Nahum 2:1-13
2 Nea ɔbɔ nnipa hwete no aba wo so.+ Enti bɔ abannennen no ho ban. Wɛn ɔkwan no. Mia w’abɔso mu. Yere wo ho denneennen.+
2 Na Yehowa de Yakob+ anuonyam bɛsan asi hɔ te sɛ Israel anuonyam, efisɛ adesɛefo asɛe wɔn,+ na wɔasɛe wɔn mu duforo.+
3 Ne nnɔmmarima kyɛm ho abere kɔɔ, na n’akatakyi hyehyɛ ntade kɔkɔɔ.+ Ɛda a osiesie ne ho ma ɔko no, ne teaseɛnam ho nnade twa yerɛwyerɛw sɛ ogya, na ɔpopaw+ dua peaw di ahim.
4 Nteaseɛnam no atew praka wɔ mmorɔn so,+ na wɔde mmirika di mmɔnten so akɔneaba. Wɔte sɛ agyatɛn, na wotu mmirika te sɛ anyinam.+
5 Ɔbɛkae n’abirɛmpɔn.+ Na wobehintiw wɔn nantew mu.+ Na wɔde ahoɔhare bɛkɔ ne fasu ho, na wɔbɛma akoban no mu ayɛ den.
6 Wobebue nsubɔnten no ano apon na ahemfie no anan.
7 Wɔahyɛ ato hɔ saa, na wɔapa ne ho; wɔbɛfa no akɔ,+ na ne mmaawa bedi abooboo te sɛ mmorɔnoma,+ na wɔbɛpempem wɔn koko.+
8 Niniwe te sɛ ɔtare+ fi ne mfiase;+ nanso wɔreguan. “Munnyina hɔ! Munnyina hɔ!” Nanso obiara nnan n’ani.+
9 Momfa dwetɛ; momfa sika,+ efisɛ nneɛma a wakora so nni ano. Na ahode fɛfɛ pii wɔ hɔ.+
10 Kurow no da mpan, asɛe, na adan amamfõ!+ Wɔn koma anan,+ wɔn nkotodwe keka bom,+ wɔn dwonku mu tutuw wɔn,+ na wɔn nyinaa anim asinsiam.+
11 Ɛhe na agyata atenae wɔ, na ɛhe na agyatanini amoa wɔ, baabi a gyata di akɔneaba,+ baabi a gyata ba wɔ, baabi a obiara nyi wɔn hu?+
12 Gyata tetew nam mu ma ne mma, na okum mmoa ma n’abere. Ɔkyere mmoa hyɛ n’amoa mu mã, na ɔde mmoa a watetew wɔn mu+ hyɛ n’atɛwee mã.
13 Asafo Yehowa asɛm ni:+ “Hwɛ, me ne wo wɔ asɛm, na mɛma wo teaseɛnam ahyew wɔ wusiw mu.+ Na nkrante bedi w’agyatanini nam.+ Na metwa wo hanam afi asase so, na wɔrente w’abɔfo no nne bio.”+
