Hesekiel 38:1-23
38 Yehowa san ka kyerɛɛ me sɛ:
2 “Onipa ba,+ fa w’ani si Gog a ofi Magog+ asase so no so, Mesek+ ne Tubal+ obirɛmpɔn kunini no, na hyɛ ne ho nkɔm.
3 Na ka kyerɛ no sɛ, ‘Nea Awurade Tumfoɔ Yehowa aka ni: “Hwɛ, Mesek ne Tubal obirɛmpɔn kunini Gog, me ne wo wɔ asɛm.
4 Mɛdan w’adwene na mede akɔtɔkoro ahyehyɛ w’afono mu+ de atwe wo ne w’asraafodɔm,+ apɔnkɔ ne ɛsotefo a wɔhyehyɛ ntade fɛfɛ,+ asafodɔm a wokurakura akyɛm akɛse ne nketewa, wɔn a wokurakura nkrante nyinaa;+
5 ne Persia,+ Etiopia+ ne Put+ a wɔn mu biara wɔ kyɛm ne dade kyɛw;
6 Gomer+ ne n’asraafokuw nyinaa, Togarma+ fie a ɛwɔ atifi fam akyirikyiri ne n’asraafokuw nyinaa, ne aman pii a wɔka wo ho.+
7 “‘“Siesie wo ho na yɛ krado, wo ne w’asafo nyinaa,+ wɔn a wɔaboaboa wɔn ano wɔ wo nkyɛn nyinaa, na yɛ wɔn hwɛfo.
8 “‘“Nna pii akyi no mɛba abɛhwɛ wo. Na mfe a edi akyiri no, wobɛba wɔn a wɔagye wɔn afi nkrante ano no asase so,+ nnipa a wɔboaboaa wɔn ano fii aman pii so+ baa Israel mmepɔw so, beae a ɛbɛyɛɛ daa amamfõ no. Asase yi sofo na woyii wɔn fii aman so bae, na wɔn nyinaa te hɔ dwoodwoo.+
9 Na wubefi adi aba; wobɛba sɛ ahum,+ te sɛ omununkum abɛkata asase no so,+ wo ne w’asraafokuw nyinaa ne aman pii a wɔka wo ho.”’
10 “Nea Awurade Tumfoɔ Yehowa aka ni, ‘Saa da no, biribi bɛba wo komam+ na woadwen adwemmɔne.+
11 Na wobɛka sɛ: “Mɛkɔ asase a ɛho da hɔ no so.+ Mɛba wɔn a biribiara nhaw wɔn a wɔte hɔ dwoodwoo no so. Eyinom nyinaa tete hɔ a wonni ɔfasu,+ na adaban ne apon mpo wonni bi.”
12 Na w’adwene ne sɛ wubenya asade+ ne afowde pii, na woadan wo nsa aba amamfõ a afei nnipa tete so no so,+ ne nnipa a wɔaboa wɔn ano afi amanaman mu+ a wɔanya ahode ne agyapade pii no so,+ nnipa a wɔte asase mfinimfini no.+
13 “‘Na Saba+ ne Dedan+ ne Tarsis+ aguadifo ne n’agyata+ nyinaa bebisa wo sɛ: “Asade pii a wubenya nti na wobae? Afowde bebree a wubenya nti na woaboaboa w’asafo ano, sɛnea ɛbɛyɛ a wobɛsoa dwetɛ ne sika kɔkɔɔ na woafa ahode ne agyapade ne asade pii akɔ?”’
14 “Enti onipa ba, hyɛ nkɔm na ka kyerɛ Gog sɛ, ‘Nea Awurade Tumfoɔ Yehowa aka ni: “Da a me man Israel bɛtena ase dwoodwoo no, so worenhu anaa?+
15 Wubefi wo tenabea wɔ atifi+ fam akyirikyiri aba, wo ne aman pii a wɔn nyinaa tete apɔnkɔ so, asafodɔm kɛse, asraafodɔm bebree.+
16 Wobɛba me man Israel so te sɛ omununkum abɛkata asase no so.+ Nna a edi akyiri no mu na mede wo bɛba m’asase so,+ na sɛ menam wo so tew me din ho wɔ amanaman no anim a, wɔahu me, O Gog.”’+
17 “Nea Awurade Tumfoɔ Yehowa aka ni, ‘So wo+ na menam me nkoa adiyifo a wɔwɔ Israel so kaa wo ho asɛm tete no—adiyifo a wɔhyɛɛ nkɔm afe biara sɛ mede wo bɛba wɔn so no?’+
18 “Awurade Tumfoɔ Yehowa asɛm ni, ‘Ɛda a Gog bɛba Israel asase so no, m’abufuw bɛdɛw wɔ me hwenem.+
19 M’abufuhyew+ mu, m’anibere gya mu na mɛkasa.+ Na saa da no Israel asase bɛwosow kitikiti.+
20 Me nti, po mu mpataa ne wim nnomaa ne wuram mmoa ne mmoa a wɔwea fam nyinaa ne asase so nnipa nyinaa ho bɛpopo,+ na mmepɔw bedwiriw agu+ na abotan akɛse abubu na afasu nyinaa adwiriw agu fam.’
21 “‘Na mɛma nkrante aba no so wɔ me mmepɔw nyinaa so,’ Awurade Tumfoɔ Yehowa asɛm ni.+ ‘Na obiara bɛtwe nkrante wɔ ne nua so.+
22 Na mede owuyare+ ne mogya+ ne no bedi;+ na mɛma osu kɛse ne amparuwbo+ ne ogya+ ne sufre atɔ agu ɔne n’asraafokuw ne aman bebree a wɔka ne ho no so.+
23 Na mɛhyɛ me ho anuonyam na matew me din ho,+ na mɛda me ho adi wɔ aman pii anim ma wɔahu sɛ mene Yehowa.’+
