Kwadwom 3:1-66
א [ʼAʹleph]
3 Mene ɔbarima a n’abufuw abaa no nti mahu amane.+
2 Me na wadi m’anim ama manantew esum mu, na ɛnyɛ hann mu.+
3 Ampa, me na daa ɔdan ne nsa tia me da mu nyinaa.+
ב [Behth]
4 Wama me honam ne me were atwintwam.+ Wabubu me nnompe.+
5 Wagye me ho ban+ de awɔnwene+ ne amanehunu atwa me ho ahyia.
6 Ɔde me atena sum+ mu sɛ nnipa a wɔawuwu dedaadaw.+
ג [Giʹmel]
7 Wagye me ho ban sɛ abo fasu, na mantumi amfi adi.+ Me kɔbere nkɔnsɔnkɔnsɔn+ no, wama emu ayɛ duru.
8 Sɛ meteɛm na misu hwehwɛ ɔboafo nso a, osiw me mpaebɔ kwan.+
9 Ɔde abo a wɔatwa asisiw m’akwan.+ Wakyeakyea m’atempɔn.+
ד [Daʹleth]
10 Wayɛ sɛ osisi a ɔtɛw me;+ wayɛ sɛ gyata a wahintaw.+
11 Wama m’akwan ayɛ basabasa, na wama mayɛ sɛ asase a ada mpan. Wama mayɛ amamfõ.+
12 Watia ne tadua+ so, na ɔde agyan no akyerɛ me so.+
ה [Heʼ]
13 Wama ne kotoku mu agyan ahyɛn m’asaabo mu.+
14 Mayɛ asereserede+ ama aman a wɔtan me nyinaa; wɔde me to dwom daa nyinaa.+
15 Wama ade nwenenwene amee me.+ Wama awɔnwene+ atumi me.
ו [Waw]
16 Ɔde mmosea abubu me sẽ.+ Wabrɛ me ase nsõ+ mu.
17 Woatow me akyene ama asomdwoe nni hɔ mma me kra. Me werɛ afi sɛnea ahotɔ te.+
18 Daa meka sɛ: “M’anuonyam ne m’anidaso ayera wɔ Yehowa hɔ.”+
ז [Zaʹyin]
19 Kae m’amanehunu ne sɛnea mayɛ adedamfikyiri,+ bɔre ne awɔnwene+ no.
20 Wo kra bɛkae na woakotow ama me.+
21 Eyi na mɛsan de ahyɛ me komam.+ Ɛno nti na mede ntoboase bɛtwɛn.+
ח [Chehth]
22 Yehowa adɔe+ nti na yɛn ase nhyewee,+ efisɛ ne mmɔborɔhunu to rentwa da.+
23 Ɛyɛ foforo anɔpa biara.+ Wo nokwaredi dɔɔso.+
24 Me kra aka sɛ: “Yehowa ne me kyɛfa,+ ɛno nti na mede ntoboase bɛtwɛn no no.”+
ט [Tehth]
25 Yehowa ye ma nea ɔde no ayɛ n’anidaso,+ ɔkra a ɔhwehwɛ no daa no.+
26 Eye sɛ onipa bɛyɛ komm+ atwɛn+ Yehowa nkwagye.+
27 Eye sɛ ɔbarima bɛsoa kɔndua ne mmeranteberem.+
י [Yohdh]
28 Ma ne nko ntena hɔ komm,+ efisɛ ɔde biribi ato no so.+
29 Ma ɔmfa n’ano mmutuw dɔte mu.+ Ebia anidaso bi wɔ hɔ.+
30 Ma ɔnnan n’asom mma nea ɔbɔ no.+ Ma ahohora mmee no.+
כ [Kaph]
31 Yehowa rentow yɛn nkyene daa.+
32 Wama yɛadi awerɛhow,+ nanso obehu yɛn mmɔbɔ sɛnea n’adɔe bebrebe no te.+
33 Enni ne komam sɛ ɔbɛma nnipa mma ahu amane anaa ɔbɛhyɛ wɔn awerɛhow.+
ל [Laʹmedh]
34 Sɛ obi pɛtɛw asase so nneduafo+ nyinaa ne nan ase,+
35 Sɛ obi dan ɔbarima atemmu ani, Ɔsorosoroni no anim,+
36 Sɛ obi bu obi atɛnkyea n’asɛm mu a, Yehowa ani nnye ho.+
מ [Mem]
37 Afei, hena na waka sɛ biribi mmra mu bere a Yehowa nhyɛe?+
38 Nneɛma bɔne ne nneɛma pa remfi Ɔsorosoroni no anom.+
39 Ɛbɛyɛ dɛn na onipa a ɔte ase, ɔbarima, anwiinwii,+ ne bɔne nti?+
נ [Nun]
40 Momma yɛnhwehwɛ yɛn akwan mu mpɛɛpɛɛ+ mu, na yɛnsan nkɔ Yehowa nkyɛn.+
41 Momma yɛmma yɛn koma ne yɛn nsa so nkyerɛ Onyankopɔn wɔ soro+ sɛ:
42 “Yɛn de, yɛayɛ bɔne, na yɛatew atua.+ Wo nso, woamfa amfiri.+
ס [Saʹmekh]
43 Wode abufuw asiw kwan,+ na wutiw yɛn.+ Woakum; woanhu mmɔbɔ.+
44 Wode omununkum asiw wo nkyɛn ba kwan,+ na mpaebɔ amfa mu amma.+
45 Woama yɛayɛ nwura dodow ne sumina, amanaman mu.”+
פ [Peʼ]
46 Yɛn atamfo nyinaa atu wɔn ano agu yɛn so.+
47 Akomatu ne amoa, ɔsɛe ne obubu+ na ato yɛn.+
48 Nsu sen fa m’aniwa mu waawaa, me man babea a wabubu nti.+
ע [ʽAʹyin]
49 M’aniwa tew nusu waawaa; ɛrennyae, ɛrenyɛ dinn,+
50 Kosi sɛ Yehowa besi ne ti ase afi soro ahwɛ.+
51 M’aniwa ne me kra adi no nwenenwene,+ me kurow mmabea nyinaa nti.+
צ [Tsa·dhehʹ]
52 M’atamfo repɛ me akyere me sɛ anomaa,+ nanso menyɛɛ hwee.+
53 Wɔatwa me nkwa so wɔ amoa mu,+ na wɔatotow abo agu me so.
54 Nsu abu afa me ti so.+ Maka sɛ: “Wobetwa me afi hɔ!”+
ק [Qohph]
55 O Yehowa, mifi amoa ase+ tɔnn na mabɔ wo din afrɛ wo.
56 Wubetie me nne.+ Nsiw w’aso, m’ahotɔ ne me sufrɛ ho.+
57 Da a mefrɛɛ wo no, wutwiw bɛnee.+ Wokae sɛ: “Nsuro.”+
ר [Rehsh]
58 O Yehowa, woadi me kra asɛm ama me.+ Woagye me nkwa.+
59 O Yehowa, woahu bɔne a wɔde ayɛ me.+ Mesrɛ wo, di m’asɛm ma me.+
60 Woahu wɔn aweredi nyinaa, wɔn adwene a wɔadwen atia me nyinaa.+
ש [Sin] anaa [Shin]
61 O Yehowa, woate wɔn ahohora, wɔn adwene a wɔadwen atia me nyinaa,+
62 Woate wɔn a wɔsɔre tia me no anom asɛm+ ne huhuhuhu a wɔyɛ me ho daa nyinaa no.+
63 Hwɛ wɔn asetena ne wɔn sɔre.+ Me na wɔde me to dwom.+
ת [Taw]
64 O Yehowa, tua wɔn ka sɛnea wɔn nsa ano adwuma te.+
65 Wobɛma wɔn koma ayɛ den;+ wo nnome mmra wɔn so.+
66 Yehowa, wubetiw wɔn w’abufuw mu na woasɛe wɔn+ afi wo soro ase.+
