Dwom 102:1-28
Mmɔborɔni mpaebɔ; bere a wayɛ hahaaha, na oyi ne komam dadwen adi kyerɛ Yehowa no.+
102 O Yehowa, tie me mpaebɔ ɛ;+Ma me sufrɛ nnu w’anim.+
2 Mfa w’anim nhintaw me m’ahohia da.+Yɛ aso ma me;+Da a mɛfrɛ wo no, yɛ ntɛm gye me so.+
3 Me nna aba awiei sɛ wusiw,+Na me nnompe adɔ kɔɔ sɛ muka mu.+
4 Me koma abotow sɛ wura, na atwintwam;+Me werɛ afi mpo sɛ medidi.+
5 M’ahomegu nnyigyei nti+Me honam afomfam me nnompe ho.+
6 Mayɛ sɛ anomaa pokupoku a ɔte wuram.+Mayɛ sɛ ɔpatu ketewa a ɔte amamfõ so.
7 Matwintwam,Mete sɛ anomaa koro a osi ɔdan atifi.+
8 M’atamfo bɔ me ahohora daa nyinaa.+Wɔn a wodi me ho fɛw no de me din mpo ka ntam.+
9 Midi nsõ sɛ paanoo;+Me nusu afra m’anonne mu+
10 W’abohuru ne w’abufuw nti;+Woama me so sɛ wobɛtow me akyene.+
11 Me nna ayɛ sɛ sunsuma a ɛreyera,+Na me de, matwintwam sɛ wura.+
12 Wo Yehowa de, wowɔ hɔ daa daa,+Na wo nkae nso wɔ hɔ, awo ntoatoaso nyinaa mu.+
13 Wobɛsɔre, na wubehu Sion mmɔbɔ,+Efisɛ bere asõ sɛ wodom no,Bere a wɔahyɛ no adu.+
14 Wo nkoa anya n’abo ho anigye,+Na wɔn yam hyehye wɔn wɔ ne mfutuma ho.+
15 Amanaman besuro Yehowa din,+Na asase so ahene nyinaa besuro w’anuonyam.+
16 Yehowa bɛkyekye Sion;+Obeyi ne ho adi n’anuonyam mu.+
17 Asõ na ɔbɛyɛ atie wɔn a wɔagye wɔn ho biribiara no mpaebɔ,+Na ɔremmu wɔn mpaebɔ animtiaa.+
18 Wɔakyerɛw eyi ato hɔ ama awo ntoatoaso a ɛbɛba;+Na nkyirimma a wɔbɛba no beyi Yah ayɛ.+
19 Yehowa fi ne kronkronbea a ɛwɔ soro hɔ hwɛ,+Ofi sorosoro hɔ hwɛ asase so,+
20 Sɛ ɔbɛte deduani ahomegu,+Na wasan wɔn a wɔayi wɔn ama owu no;+
21 Ɛno bɛma wɔabɔ Yehowa din wɔ Sion,+Na wɔayi no ayɛ wɔ Yerusalem,+
22 Bere a wɔboaboa aman nyinaa ano,+Na ahenni a ɛwowɔ hɔ no som Yehowa no.+
23 Ɔmaa me tumi mu gowee ɔkwan mfinimfini,+Otwaa me nna so.+
24 Mekae sɛ: “O me Nyankopɔn,Mmu me nna mu mfa me nkɔ;+Wowɔ hɔ awo ntoatoaso nyinaa mu.+
25 Teteete na wotoo asase fapem,+Na ɔsoro yɛ wo nsa ano adwuma.+
26 Ne nyinaa twam mpo a, wo de, wowɔ hɔ daa;+Ne nyinaa besuw sɛ ntama.+Wobɛsesã no te sɛ atade, na wɔn bere betwam.+
27 Nanso wo de, wonsesã da, na wo mfe to rentwa da.+
28 W’asomfo mma bɛkɔ so atena ase;+Na wɔn asefo betim w’anim.”+
