɛho awo wosee.+
3 Na obisaa me sɛ: “Onipa ba, so nnompe yi betumi anya nkwa?” Ɛnna mekae sɛ: “Awurade Tumfoɔ Yehowa, wo na wunim.”+
4 Afei ɔka kyerɛɛ me sɛ: “Hyɛ nnompe yi ho nkɔm na ka sɛ, ‘O nnompe a awo wosee, muntie Yehowa asɛm:
5 “‘Nea Awurade Tumfoɔ Yehowa aka akyerɛ nnompe yi ni: “Mede ahome bɛhyɛ mo mu na moanya nkwa.+
6 Afei mede ntini ne ɛnam betuatua mo ho na mede were adura mo ho, na mede ahome bɛhyɛ mo mu na moanya nkwa;+ na mubehu sɛ mene Yehowa.”’”+
7 Enti mehyɛɛ nkɔm sɛnea ɔkae no.+ Na bere a mehyɛɛ nkɔm no, metee nnyigyei bi, na nnompe no de kikirikikiri twiw bɛnee, na dompe besii dompe anim.
8 Na mihui sɛ ntini ne nam abetuatua ho, na were beduraa ho. Nanso na ahome biara nnim.
9 Na ɔtoaa so ka kyerɛɛ me sɛ: “Hyɛ nkɔm kyerɛ mframa. Onipa ba, hyɛ nkɔm na ka kyerɛ mframa sɛ, ‘Nea Awurade Tumfoɔ Yehowa aka ni: “O mframa, fi mframa anan no mu bɛbɔ fa nnipa a wɔakunkum wɔn+ yi so na wonnya nkwa.”’”+
10 Na mehyɛɛ nkɔm sɛnea ɔka kyerɛɛ me no, na ahome bɛhyɛɛ wɔn mu, na wonyaa nkwa, na wɔsɔre gyinagyinaa wɔn anan so,+ asraafodɔm kɛse paa.
11 Na ɔsan ka kyerɛɛ me sɛ: “Onipa ba, nnompe yi gyina hɔ ma Israel fie nyinaa.+ Wɔka sɛ, ‘Yɛn nnompe ho awo wosee, na yɛn anidaso ayera.+ Wɔato yɛn asaworam.’
12 Enti hyɛ nkɔm na ka kyerɛ wɔn sɛ, ‘Nea Awurade Tumfoɔ Yehowa aka ni: “Me man, hwɛ, merebuebue mo adamoa ano,+ na meyi mo afi mo adamoa mu de mo akɔ Israel asase so.+
13 O me man, sɛ mibue mo adamoa ano yi mo fi mo adamoa mu a, mubehu sɛ mene Yehowa.”’+
14 ‘Na mede me honhom bɛhyɛ mo mu na moanya nkwa,+ na mede mo bɛtena mo asase so. Afei mubehu sɛ me Yehowa na maka na mayɛ nso,’ Yehowa asɛm ni.”+
15 Na Yehowa ka kyerɛɛ me bio sɛ:
16 “Onipa ba, hwehwɛ dua+ bi na kyerɛw so sɛ, ‘Yuda ne Israelfo a wɔka ne ho no dea.’+ Fa dua foforo nso na kyerɛw so sɛ, ‘Yosef dea, Efraim dua,+ ne Israel fie a wɔka ne ho no nyinaa.’+
17 Na ka abien no bom yɛ no dua biako, na ampa ara ɛbɛyɛ biako wɔ wo nsam.+
18 Na sɛ wo man mufo bisa wo sɛ, ‘So worenkyerɛ yɛn nea eyi kyerɛ ma wo?’+ a,
19 ka kyerɛ wɔn sɛ, ‘Nea Awurade Tumfoɔ Yehowa aka ni: “Hwɛ, mede Yosef dua a ɛwɔ Efraim nsam ne Israelfo a wɔka ne ho no bɛka Yuda dua ho, na mɛma ayɛ dua biako,+ na wɔbɛyɛ biako wɔ me nsam.”’
20 Ma nnua a wobɛkyerɛw so no nkɔ so nhyɛ wo nsam wɔ wɔn anim.+
21 “Na ka kyerɛ wɔn sɛ, ‘Nea Awurade Tumfoɔ Yehowa aka ni: “Hwɛ, meyi Israelfo afi aman a wɔkɔɔ so no so na maboaboa wɔn ano afi mmaa nyinaa de wɔn aba wɔn asase so.+
22 Na mɛyɛ wɔn ɔman biako wɔ asase no so,+ Israel mmepɔw so, na ɔhene biako adi wɔn nyinaa so,+ na wɔrenkɔ so nyɛ aman abien bio, na wɔn mu rempaapae nyɛ ahenni abien bio.+
23 Afei wɔremfa wɔn abosom fĩ ne wɔn abofonode ne wɔn mmaratode ngu wɔn ho fĩ bio.+ Na megye wɔn afi bɔne a wɔyɛe wɔ wɔn atenae nyinaa no mu na matew wɔn ho.+ Afei wɔbɛyɛ me man na me nso mayɛ wɔn Nyankopɔn.+
24 “‘“Na m’akoa Dawid bedi wɔn so hene+ na oguanhwɛfo biako ahwɛ wɔn nyinaa;+ na wɔbɛnantew m’atemmusɛm mu+ na wɔakora m’ahyɛde so,+ na wɔadi so.+
25 Na wɔbɛtena asase a mede maa m’akoa Yakob a mo agyanom tenaa so+ no so; wɔne wɔn mma ne wɔn mma mma bɛtena so daa,+ na m’akoa Dawid bɛyɛ wɔn obirɛmpɔn daa.+
26 “‘“Na me ne wɔn bɛyɛ asomdwoe apam,+ apam a ɛbɛtena hɔ daa.+ Na mede wɔn bedua wɔn asase so ama wɔadɔ ayɛ bebree.+ Na mede me kronkronbea besi wɔn mfinimfini daa.+
27 Mede me ntamadan besi wɔn so+ na mayɛ wɔn Nyankopɔn na wɔn nso ayɛ me man.+
28 Na sɛ mede me kronkronbea si wɔn mfinimfini daa a, amanaman no behu sɛ me Yehowa+ na matew Israel ho.”’”+
