Mateo 25:1-46
25 “Afei ɔsoro ahenni bɛyɛ sɛ mmaabun du a wɔfaa wɔn akanea+ fii adi sɛ wɔrekohyia ayeforokunu.+
2 Ná wɔn mu baanum yɛ nkwaseafo,+ na baanum yɛ mmadwemma.+
3 Na nkwaseafo no faa wɔn akanea nanso wɔamfa ngo anka ho,
4 na mmadwemma no de, wɔfaa ngo guu ntoa mu kaa wɔn akanea no ho.
5 Na bere a ayeforokunu no rekyɛ no, wɔn nyinaa tɔɔ nko faa mu dae.+
6 Ɔdasum na wɔtee nteɛm bi sɛ,+ ‘Ayeforokunu no ni oo! Mumfi adi nkohyia no.’
7 Ɛnna mmaabun no nyinaa sɔree na wɔhwɛɛ wɔn akanea+ no sɛ biribiara yɛ pɛpɛɛpɛ anaa.
8 Na nkwaseafo no ka kyerɛɛ mmadwemma no sɛ, ‘Momma yɛn mo ngo no bi,+ efisɛ yɛn akanea no reyɛ adum.’
9 Mmadwemma+ no buae sɛ, ‘Ebia na ansõ yɛn ne mo. Enti monkɔ wɔn a wɔtɔn no nkyɛn nkɔtɔ bi.’
10 Bere a wɔrekɔ akɔtɔ no, ayeforokunu no bae, na mmaabun a wɔayɛ krado no ne no kɔɔ ayeforohyia no ase;+ na wɔtoo pon no mu.
11 Ɛno akyi no, mmaabun a aka no nso bae, na wɔkae sɛ, ‘Owura, owura, bue yɛn!’+
12 Obuae sɛ, ‘Mise mo nokware mu sɛ, minnim mo.’+
13 “Enti monkɔ so nwɛn,+ na munnim da anaa dɔn no.+
14 “Na ɛte sɛ onipa bi+ a ɔrebetu kwan+ a ɔfrɛɛ ne nkoa de n’ahode hyɛɛ wɔn nsa.+
15 Ɔmaa obiako dwetikɛse anum, ɔmaa obiako abien, na ɔmaa ɔfoforo nso biako, sɛnea wɔn mu biara ahoɔden te,+ na otuu kwan.
16 Ntɛm ara na nea onyaa dwetikɛse anum no siim de kɔyɛɛ adwuma nyaa anum kaa ho.+
17 Saa ara na nea onyaa abien no san nyaa abien kaa ho.
18 Na nea onyaa biako no de, okotutuu fam de ne wura dwetɛ sika no siei.
19 Bere tenteenten akyi no,+ nkoa no wura bae, na ɔne wɔn buu akontaa.+
20 Enti nea onyaa dwetikɛse anum no de dwetikɛse anum kaa ho bae sɛ, ‘Me wura, womaa me dwetikɛse anum; hwɛ, minyaa ho dwetikɛse anum.’+
21 Ne wura no ka kyerɛɛ no sɛ ‘Mo, akoa pa nokwafo!+ Wudii nneɛma kakraa bi mu nokware.+ Mɛma woahwɛ nneɛma pii so.+ Nya wo wura anigye+ no bi.’
22 Afei nea onyaa dwetikɛse abien no bɛkae sɛ, ‘Me wura, womaa me dwetikɛse abien; hwɛ, minyaa ho dwetikɛse abien.’+
23 Ne wura no ka kyerɛɛ no sɛ, ‘Mo, akoa pa nokwafo! Wudii nneɛma kakraa bi mu nokware.+ Mɛma woahwɛ nneɛma pii so. Nya wo wura anigye+ no bi.’
24 “Awiei koraa no nea onyaa dwetikɛse biako no bɛkae+ sɛ, ‘Me wura, minim sɛ woyɛ obi a w’asɛm yɛ den, a faako a woangu no ɛhɔ na wutwa, na woboaboa nea wunhuhuw so ano.
25 Enti misuroe,+ na mede wo dwetikɛse no siee fam. W’ade ni, gye.’
26 Ne wura no buaa no sɛ, ‘Akoa bɔne ne onihafo, sɛ́ wunim sɛ faako a mangu na mitwa, na nea manhuhuw so na meboaboa ano?
27 Enti ɛsɛ sɛ anka wode me dwetɛ sika no kɔma sikakorafo, na meba a manya m’ade ne ɛho mfɛntom.+
28 “‘Enti munnye dwetikɛse no mfi ne nsam mfa mma nea ɔwɔ dwetikɛse du no.+
29 Efisɛ obiara a ɔwɔ bi no, wɔbɛma no bi aka ho ma aboro no so; na nea onni bi no, nea ɔwɔ mpo wobegye afi ne nsam.+
30 Na mompam akoa a mfaso nni no so no nkɔ abɔnten sum no mu. Ɛhɔ na obesu atwɛre ne sẽ.’+
31 “Sɛ onipa Ba+ no ba n’anuonyam mu a abɔfo nyinaa ka ne ho a,+ ɔbɛtena n’anuonyam ahengua so.+
32 Na wɔbɛboaboa amanaman nyinaa ano n’anim,+ na ɔbɛpaapae+ nnipa no mu mmiako mmiako,+ sɛnea oguanhwɛfo paapae nguan ne mmirekyi mu no.
33 Na ɔde nguan no begyina ne nsa nifa so,+ na ɔde mmirekyi no agyina ne benkum so.+
34 “Afei ɔhene no bɛka akyerɛ wɔn a wɔwɔ ne nifa so no sɛ, ‘Mommra, mo a m’Agya+ ahyira mo, momfa ahenni+ a wɔasiesie ama mo fi wiase nhyɛase+ no nni.+
35 Na ɔkɔm dee me na momaa me biribi dii;+ osukɔm dee me na momaa me biribi nomee. Meyɛɛ ɔhɔho na mugyee me fɛw so;+
36 medaa adagyaw+ na momaa me biribi kataa me ho. Meyaree na mohwɛɛ me. Medaa afiase+ na mobaa me nkyɛn.’
37 Ɛnna treneefo no bebua no sɛ, ‘Awurade, da bɛn na yehuu wo sɛ ɔkɔm de wo na yɛmaa wo aduan dii, anaasɛ osukɔm de wo+ na yɛmaa wo biribi nomee?+
38 Da bɛn na yehuu wo sɛ ɔhɔho a yegyee wo fɛw so, anaasɛ woda adagyaw a yɛmaa wo biribi kataa wo ho?
39 Da bɛn na yehui sɛ woyare anaasɛ wowɔ afiase a yɛbaa wo nkyɛn?’
40 Na ɔhene+ no bebua ase wɔn sɛ, ‘Nokwarem mise mo sɛ, bere dodow a moyɛ maa me nuanom+ nkumaa+ yi mu biako no, moayɛ ama me.’+
41 “Afei ɔbɛka akyerɛ wɔn a wɔwɔ ne benkum so no nso sɛ, ‘Mo a wɔadome mo, mumfi me so nkɔ+ daa ogya+ a wɔasiesie ama Ɔbonsam ne n’abɔfo+ no mu.
42 Bere a ɔkɔm dee me no, moamma me hwee anni,+ na osukɔm dee me+ no moamma me hwee annom.
43 Meyɛɛ ɔhɔho, nanso moannye me fɛw so; medaa adagyaw nanso moamma me biribi ankata+ me ho; meyaree na medaa afiase,+ nanso moammɛhwɛ me.’
44 Ɛnna wɔn nso bebua sɛ, ‘Awurade, da bɛn na yehui sɛ ɔkɔm anaa sukɔm de wo anaasɛ woyɛ ɔhɔho anaa woda adagyaw anaa woyare anaa woda afiase a yɛammɛsom wo?’
45 Ɛnna obebua wɔn sɛ, ‘Nokwarem mise mo sɛ, bere dodow a moanyɛ amma nkumaa yi mu biako no,+ moanyɛ+ amma me.’+
46 Na eyinom befi hɔ akɔ daa ɔsɛe mu,+ na wɔn a wɔteɛ no bɛkɔ daa nkwa mu.”+
