Dwom 105:1-45
105 Monna Yehowa ase, mommɔ ne din,+Monka ne nneyɛe ho asɛm amanaman mu.+
2 Monto dwom mma no, monto ayeyi dwom mma no,+Munnwinnwen n’anwonwadwuma nyinaa ho.+
3 Momfa ne din kronkron no nhoahoa mo ho.+Momma wɔn a wɔhwehwɛ Yehowa no koma nni ahurusi.+
4 Monhwehwɛ Yehowa ne n’ahoɔden.+Monhwehwɛ n’anim dom daa.+
5 Monkae n’anwonwadwuma a wayɛ+Ne nsɛnkyerɛnne ne n’anom atemmusɛm no,+
6 O n’akoa Abraham asefo,+Mo, Yakob mma a wapaw mo.+
7 Ɔno ne Yehowa, yɛn Nyankopɔn.+N’atemmusɛm kodu asase so baabiara.+
8 Wakae n’apam de akosi daa,+Asɛm a ɔhyɛɛ awo ntoatoaso apem no;+
9 Apam a ɔne Abraham yɛe+Ne ntam a ɔkaa Isak no;+
10 Ɔde yɛɛ ahyɛde sii hɔ maa Yakob,Na ɔde maa Israel sɛ daa apam;+
11 Ɔkae sɛ: “Wo na mede Kanaan asase bɛma wo+Sɛ agyapade a matwa ama mo.”+
12 Saa bere no na wɔnnɔɔso,+Ná wɔyɛ kakraa bi; na wɔyɛ ahɔho wɔ hɔ.+
13 Wodii atutena wɔ amanaman mu,+Na wofi ahenni biako mu kɔɔ ahenni foforo mu.+
14 Wamma onipa biara ansisi wɔn,+Na wɔn nti ɔkaa ahene anim.+
15 Ɔkae sɛ: “Mommfa mo nsa nnka me nkurɔfo a masra wɔn no,+Na m’adiyifo nso, monnyɛ wɔn bɔne.”+
16 Ɔmaa ɔkɔm baa asase no so;+Obubuu abaa biara a paanoo sensɛn so.+
17 Ɔsomaa ɔbarima bi dii wɔn anim,Yosef a wɔtɔn no kɔɔ nkoasom mu no.+
18 Wɔde nkɔnsɔnkɔnsɔn guu ne nan,+Na wɔde dade kyekyeree no,+
19 Kosii bere a Yehowa asɛm baa mu,+Na n’asɛm siesiee no.+
20 Ɔhene no soma ma wokoyii no,+Nea odi nkurɔfo so no ma wogyaa no.
21 Ɔde no sii ne fie so panyin,+Na ɔma odii n’agyapade nyinaa so;+
22 Sɛ́ ɔnkyekyere ɔhene mpanyimfo sɛnea ne kra pɛ,+Na ɔnkyerɛ ne nkwakoraa nso nyansa.+
23 Ɛnna Israel baa Egypt,+Na Yakob bɛyɛɛ ɔhɔho wɔ Ham asase so.+
24 Onyankopɔn maa ne man ase trɛwee,+Na ɔma wɔbɛyɛɛ den sen wɔn atamfo.+
25 Ɔdan wɔn koma ma wɔtan ne man,+Na wɔde anifere hyɛɛ ne nkoa so.+
26 Ɛnna ɔsomaa n’akoa Mose,+Ne Aaron a ɔpaw no no.+
27 Wɔyɛɛ ne nsɛnkyerɛnne wɔ wɔn mu,+Na wɔyɛɛ anwonwade wɔ Ham asase so.+
28 Ɔsomaa esum, na esum durui;+Wɔantew n’asɛm so atua.+
29 Ɔdanee wɔn nsu mogya,+Na okunkum wɔn mpataa.+
30 Mpɔtorɔ bɛhyɛɛ wɔn asase so mã,+Ma wɔbaa wɔn ahene mpo mpia mu.
31 Ɔkae sɛ ahurii mmra,+Na ntummoa mmra wɔn asase no so nyinaa.+
32 Ɔde amparuwbo yɛɛ osu tɔ guu wɔn so,+Na ɔmaa ogyaframa tɔ guu wɔn asase so.+
33 Ɛnna ɔbobɔɔ wɔn bobe ne wɔn borɔdɔma nnua,Na obubuu wɔn asase so nnua nyinaa.+
34 Ɔkae sɛ mmoadabi mmra,+Mmoadabi a wɔn dodow nni ano.+
35 Wɔwee wɔn asase no so nhaban nyinaa;+Na wɔn mfuw mu nnɔbae nso, wodii.
36 Ɛnna ɔbobɔɔ wɔn asase so mmakan nyinaa,+Wɔn ahoɔden mfiase no.+
37 Oyii ne man fii hɔ de dwetɛ ne sika kaa wɔn ho;+Ná obiara nni n’abusuakuw no mu a wagow.
38 Wofii hɔ no, Egypt dii ahurusi,Efisɛ na wɔn ho hu atɔ wɔn so.+
39 Ɔtrɛw omununkum mu de kataa wɔn so,+Na ogya maa wɔn hann anadwo.+
40 Wobisae, na ɔmaa wɔn nkokɔhwerew,+Na ɔde ɔsoro aduan maa wɔn di mee.+
41 Ɔpaee ɔbotan mu ma nsu fii mu bae;+Ɛsen sɛ asubɔnten faa kwayow no so.+
42 Ɔkaee asɛm kronkron a ɔka kyerɛɛ n’akoa Abraham no.+
43 Enti oyii ne man, ahurusidi mu,+Ne wɔn a wapaw wɔn no, osebɔ mu.+
44 Nkakrankakra, ɔde amanaman no nsase maa wɔn,+Na wɔfaa amanaman no nsa ano adwuma a wɔbrɛ yɛe no,+
45 Na ama wɔadi n’ahyɛde+Ne ne mmara so.+Munyi Yah ayɛ!+