Numeri 14:1-45
14 Afei nnipa no nyinaa maa wɔn nne so sui+ anadwo no nyinaa.
2 Na Israelfo fii ase nwiinwii tiaa Mose ne Aaron,+ na asafo no nyinaa kae sɛ: “Sɛ yewuwui wɔ Egypt anaa sare yi so mpo a, anka eye!
3 Dɛn nti na Yehowa de yɛn reba asase yi so sɛ yemmewuwu wɔ nkrante ano?+ Wɔbɛfa yɛn yerenom ne yɛn mma nketewa.+ So enye mmom sɛ yɛbɛsan akɔ Egypt?”+
4 Na wɔkae mpo sɛ: “Momma yɛmpaw obi nni yɛn anim nsan nkɔ Egypt!”+
5 Ɛbaa saa no, Mose ne Aaron de wɔn anim butubutuw fam+ wɔ Israel asafo no nyinaa anim.
6 Na Nun+ ba Yosua ne Yefune+ ba Kaleb a wɔka wɔn a wɔkɔhwɛɛ asase no ho no sunsuanee wɔn ntade mu.+
7 Wɔka kyerɛɛ Israel asafo no nyinaa sɛ: “Asase a yɛkɔhwɛe no yɛ asase pa ankasa.+
8 Sɛ yɛanya Yehowa anim dom+ a, ɔbɛhwɛ de yɛn akɔ hɔ na ɔde asase no ama yɛn, asase a nufusu ne ɛwo sen wɔ so+ no.
9 Ahwɛyiye ara na monyɛ na moantew atua antia Yehowa.+ Munnsuro nnipa a wɔte asase no so+ no, na wɔyɛ koko ma yɛn. Wɔn nkataso afi wɔn so,+ na yɛn de Yehowa ka yɛn ho.+ Munnsuro wɔn.”+
10 Nanso asafo no nyinaa kae sɛ wonsiw wɔn abo.+ Na Yehowa anuonyam baa ahyiae ntamadan no so maa Israelfo no nyinaa hui.+
11 Afei Yehowa bisaa Mose sɛ: “Da bɛn+ koraa na ɔman yi de obu bɛma me,+ na nsɛnkyerɛnne a mayɛ wɔ wɔn mu yi nyinaa akyi no, da bɛn na wobegye me adi?+
12 Ma memfa owuyare ntɔre wɔn ase na menyɛ wo ɔman kɛse a ɛyɛ den nsen wɔn.”+
13 Ɛnna Mose ka kyerɛɛ Yehowa sɛ: “Sɛ woyɛ saa a, Egyptfo bɛte sɛ wode wo tumi ayi nnipa yi afi wɔn man mu.+
14 Na wɔbɛka akyerɛ nnipa a wɔte asase yi so, efisɛ wɔate sɛ wo Yehowa wowɔ ɔman yi mu,+ na woayi wo ho adi akyerɛ wɔn anim ne anim.+ Wone Yehowa, na wo mununkum na ɛkata wɔn so. Na wudi wɔn anim awia wɔ omununkum dum mu, na anadwo nso ogya dum mu.+
15 Sɛ wukum nnipa yi nyinaa prɛko te sɛ onipa biako+ bi a, aman a wɔate wo ho asɛm no bɛka sɛ,
16 ‘Esiane sɛ Yehowa ntumi mfa ɔman yi nkɔ asase a ɔkaa ntam sɛ ɔde bɛma wɔn no so nti na wakunkum wɔn wɔ sare so no.’+
17 Enti Yehowa, mesrɛ wo, da wo tumi adi,+ efisɛ wo na wokae sɛ,
18 ‘Yehowa bo kyɛ fuw+ na n’adɔe+ dɔɔso, na ɔde mfomso ne mmarato firi,+ nanso ɔremma nea odi fɔ mfa ne ho nni.+ Na ɔde agyanom bɔne ho asotwe ba mma ne mmanana ne nanankansowanom mpo so.’+
19 Mesrɛ wo, hwɛ w’adɔe so fa nnipa yi bɔne kyɛ wɔn, sɛnea wode wɔn bɔne afiri wɔn fi Egypt abesi nnɛ no.”+
20 Ɛnna Yehowa kae sɛ: “Nea woaka yi nti mede akyɛ wɔn.+
21 Nanso mete ase yi, Yehowa anuonyam bɛhyɛ asase nyinaa mã.+
22 Wɔn a wɔahu m’anuonyam+ ne anwonwade+ ahorow a mayɛ wɔ Egypt ne sare yi so, nanso mpɛn du yi nyinaa wɔasɔ me ahwɛ+ na wɔantie me+ no de,
23 wɔrenhu asase a mekaa wɔn agyanom ntam sɛ mede bɛma wɔn no. Wɔn a wobu me animtiaa no mu biara nni hɔ a obehu.+
24 Nanso m’akoa Kaleb+ de, esiane sɛ honhom foforo wɔ no so na ɔde ne koma nyinaa adi m’akyi+ nti, mede no bɛkɔ asase a ɔkɔhwɛɛ so no so, na ɛbɛyɛ n’asefo dea.+
25 Amalekfo ne Kanaanfo+ tete asasetaw no so, enti ɔkyena monnan mo ho nkɔfa Po Kɔkɔɔ+ no ho nkɔ sare no so.”
26 Yehowa san ka kyerɛɛ Mose ne Aaron sɛ:
27 “Enkosi da bɛn na memma amumɔyɛfo asafo yi nnwiinwii ntia me?+ Mate anwiinwii a Israelfo nwiinwii tia me no nyinaa.+
28 Ka kyerɛ wɔn sɛ, ‘Sɛ Yehowa se ni, “Sɛ mete ase yi, nea moaka ma adu m’asom no, saa ara na mɛyɛ mo!+
29 Mo a wɔkan mo a moadi mfe aduonu rekɔ a munwiinwii tia me+ nyinaa, mo afunu bɛdeda sare yi so.+
30 Mo nan rensi asase a memaa me nsa so kaa ntam+ sɛ me ne mo bɛtena so no so, gye Yefune ba Kaleb ne Nun ba Yosua.+
31 “‘“Na mo mma nketewa a mokae sɛ asase no sofo bɛfa wɔn+ no, mede wɔn nso bɛkɔ bi, na wobehu asase a moapo no.+
32 Mo de, mo afunu bɛdeda sare yi so.+
33 Mo mma bɛyɛ nguanhwɛfo wɔ sare no so+ mfe aduanan, na wɔbɛsoa mo aguamammɔ+ akosi sɛ mo mu nea otwa to bewu ada sare yi so.+
34 Nna a mode kɔhwɛɛ asase no yɛ adaduanan,+ na mode mfe aduanan bɛsoa mo bɔne.+ Da koro biara bɛyɛ afe+ kosi sɛ mubehu ampa sɛ minni mo akyi bio.+
35 “‘“Me Yehowa, nea maka sɛ mɛyɛ amumɔyɛfo asafo+ a wɔasɔre atia me yi, sɛ manyɛ a na ɛnyɛ me: Sare yi so na wɔn awiei bɛba, na ɛha na wobewuwu agu.+
36 Na esiane sɛ mmarima a Mose somaa wɔn kɔhwɛɛ asase no so no de asase no ho amanneɛ a etu koma+ na ɛbae na wɔmaa asafo no nyinaa nwiinwii tiaa no nti,
37 saa mmarima a wɔbɛkaa asase no ho asɛmmɔne no bewu amanehunu wu wɔ Yehowa anim.+
38 Wɔn a wɔkɔhwɛɛ asase no nyinaa mu no, Nun ba Yosua ne Yefune ba Kaleb nko na wɔbɛka.”’”+
39 Bere a Mose kaa eyi nyinaa kyerɛɛ ɔman no, wɔn nyinaa werɛ howee yiye.+
40 Afei wɔsɔree anɔpatutuutu sɛ wɔrekɔ bepɔw no so, na wɔkae sɛ: “Yɛbɛforo akɔ faako a Yehowa kaa ho asɛm no, efisɛ yɛayɛ bɔne.”+
41 Ɛnna Mose kae sɛ: “Dɛn nti na mopɛ sɛ mosɔre tia Yehowa mmara?+ Ɛrensi mo yiye.
42 Monhwɛ na moamforo ankɔ hɔ ankodi nkogu wɔ mo atamfo anim,+ efisɛ Yehowa nka mo ho.
43 Hwɛ, Amalekfo ne Kanaanfo wɔ mo anim,+ na mobɛtotɔ nkrante ano efisɛ moasan afi Yehowa akyi, na Yehowa nso renni mo akyi bio.”+
44 Nanso wosii wɔn bo sɛ wɔbɛforo akɔ bepɔw no so,+ na Yehowa apam adaka no ne Mose amfi nsraban no mu ankɔ.+
45 Na Amalekfo+ ne Kanaanfo a wɔte bepɔw no so no bɛtow hyɛɛ wɔn so kunkum wɔn, na wɔbɔɔ wɔn a wɔaka no hwete kɔɔ Horma+ tɔnn.
