Mateo 24:1-51
24 Afei Yesu fii asɔrefie hɔ sii kwan so sɛ ɔrekɔ, na n’asuafo no baa ne nkyɛn bɛkyerɛɛ no adan a ɛwɔ asɔrefie hɔ no.+
2 Obua see wɔn sɛ: “So munhu eyinom nyinaa? Nokwarem mise mo sɛ, wɔrennyaw ɔbo wɔ ɔbo so wɔ ha ɔkwan biara so a wɔrennwiriw ngu fam.”+
3 Bere a ɔte Ngo Bepɔw so no, asuafo no baa ne nkyɛn kokoam bɛkae sɛ: “Ka kyerɛ yɛn, bere bɛn na eyinom bɛba mu, na dɛn na ɛbɛyɛ wo mmae*+ ne bere a ɛwɔ hɔ yi awiei ho sɛnkyerɛnne?”+
4 Ɛnna Yesu buaa wɔn sɛ: “Monhwɛ yiye na obiara annaadaa mo;+
5 efisɛ nnipa bebree de me din bɛba abɛka sɛ, ‘Mene Kristo no,’ na wɔbɛdaadaa nnipa bebree.+
6 Mobɛte ɔko ne ɔko ho amanneɛbɔ; monhwɛ na moammɔ hu. Na etwa sɛ eyinom sisi, nanso na awiei no nnya nnui.+
7 “Na ɔman bɛsɔre atia ɔman+ na ahenni atia ahenni,+ na aduankɔm+ ne asasewosow+ bɛba mmeaemmeae.
8 Eyinom nyinaa yɛ awoko yaw mfiase.
9 “Ɛnna nkurɔfo beyi mo ama ahohia+ na wɔakum+ mo, na me din nti+ aman nyinaa bɛtan+ mo.
10 Afei nso, nnipa bebree behintiw,+ na wobeyiyi wɔn ho ama atentan wɔn ho.+
11 Na atoro adiyifo+ bebree bɛsɔre abɛdaadaa nnipa bebree,+
12 na amumɔyɛ+ a ɛbɛdɔɔso nti nnipa dodow no ara dɔ ano bedwo.+
13 Na nea obegyina+ mu akosi awiei no, ɔno na wobegye no nkwa.+
14 Na wɔbɛka ahenni+ ho asɛmpa+ yi wɔ asase so nyinaa de adi amanaman nyinaa adanse;+ ɛno ansa na awiei+ no bɛba.
15 “Enti sɛ muhu akyide+ a ɛbɔ ɔman a wɔnam odiyifo Daniel so kaa ho asɛm no sɛ egyina kronkronbea hɔ a,+ (ma ɔkenkanfo no mfa nhumu nyɛ adwuma,)
16 afei momma wɔn a wɔwɔ Yudea mfi ase nguan+ nkɔ mmepɔw so.
17 Mma nea ɔwɔ ɔdan atifi no nnsi mmma mmmɛfa biribi wɔ ne fie,
18 na mma nea ɔwɔ afuw mu no nnsan mmma fie mmmɛfa n’atade nguguso.
19 Nna no mu no, mmea a wɔanyinsɛn ne wɔn a wɔma nufu nnue!+
20 Monkɔ so mmɔ mpae na bere a mode beguan no ansi awɔw bere mu anaa homeda;
21 afei ahohiahia kɛse+ a, efi wiase mfitiase besi mprempren ebi nsii,+ na ebi nso nsi bio bɛba.
22 Nokwarem no, sɛ wɔantwa nna no so a ɔhonam biara nni hɔ a wobegye no nkwa; nanso wɔn a wɔapaw wɔn no nti+ wobetwa nna no so.+
23 “Afei sɛ obi ka kyerɛ mo sɛ, ‘Hwɛ! Kristo wɔ ha,’+ anaa ‘Ɛhɔ!’ a, munnnye nnni.+
24 Na atoro Kristo+ ne atoro adiyifo+ bɛsɔre, na wɔbɛyɛ nsɛnkyerɛnne+ akɛse ne anwonwade sɛnea ɛbɛyɛ a sɛ ɛbɛyɛ yiye a, wɔbɛdaadaa wɔn a wɔapaw wɔn no+ mpo.
25 Hwɛ! madi kan abɔ mo kɔkɔ.+
26 Enti sɛ wɔka kyerɛ mo sɛ ‘Hwɛ! Ɔwɔ sare so’ a, monnkɔ; ‘Hwɛ! Ɔwɔ pia mu’ a, munnnye nnni.+
27 Na sɛnea anyinam+ pae fi apuei na ɛhyerɛn kɔ atɔe no, saa ara na onipa Ba no mmae bɛyɛ.+
28 Baabiara a efunu wɔ no, ɛhɔ na akɔre+ bɛboaboa wɔn ho ano.+
29 “Nna no mu ahohiahia no akyi pɛɛ no, owia beduru sum+ na ɔsram+ renhyerɛn, na nsoromma befi soro ahwehwe fam, na wɔbɛwosow ɔsoro ahoɔden.+
30 Ɛnna onipa Ba+ no ho sɛnkyerɛnne bɛda adi ɔsoro, na asase so mmusuakuw nyinaa abɔ abubuw,+ na wobehu sɛ onipa Ba no nam ɔsoro mununkum mu de tumi ne anuonyam kɛse reba.+
31 Na ɔbɛsoma n’abɔfo ma wɔde torobɛnto nnyigyei a ano yɛ den aba,+ na wɔbɛboaboa wɔn a wapaw wɔn+ no ano afi mframa anan no mu,+ fi ɔsoro ano akosi ano nohoa.
32 “Afei munsua biribi mfi borɔdɔma dua ho mfatoho yi mu: Sɛ enya fefɛw na eyiyi nhaban ara pɛ a, munim sɛ ahohuru bere abɛn.+
33 Saa ara na mo nso, sɛ muhu eyinom nyinaa a, munhu sɛ wabɛn apon ano.+
34 Nokwarem mise mo sɛ saa awo ntoatoaso+ yi rentwam da kosi sɛ eyinom nyinaa bɛba mu.
35 Ɔsoro ne asase betwam,+ nanso me nsɛm rentwam da.+
36 “Ɛdefa saa da no ne dɔn no ho+ de obiara nnim, abɔfo a wɔwɔ ɔsoro ne Ɔba no mpo nnim, gye Agya no nko.+
37 Na sɛnea na Noa+ nna no te no, saa ara na onipa Ba no mmae bɛyɛ.+
38 Na nna a edii nsuyiri no anim no, wodidi nomee, mmarima warewaree na wɔde mmea memaa aware kosii da a Noa+ hyɛn adaka no mu,+
39 na wɔanhu kosii sɛ nsuyiri no bae bɛpraa wɔn nyinaa kɔe.+ Na saa ara na onipa Ba no mmae nso bɛyɛ.
40 Na mmarima baanu bɛkɔ afuw mu: wɔbɛfa obiako agyaw obiako;
41 mmea baanu bɛyam ade owiyammo so:+ wɔbɛfa obiako agyaw obiako.+
42 Enti monkɔ so nwɛn, efisɛ munnim da ko a mo Wura bɛba.+
43 “Munhu eyi sɛ, sɛ ofiewura nim dɔn ko a ɔkorɔmfo bɛba a,+ anka ɔwɛnee na wannya kwan ammebu ne fie amma mu.
44 Eyi nti mo nso munsiesie mo ho,+ efisɛ dɔn a mo ani nna so mu na onipa Ba no bɛba.
45 “Hena koraa ne akoa nokwafo ne ɔbadwemma+ a ne wura de no asi n’asomfo so sɛ ɔmma wɔn aduan bere a ɛsɛ mu no?+
46 Anigye+ ne akoa a ne wura bɛba abehu sɛ ɔreyɛ saa!
47 Nokwarem mise mo sɛ, Ɔde no besi nea ɔwɔ nyinaa so.+
48 “Nanso sɛ akoa bɔne no ka no ne komam sɛ,+ ‘Me wura rekyɛ,’+
49 na sɛ ofi ase hwe ne mfɛfo nkoa no na ɔne akɔwensafo didi nom a,
50 saa akoa no wura bɛba da a ɔnhwɛ kwan ne dɔn+ a onnim,
51 na ɔbɛtwe n’asõ denneennen+ ama no ne kyɛfa wɔ nyaatwomfo mu. Ɛhɔ na obesu atwɛre ne sẽ.+
Ase Hɔ Nsɛm
^ Nea ɛkyerɛ ankasa ne “woaba a wowɔ hɔ.”
