Dwom 103:1-22
Dawid dwom.
103 O me kra, hyira Yehowa,+Ma me mu ade nyinaa nhyira ne din kronkron no.+
2 O me kra, hyira Yehowa,Na mma wo werɛ mmfi nea wayɛ nyinaa;+
3 Ɔno na ɔde wo mfomso nyinaa kyɛ wo,+Na oyi wo haw* nyinaa fi hɔ.+
4 Ɔno na ogye wo nkwa fi amoa mu,+Na ɔde adɔe ne mmɔborɔhunu bɔ wo abotiri.+
5 Ɔno na ɔde adepa hyɛ w’asetena mã;+Wo mmerantebere yɛ foforo sɛ ɔkɔre.+
6 Yehowa de, ɔyɛ adetrenee,+Na obu atɛntrenee ma wɔn a wosisi wɔn nyinaa.+
7 Ɔmaa Mose huu n’akwan,+Na oyii ne nneyɛe adi kyerɛɛ Israel mma.+
8 Yehowa yɛ mmɔborɔhunufo ne ɔdomfo,+Ne bo kyɛ fuw na n’adɔe dɔɔso.+
9 Ɔrenhwehwɛ yɛn mfomso bere nyinaa,+Na ɔrennya yɛn ho menasepɔw daa.+
10 Ɔnhwɛ yɛn bɔne so ne yɛn nni,+Na ɔnhwɛ yɛn mfomso so ntua yɛn ka.+
11 Sɛnea ɔsoro ware sen asase no,+Saa na n’adɔe boro so ma wɔn a wosuro no.+
12 Sɛnea apuei ne atɔe ntam ware no,+Saa na wama yɛne yɛn mmarato ntam aware.+
13 Sɛnea agya yi mmɔborɔhunu adi kyerɛ ne mma no,+Saa na Yehowa nso yi mmɔborɔhunu adi kyerɛ wɔn a wosuro no.+
14 Onim yɛn nipaban;+Ɔkae sɛ yɛyɛ mfutuma.+
15 Onipa desani, ne nna te sɛ sare momono;+Sɛnea wuram nhwiren yɛ frɔmfrɔm no, saa na ɔte.+
16 Mframa bɔ fa so ara pɛ, na ayera,+Na ne sibea nhu no bio.+
17 Nanso Yehowa adɔe de, ɛwɔ hɔ fi mmeresanten kosi mmeresanten+Ma wɔn a wosuro no,+Na ne trenee nso wɔ hɔ ma wɔn mma mma.+
18 Ɛwɔ hɔ ma wɔn a wodi n’apam so,+Ne wɔn a wɔkae n’ahyɛde na wodi so.+
19 Yehowa na ɔde n’ahengua atim hɔ wɔ ɔsoro;+N’ahenni na edi biribiara so.+
20 O munhyira Yehowa, n’abɔfo+ ahoɔdenfo a mudi n’asɛm so+Na mutie n’asɛm.+
21 Yehowa asafodɔm nyinaa, munhyira no,+Mo a mosom no na moyɛ n’apɛde no.+
22 Yehowa abɔde nyinaa, munhyira no+Wɔ baabiara a odi tumi.+O me kra, hyira Yehowa.+
Ase Hɔ Nsɛm
^ Anaa “wo nyarewa.”
