Hesekiel 39:1-29
39 “Onipa ba, hyɛ Gog+ ho nkɔm na ka sɛ, ‘Nea Awurade Tumfoɔ Yehowa aka ni: “O Gog, Mesek+ ne Tubal+ obirɛmpɔn kunini, me ne wo anya asɛm.
2 Mɛdan w’adwene na makã wo,+ na matwe wo afi atifi+ fam akyirikyiri aba Israel mmepɔw so.
3 Na mɛbɔ w’agyan afi wo nsa benkum mu akyene, na mɛma wo mmɛmma afi wo nsa nifa mu agu fam.
4 Wo ne w’asraafo ne aman a wɔka wo ho nyinaa bɛtotɔ Israel mmepɔw so.+ Na mede wo bɛma nnomaa, nnomaa a wɔn ntakra gu ahorow nyinaa, ne wuram mmoa sɛ aduan.”’+
5 “‘Wobɛtɔ sare so;+ me na maka,’ Awurade Tumfoɔ Yehowa asɛm ni.
6 “‘Mede ogya bɛba Magog+ ne wɔn a wɔte supɔw so dwoodwoo no so,+ na nnipa behu sɛ mene Yehowa.
7 Na mɛma wɔahu me din kronkron no wɔ me man Israel mu, na meremma wongu me din kronkron no ho fĩ+ bio, na amanaman no behu sɛ mene Yehowa,+ Ɔkronkronni a ɔwɔ Israel no.’+
8 “‘Hwɛ, ɛbɛba na ɛbɛyɛ hɔ,’+ Awurade Tumfoɔ Yehowa asɛm ni. ‘Eyi ne da a mekaa ho asɛm no.+
9 Na wɔn a wɔtete Israel nkurow mu befi adi de ogya ato akode ne akyɛm nketewa ne akɛse mu—agyan ne mmɛmma ne mporibaa ne mpeaw; na wɔde bɛsɔ gya+ mfe ason.
10 Wɔrenkɔhwehwɛ mmobaa wɔ wuram, na wɔrenkɔ anyina wɔ kwae mu; wɔde akode na ɛbɛsɔ gya.’
“‘Wɔn a wɔfaa wɔn sɛ asade no, wɔn nso bɛfa wɔn sɛ asade,+ na wɔn a wɔfow wɔn no, wɔn nso bɛfow wɔn,’ Awurade Tumfoɔ Yehowa asɛm ni.
11 “‘Na da no, mɛma Gog+ amusiei wɔ Israel, obon a nnipa fa mu a ɛwɔ po no apuei fam no, na ebesiw wɔn a wɔfa hɔ no kwan. Na wobesie Gog ne ne dɔm nyinaa wɔ hɔ, na wɔbɛfrɛ hɔ Gog Dɔm Bon.*+
12 Israel fie besie wɔn de atew asase no so asram ason.+
13 Na asase no sofo nyinaa besie nnipa no, na wɔde begye din, da a mɛhyɛ me ho anuonyam no,’+ Awurade Tumfoɔ Yehowa asɛm ni.
14 “‘Na wobeyi nnipa ma wɔakyin afa asase no so, na wɔne wɔn a wɔfa hɔ no besie wɔn a wɔaka asase no so no de atew so. Na wobekyin ahwehwɛ akosi asram ason no awiei.
15 Na wɔn a wɔnenam hɔ no bekyin afa asase no so, na sɛ obi hu onipa dompe a, ɔbɛhyɛ no agyirae kosi sɛ wɔn a wosie nnipa no bɛba abesie wɔ Gog Dɔm Bon+ no mu.
16 Wɔbɛfrɛ kurow no Hamona. Na wɔbɛtew asase no so.’+
17 “Onipa ba, nea Awurade Tumfoɔ Yehowa aka ni, ‘Ka kyerɛ nnomaa a wɔn ntakra gu ahorow ne wuram mmoa nyinaa+ sɛ: “Mommoaboa mo ho ano mmra. Mummehyiam wɔ afɔre kɛse a merebɔ ama mo wɔ Israel mmepɔw so no ase.+ Na mobɛwe nam anom mogya.+
18 Mobɛwe atumfoɔ nam+ anom asase so abirɛmpɔn mogya. Wɔyɛ adwennini+ ne nguan ne mpapo ne anantwinini;+ wɔn nyinaa yɛ Basan mmoa a wɔadɔ.+
19 Na mubedi srade amee+ na moanom mogya abow wɔ afɔre a mɛbɔ ama mo no ase.”’
20 “‘Mede apɔnkɔ ne wɔn a wɔtete nteaseɛnam mu ne atumfoɔ ne akofofo nyinaa bɛtow mo pon ma moamee,’ Awurade Tumfoɔ Yehowa asɛm ni.+
21 “‘Mɛda m’anuonyam adi wɔ amanaman no mu, na aman nyinaa behu m’atemmu+ ne me nsa a mede aba wɔn so no.+
22 Na efi saa da no rekɔ no, Israel fie behu sɛ mene Yehowa wɔn Nyankopɔn.+
23 Na amanaman no behu sɛ Israel fie bɔne nti na wɔkɔɔ nkoasom mu,+ na esiane sɛ wɔanni me nokware nti na mede m’anim hintaw wɔn,+ na mede wɔn hyɛɛ wɔn atamfo nsa, na wɔn nyinaa totɔɔ nkrante ano+ no.
24 Wɔn afide ne wɔn mmarato so na me ne wɔn dii,+ na mede m’anim hintaw wɔn.’
25 “Enti nea Awurade Tumfoɔ Yehowa aka ni, ‘Afei de, mede Yakob nnommum bɛba+ na mahu Israel fie nyinaa mmɔbɔ,+ na mede anibere bɛbɔ me din kronkron no ho ban.+
26 Ebedu bere a wɔbɛtena wɔn asase so dwoodwoo+ a obiara nyi wɔn hu+ no, na wɔasoa wɔn animguase+ ne nkontompo a wotwaa me+ no nyinaa dedaw.
27 Sɛ miyi wɔn fi amanaman mu ba, na meboaboa wɔn ano fi wɔn atamfo nsase so+ a, mɛtew me din ho wɔ wɔn mu, aman pii anim.’+
28 “‘Sɛ mede wɔn kɔ nkoasom mu wɔ amanaman mu na mesan kɔfa wɔn ba wɔn asase so+ na mannyaw obiara wɔ hɔ bio+ a, wobehu sɛ mene Yehowa wɔn Nyankopɔn.
29 Afei meremfa m’anim nhintaw wɔn bio,+ efisɛ mehwie me honhom agu Israel fie so,’+ Awurade Tumfoɔ Yehowa asɛm ni.”
Ase Hɔ Nsɛm
^ Anaasɛ, “Hamon-Gog Bon.”
