Mateo 21:1-46
21 Afei bere a wɔbɛn Yerusalem na woduu Betfage a ɛwɔ Ngo Bepɔw so no, Yesu somaa asuafo baanu,+
2 na ɔka kyerɛɛ wɔn sɛ: “Munsi kwan so nkɔ akuraa a muhu yi ase, na ntɛm ara mubehu afurum bi a wɔamantam no ne afurum ba; monsan wɔn mfa wɔn mmrɛ me.+
3 Na sɛ obi bisa ho asɛm a, monka sɛ, ‘Awurade hia wɔn.’ Na ntɛm ara ɔde wɔn bɛma mo.”
4 Nokwarem no, eyi sii na ama nea wɔnam odiyifo no so kae aba mu sɛ:
5 “Monka nkyerɛ Sion babea sɛ, ‘Hwɛ! Wo hene reba wo nkyɛn,+ odwo,+ na ɔte afurum so, afurum ba a ɔsoa nneɛma so.’”+
6 Enti asuafo no siim kɔyɛɛ sɛnea Yesu hyɛɛ wɔn no pɛpɛɛpɛ.
7 Na wɔde afurum ne ne ba no bae, na wɔde wɔn ntade nguguso guu wɔn so na ɔtenaa so.+
8 Nnipakuw no mu dodow no ara de wɔn ntade nguguso+ sesɛw kwan mu, na ebinom nso twitwaa nnua mmaa de guu kwan mu.+
9 Na nnipakuw no, wɔn a wodi n’anim ne wɔn a wodi n’akyi no, kɔɔ so teɛteɛɛm sɛ: “Yɛsrɛ wo gye no,+ Dawid Ba!+ Nhyira ne nea ɔba Yehowa din mu!+ Gye no, yɛsrɛ wo, wo a wowɔ ɔsorosoro nohoa!”+
10 Afei bere a oduu Yerusalem no,+ kurow mũ no nyinaa mu yɛɛ gyegyeegye sɛ: “Hena ni?”
11 Nnipakuw no kekae sɛ: “Oyi ne odiyifo+ Yesu a ofi Nasaret a ɛwɔ Galilea no!”
12 Na Yesu kɔɔ asɔrefie hɔ kɔpam wɔn a wɔretɔn nneɛma ne wɔn a wɔretɔ ade nyinaa fii asɔrefie hɔ, na ɔkekaa sikasesafo no apon ne wɔn a wɔtɔn mmorɔnoma no nkongua butubutuwii.+
13 Na ɔka kyerɛɛ wɔn sɛ: “Wɔakyerɛw sɛ, ‘Wɔbɛfrɛ me fie mpaebɔ fie,’+ nanso mo de, moredan no adwowtwafo atɛwee.”+
14 Na anifuraefo ne mpakye nso baa ne nkyɛn wɔ asɔrefie hɔ, na ɔsaa wɔn yare.
15 Bere a asɔfo mpanyin ne akyerɛwfo no huu anwonwade a ɔyɛe+ ne mmarimaa a wɔreteɛteɛm wɔ asɔrefie hɔ sɛ: “Gye no, yɛsrɛ wo,+ Dawid Ba!”+ no, wɔn bo fuwii
16 na wɔka kyerɛɛ no sɛ: “So wote nea eyinom reka yi?” Yesu ka kyerɛɛ wɔn sɛ: “Yiw. So monkenkanee+ sɛ ‘Nkokoaa ne wɔn a wonum nufu anom na woasiesie ayeyi’?”+
17 Na ogyaw wɔn hɔ fii kurow no mu kɔɔ Betania na ɔdaa hɔ.+
18 Anɔpa a ɔresan aba kurow no mu no, na ɔkɔm de no.+
19 Na n’ani bɔɔ borɔdɔma dua bi so wɔ kwan ho na ɔkɔɔ ho, nanso wanhu hwee wɔ so+ sɛ ahaban nkutoo, na ɔka kyerɛɛ dua no sɛ: “Worensow aba bio da.”+ Na borɔdɔma dua no wui amonom hɔ ara.
20 Afei bere a asuafo no huu eyi no, ɛyɛɛ wɔn nwonwa ma wobisae sɛ: “Dɛn nti na borɔdɔma dua no wui amonom hɔ ara yi?”+
21 Yesu buaa wɔn sɛ: “Nokwarem mise mo sɛ, sɛ mowɔ gyidi na mo adwenem nyɛ mo naa nko ara de a,+ anka ɛnyɛ nea meyɛɛ borɔdɔma dua no nko na mobɛyɛ, na mmom sɛ moka nso kyerɛ bepɔw yi sɛ, ‘Tutu kogu po mu a,’ ɛbɛyɛ hɔ.+
22 Na biribiara a mubebisa wɔ mpaebɔ mu no, sɛ mowɔ gyidi a, mo nsa bɛka.”+
23 Afei bere a ɔkɔɔ asɔrefie hɔ na ɔrekyerɛkyerɛ no, asɔfo mpanyin ne ɔman no mu mpanyimfo baa ne nkyɛn bɛkae sɛ:+ “Tumi bɛn na wode yɛ eyinom? Na hena na ɔmaa wo saa tumi yi?”+
24 Yesu buaa wɔn sɛ: “Me nso, mebisa mo asɛm biako. Sɛ moka kyerɛ me a, me nso mɛka tumi ko a mede yɛ eyinom akyerɛ mo:+
25 Tumi a Yohane de bɔɔ asu no fi he? Efi soro anaasɛ efi nnipa?”+ Na wofii ase susuw ho sɛ: “Sɛ yɛka sɛ, ‘Efi soro’ a, ɔbɛka akyerɛ yɛn sɛ, ‘Ɛnde adɛn nti na moannye no anni?’+
26 Nanso sɛ yɛka sɛ, ‘Efi nnipa’ a, yesuro nea nnipakuw no bɛyɛ,+ efisɛ wɔn nyinaa bu Yohane sɛ odiyifo.”+
27 Enti wobuaa Yesu sɛ: “Yennim.” Ɔno nso ka kyerɛɛ wɔn sɛ: “Ɛnde me nso merenka tumi a mede yɛ eyinom nkyerɛ mo.+
28 “Mudwen ho dɛn? Na ɔbarima bi wɔ mma baanu.+ Ɔkɔɔ nea odi kan no nkyɛn kɔkae sɛ, ‘Ɔba, kɔ bobeturo no mu kɔyɛ adwuma nnɛ.’
29 Obuae sɛ, ‘Agya, mɛkɔ,’+ nanso wankɔ.
30 Ɔkɔɔ nea ɔto so abien no nkyɛn kɔkaa saa ara. Oyii no ano sɛ, ‘Merenkɔ.’ Ɛno akyi no onuu ne ho+ na ɔkɔe.
31 Wɔn baanu no mu hena na ɔyɛɛ nea ne papa pɛ?”+ Wɔkae sɛ: “Nea otwa to no.” Yesu ka kyerɛɛ wɔn sɛ: “Nokwarem mise mo sɛ towgyefo ne nguaman redi mo anim akɔ Onyankopɔn ahenni mu.
32 Na Yohane baa mo nkyɛn trenee+ kwan so, nanso moannye no anni.+ Na towgyefo ne nguaman no gyee no dii,+ na mo, muhuu eyi de, nanso moannu mo ho annye no anni.
33 “Muntie mfatoho foforo: “Ofiewura+ bi yɛɛ bobeturo gyee ho ban, na otuu nsã-kyi-amoa wom, na ɔtoo aban,+ na ɔde gyaw akuafo tuu kwan.+
34 Bere a ɛsow aba no, ɔsomaa ne nkoa kɔɔ akuafo no nkyɛn sɛ wonkogye ne de mmra.
35 Nanso akuafo no faa ne nkoa no, na wɔboroo wɔn mu biako, kum obiako, na wosiw obiako abo.+
36 Ɔsan somaa nkoa foforo a wɔdɔɔso sen kan de no, nanso wɔyɛɛ wɔn saa ara.+
37 Awiei koraa, ɔsomaa ne ba kɔɔ wɔn nkyɛn sɛ, ‘Wɔbɛfɛre me ba no.’
38 Bere a akuafo no huu ɔba no, wɔkeka kyerɛɛ wɔn ho sɛ, ‘Oyi ne ɔdedifo no;+ mommra mma yenkum no na yɛmfa n’agyapade!’+
39 Ɛnna wɔkyeree no na wɔpam no fii bobeturo no mu kokum no.+
40 Enti sɛ bobeturo wura no ba a, dɛn na ɔbɛyɛ saa akuafo no?”
41 Wɔka kyerɛɛ no sɛ: “Esiane sɛ wɔyɛ nnipa bɔne nti, ɔbɛsɛe wɔn pasaa+ na wagye bobeturo no ama akuafo foforo a sɛ ɛsow aba a wɔde bɛma no.”+
42 Yesu bisaa wɔn sɛ: “Moankenkan wɔ Kyerɛwnsɛm no mu sɛ, ‘Ɔbo a adansifo poe+ no ne nea abɛyɛ tweatibo.+ Yehowa hɔ na eyi fi, na ɛyɛ nwonwa wɔ yɛn ani so’?
43 Eyi nti na meka kyerɛ mo sɛ, wobegye Onyankopɔn ahenni afi mo nsam na wɔde ama ɔman a ɛbɛsow aba.+
44 Afei nso obi a ɔbɛhwe ɔbo yi so no bebubu pasapasa. Na obiara a ɛbɛhwe no so no, ɛbɛyam no.”+
45 Afei bere a asɔfo mpanyin ne Farisifo no tee ne mfatoho no, wohui sɛ ɔreka wɔn ho asɛm.+
46 Na ɛwom sɛ na wɔrehwehwɛ ɔkwan bi afa so akyere no de, nanso na wosuro nnipakuw no, efisɛ na wobu no sɛ odiyifo.+
