Leviticus 11:1-47
11 Yehowa ka kyerɛɛ Mose ne Aaron sɛ:
2 “Monka nkyerɛ Israelfo sɛ, ‘Asase so mmoa nyinaa, nea mubetumi awe ni:+
3 Mubetumi awe aboa biara a ne nan mu apae na opuw wesaw.+
4 “‘Mmoa a wopuw wesaw anaa wɔn nan mu apae a ɛnsɛ sɛ mowe ni: Monnwe yoma, efisɛ opuw wesaw de, nanso ne nan mu mpaee. Ne ho ntew mma mo.+
5 Afei nso monnwe atwaboa,+ efisɛ opuw wesaw de, nanso ne nan mu mpaee. Ne ho ntew mma mo.
6 Monnwe adanko+ nso, efisɛ opuw wesaw de, nanso ne nan mu mpaee. Ne ho ntew mma mo.
7 Bio nso monnwe prako,+ efisɛ ne nan mu apae asi de, nanso ompuw nwesaw. Ne ho ntew mma mo.
8 Monnwe wɔn nam, na munnso wɔn afunu mu.+ Wɔn ho ntew mma mo.+
9 “‘Nsu mu mmoa a mubetumi awe ni:+ Asubɔnten anaa po mu aboa biara a ntɛtɛw ne abona wɔ ne ho+ de, mubetumi awe.
10 Nanso po anaa nsu biara mu mmoa manyamanya anaa nsu mu akra ateasefo a wonni ntɛtɛw ne abona de, ɛyɛ mo akyide.
11 Ɛyɛ mo akyide ankasa. Monnwe bi,+ na wɔn funu nso, munkyi koraa.
12 Biribiara a ɛwɔ nsu mu a enni ntɛtɛw ne abona yɛ mo akyide.
13 “‘Ntuboa a ɛsɛ sɛ mukyi ni.+ Monnwe wɔn nam. Wɔyɛ akyide: Ɔkɔre,+ ɔkɔrebia, opete tuntum,
14 ne ɔkom ne ɔsansa,+ ne wɔn a wɔn su te saa,
15 ne kwaakwaadabi+ ahorow nyinaa,
16 ne sohori,+ ɔpatu, asomfena, ne akorɔma, ne wɔn a wɔn su te saa,
17 ne ɔpatubiaa, po so anene, ɔpatu asotenten,+
18 ne suborɔkokɔ, pokupoku, ne opete,+
19 ne asukɔnkɔn ne asunoma ahorow a wɔn su te sɛ eyinom, ne asɔkwaa ne ampan.+
20 Ntuboa manyamanya a wotumi nantew wɔn nan anan so yɛ mo akyide.+
21 “‘Ntuboa manyamanya a wotumi nantew wɔn nan anan so yi na monwe, wɔn a wɔwɔ nan a wɔde huruhuruw fam.
22 Wɔn mu nea mubetumi awe ni: Mmoadabi ahorow nyinaa,+ ne aketekre ne mmebɛw+ ahorow.
23 Ntuboa manyamanya foforo a wɔwɔ nan anan yɛ mo akyide.+
24 Eyinom begu mo ho fĩ. Obiara a obeso wɔn funu mu no ho begu fĩ akosi anwummere.+
25 Na obiara a ɔbɛsoa wɔn funu no, ɛsɛ sɛ ɔhoro+ n’atade, nanso ne ho begu fĩ akosi anwummere.
26 “‘Sɛ aboa bi nan mu apae nanso ɛmpae nsii, na ompuw nwesaw a, ɛyɛ mo akyide. Obiara a obeso ne mu no ho begu fĩ.+
27 Mmoa a wɔnantew wɔn nan anan so no ho ntew mma mo. Obiara a obeso wɔn funu mu no ho begu fĩ akosi anwummere.
28 Obiara a ɔbɛsoa wɔn funu+ no, ɛsɛ sɛ ɔhoro n’atade,+ nanso ne ho begu fĩ akosi anwummere, efisɛ wɔn ho ntew mma mo.
29 “‘Mmoa a wɔwea fam a wɔn ho ntew ni:+ Ahweaa, aperekesima,+ ne ɔketew, ne wɔn a wɔn su te saa,
30 ne ɔdannena, ɔmampam, bɔmɔte, anhwea-ketew ne ɔbosomaketew.
31 Saa mmoa a wɔwea fam+ yi ho ntew mma mo. Obiara a obeso wɔn funu mu no ho begu fĩ akosi anwummere.+
32 “‘Biribiara a wɔn mu biara bewu atɔ so no ho ntew, ade a wɔde dua+ asen oo, atade oo, nhoma+ oo, atweaatam+ oo, ɛho ntew. Biribiara a wɔde yɛ adwuma no, ɛsɛ sɛ wɔde hyɛ nsu mu, nanso ɛho begu fĩ akosi anwummere ansa na ɛho atew.
33 Na kuku+ biara a wɔn mu bi bewu atɔ mu no, biribiara a ɛwɔ mu no ho ntew, na ɛsɛ sɛ mobɔ no.+
34 Sɛ nsu fi mu gu aduan biara so a, ɛho ntew, na biribiara a obi bɛnom wom no nso ho ntew.
35 Biribiara a wɔn funu bɛtɔ so no ho ntew. Fononoo oo, nea ahina si so oo, ɛsɛ sɛ wɔbɔ no. Ɛho agu fĩ, na ɛho ntew mma mo.
36 Nsuti ne abura a nsu wom de, ɛho bɛkɔ so atew, nanso nea obeso wɔn funu mu no ho begu fĩ.
37 Sɛ wɔn funu tɔ aba bi a wɔrebedua so a, ɛho da so ara tew.
38 Nanso sɛ ɛba sɛ wɔde nsu gu aba no so na aboa a wawu no ho biribi bɛtɔ so a, ɛho ntew mma mo.
39 “‘Sɛ mmoa a wɔde ama mo sɛ aduan no bi wu a, nea obeso ne funu mu no ho begu fĩ akosi anwummere.+
40 Obiara a ɔbɛwe+ aboa a wawu no fã biara no, ɛsɛ sɛ ɔhoro n’atade, nanso ne ho begu fĩ akosi anwummere. Na obiara a ɔbɛsoa ne funu no nso bɛhoro n’atade, nanso ne ho begu fĩ akosi anwummere.
41 Na aboa biara a ɔwea fam yɛ akyide.+ Ɛnsɛ sɛ mowe.
42 Ɛnsɛ sɛ mowe aboa biara a ɔwea ne yafunu so+ anaa ɔnantew ne nan anan so anaa aboa biara a ɔwɔ nan bebree a ɔwea fam, efisɛ ɛyɛ akyide.+
43 Mommfa mmoa a wɔwea fam yi nnsɛe mo kra, na mommfa nngu mo ho fĩ na mo ho anhura.+
44 Mene Yehowa mo Nyankopɔn;+ montew mo ho na monyɛ kronkron,+ efisɛ meyɛ kronkron.+ Enti mommfa mmoa a wɔwea fam nngu mo kra ho fĩ.
45 Mene Yehowa a odii mo anim fii Egypt asase so de kyerɛe sɛ mene mo Nyankopɔn+ no. Monyɛ kronkron,+ efisɛ meyɛ kronkron.+
46 “‘Eyi ne mmara a ɛfa mmoa nyinaa ho, ntuboa, akra ateasefo a wɔwɔ nsu mu,+ ne akra a wɔwea fam manyamanya nyinaa.
47 Eyi bɛma nsonsonoe+ abɛda nea ɛho tew ne nea ɛho ntew ntam, ne aboa a mubetumi awe ne nea muntumi nwe ntam.’”
