Mateo 11:1-30
11 Afei bere a Yesu maa n’asuafo dumien no akwankyerɛ wiei no, ofii adi sɛ ɔrekɔkyerɛkyerɛ na waka asɛm wɔ wɔn nkurow no mu.+
2 Yohane wɔ afiase+ a ɔtee nnwuma a Kristo reyɛ no, ɔsomaa n’ankasa asuafo
3 kobisaa no sɛ: “So wone Nea Ɔreba no, anaasɛ yɛnhwɛ obi foforo kwan?”+
4 Yesu bua see wɔn sɛ: “Monkɔ nkɔka nea mote na muhu no nkyerɛ Yohane sɛ:
5 Anifuraefo hu ade bio,+ na mmubuafo+ nantew, akwatafo+ ho fi na asotifo+ te asɛm, wonyan awufo+ na wɔka asɛmpa+ no kyerɛ ahiafo;
6 anigye ne nea onhu hintidua biara wɔ me mu.”+
7 Bere a eyinom asi kwan so rekɔ no, Yesu fii ase kaa Yohane ho asɛm kyerɛɛ nnipakuw no sɛ: “Dɛn na mokɔɔ sare no so kɔhwɛe?+ Demmire a mframa rewosow no anaa?+
8 Ɛnde, dɛn na mufii adi kɔhwɛe? Ɔbarima a ɔhyɛ atade bɔkɔɔ anaa? Hwɛ, wɔn a wɔhyɛ ntade bɔkɔɔ no wɔ ahemfie.+
9 Dɛn koraa nti na mufii adi? Mokɔhwɛɛ odiyifo? Yiw, mise mo sɛ ɛte saa, na ɔsen odiyifo koraa.+
10 Oyi ne nea wɔakyerɛw ne ho asɛm sɛ: ‘Hwɛ! m’ankasa meresoma me bɔfo adi w’anim, na ɔno na obesiesie wo kwan atwɛn wo!’+
11 Nokwarem mise mo sɛ, wɔn a mmea+ awo wɔn mu no, obiara nsɔree a ɔyɛ kɛse sen Yohane Suboni; nanso nea osua wɔ ɔsoro ahenni+ mu no yɛ kɛse sen no.
12 Nanso efi Yohane Suboni bere so besi nnɛ no, ɔsoro ahenni no ne botae a nnipa repere adu ho, na wɔn a wɔrepere adu ho no so mu denneennen.+
13 Na Adiyifo no ne Mmara no nyinaa hyɛɛ nkɔm besii Yohane so;+
14 sɛ mopɛ sɛ mugye tom a, ɔno ankasa ne ‘Elia a etwa sɛ ɔba no.’+
15 Ma nea ɔwɔ aso no ntie.+
16 “Hena ho na mede awo ntoatoaso+ yi bɛtoto? Ɛte sɛ mmofra nkumaa a wɔtete gua so a wɔteɛm frɛ wɔn mfɛfo+
17 sɛ, ‘Yɛhyɛn abɛn maa mo, nanso moansaw; yɛbɔɔ bena, nanso moanyɛ biribiara ankyerɛ sɛ mo werɛ ahow.’+
18 Saa ara nso na Yohane bae, wannidi na wannom,+ nanso nkurɔfo ka sɛ ‘Ɔwɔ adaemone’;
19 onipa Ba no bae, odidi na ɔnom,+ na nkurɔfo ka sɛ, ‘Hwɛ! Ɔbarima didifo ne ɔsanomfo, towgyefo ne nnebɔneyɛfo adamfo.’+ Nanso, nyansa nam ne nnwuma so di bem.”+
20 Afei ofii ase kaa nkurow a ɔyɛɛ n’ahoɔdenne dodow no ara wom no anim, efisɛ wɔansakra:+
21 “Korasin, due! Betsaida,+ due! efisɛ ahoɔdenne a wɔyɛe wɔ mo mu no, sɛ wɔyɛe wɔ Tiro ne Sidon a, anka wɔasakra wɔ atweaatam ne nsõ+ mu dedaadaw.
22 Enti mise mo sɛ, ɛbɛyɛ mmerɛw ama Tiro ne Sidon Atemmu Da+ no asen mo.+
23 Na wo Kapernaum,+ wɔbɛma wo so akɔ soro anaa? Adamoa*+ mu na wubesian akɔ;+ efisɛ ahoɔdenne a wɔyɛe wɔ wo mu no, sɛ wɔyɛe wɔ Sodom a, anka ɛda so ara wɔ hɔ de besi nnɛ da yi.
24 Enti mise mo sɛ, Atemmu Da no, ɛbɛyɛ mmerɛw ama Sodom asase asen wo.”+
25 Saa bere no na Yesu kae sɛ: “Agya, ɔsoro ne asase Wura, miyi wo ayɛ wɔ baguam, efisɛ wode eyinom asie anyansafo ne animdefo na woayi no adi akyerɛ nkokoaa.+
26 Yiw, O Agya, efisɛ na eyi ne ɔkwan a ɛsɔ w’ani.
27 M’Agya de nneɛma nyinaa ama me,+ na obiara nnim Ɔba no yiye gye Agya no,+ na saa ara nso na obiara nnim Agya no yiye gye Ɔba no ne nea Ɔba no pɛ sɛ ɔda no adi kyerɛ no.+
28 Mo a moabrɛ na wɔde nnesoa asoa mo nyinaa,+ mommra me nkyɛn, na mɛma mo ho adwo mo.
29 Momfa me kɔndua+ nto mo ho so na munsua me,+ efisɛ midwo,+ na mebrɛ me ho ase koma mu, na mubenya ɔhome ama mo kra.+
30 Na me kɔndua yɛ mmerɛw na m’adesoa yɛ hare.”+
Ase Hɔ Nsɛm
^ Anaa “Hades.” Nea ɛkyerɛ ne adesamma adamoa. Hwɛ Nkekaho 4.
