Numeri 3:1-51
3 Eyinom ne Mose ne Aaron mmusua,* da a Yehowa ne Mose kasae wɔ Bepɔw Sinai+ so no.
2 Aaron mma din ni: Nadab, a ɔyɛ ne ba panyin, ne Abihu,+ Eleasar,+ ne Itamar.+
3 Eyinom ne Aaron mma a wɔsraa wɔn yɛɛ wɔn asɔfo maa wɔn tumi* sɛ wɔnyɛ asɔfodwuma+ no.
4 Nanso Nadab ne Abihu wui wɔ Yehowa anim bere a wɔde ogya foforo bi a Yehowa mmaa ho kwan+ bɔɔ afɔre wɔ Sinai sare so no, na wɔannya mma. Eleasar+ ne Itamar+ kaa wɔn papa Aaron ho yɛɛ asɔfodwuma no.
5 Afei Yehowa ka kyerɛɛ Mose sɛ:
6 “Fa Lewi abusuakuw+ no begyina ɔsɔfo Aaron anim na wɔnsom+ no.
7 Ma wɔnyɛ adwuma mma ɔno ne asafo no nyinaa wɔ ahyiae ntamadan no anim, ntamadan no ho adwuma nyinaa.
8 Wɔnhwɛ ahyiae ntamadan no mu nneɛma nyinaa+ so, na wɔnyɛ ntamadan+ no ho adwuma mma Israelfo.
9 Fa Lewifo no ma Aaron ne ne mma. Wɔn de, wɔayi wɔn afi Israelfo mu de wɔn ama no+ koraa.
10 Na yi Aaron ne ne mma ma wɔnyɛ asɔfodwuma,+ na onipahunu biara a ɔbɛbɛn hɔ no wonkum no.”+
11 Yehowa toaa so ka kyerɛɛ Mose sɛ:
12 “Hwɛ, mayi Lewifo afi Israelfo mu sɛ wonsi Israelfo mmakan a wobue yafunu ano nyinaa ananmu.+ Na Lewifo bɛyɛ me dea.
13 Hwɛ, abakan biara yɛ me dea.+ Da a mikum Egypt asase so mmakan+ nyinaa no, mihyiraa mmakan a wɔwɔ Israel nyinaa so fae, nnipa ne mmoa nyinaa.+ Enti wɔyɛ me dea. Mene Yehowa.”
14 Yehowa toaa so ka kyerɛɛ Mose wɔ Sinai+ sare so sɛ:
15 “Kan Lewifo ne wɔn mmusua ne wɔn agyanom fie mmarima a wɔadi fi ɔsram biako nyinaa.”+
16 Mose tiei na ofii ase kan wɔn sɛnea Yehowa hyɛe no.
17 Lewi mma+ no din ni: Gerson ne Kohat ne Merari.+
18 Gerson mma a wɔn din da wɔn mmusua so ni: Libni ne Simei.+
19 Kohat mma+ a wɔn din da wɔn mmusua so ne Amram, Yisar,+ Hebron, ne Usiel.
20 Merari mma+ a wɔn din da wɔn mmusua so ne Mahli+ ne Musi.+
Eyinom ne Lewifo mmusua a wɔwɔ wɔn agyanom fie.
21 Wɔn a wɔwɔ Gerson fie ne Libni+ abusua ne Simei+ abusua. Eyinom ne mmusua a wɔwɔ Gerson fie.
22 Wɔkan mmarima a wɔwɔ hɔ a wɔadi fi ɔsram biako nyinaa.+ Na wɔn nyinaa ano si mpemnson ne ahanum.+
23 Na Gerson abusua no wɔ ntamadan no akyi.+ Wɔde wɔn tenaa atɔe fam.
24 Ɔpanyin a ɔda Gerson abusua no ano ne Lael ba Eliasaf.
25 Na Gersonfo+ no bɛhwɛ eyinom so wɔ ahyiae ntamadan no mu: kronkronbea no ne ntamadan+ no ne ne nkataso+ ne ntama a ɛsɛn+ ahyiae ntamadan no ano,
26 ne adiwo no ho ntama,+ ne ntama a ɛsɛn+ adiwo no kwan ano, baabi a wɔfa ba ntamadan no mu ne afɔremuka no ho, ne ɛho nhama+ ne nneɛma a ɛwɔ hɔ nyinaa.
27 Wɔn a wɔwɔ Kohat fie ne Amram abusua ne Yisar abusua ne Hebron abusua ne Usiel abusua. Eyinom ne mmusua a wɔwɔ Kohat fie.+
28 Wɔkan wɔn no, na mmarima a wɔadi fi ɔsram biako no ano si mpemnwɔtwe ne ahansia a kronkronbea hɔ dwumadi hyɛ wɔn nsa.+
29 Wɔde Kohat mma mmusua tenaa ntamadan no fã a ɛkyerɛ anafo.+
30 Na ɔpanyin a ɔda Kohat abusua no ano ne Usiel+ ba Elisafan.
31 Wɔn adwuma+ ne sɛ wɔbɛhwɛ Adaka+ no ne pon+ no ne kaneadua+ no ne afɔremuka+ ne kronkronbea hɔ nneɛma+ a wɔde bɛsom ne ntwamutam+ no ne ɛho dwumadi nyinaa so.
32 Na Lewi abusuakuw no mpanyimfo mu otitiriw ne ɔsɔfo Aaron ba Eleasar.+ Ɔno na na ɔhwɛ kronkronbea hɔ adwumayɛfo nyinaa so.
33 Wɔn a wɔwɔ Merari fie ne Mahli abusua+ ne Musi abusua.+ Eyinom ne mmusua a wɔwɔ Merari fie.+
34 Wɔkan wɔn no, na mmarima a wɔadi fi ɔsram biako no ano si mpemnsia ne ahanu.+
35 Ɔpanyin a ɔda Merari abusua no ano ne Abihail ba Suriel. Wɔde wɔn tenaa ntamadan no fã a ɛkyerɛ atifi no.+
36 Na Merari abusua no hwɛ ntamadan no nnua+ ne nea ɛbeabea mu+ ne adum+ ne ne nnyinaso ne ɛhɔ nneɛma nyinaa+ ne ɛho adwuma nyinaa+ so.
37 Afei na wɔhwɛ adum+ a atwa adiwo no ho ahyia ne ne nnyinaso+ ne ɛho mpɛɛwa ne nhama so.
38 Afei Mose ne Aaron ne ne mma tenaa ahyiae ntamadan no anim, kyerɛ sɛ kronkronbea no anim. Na ɛyɛ ntamadan no fã a ɛkyerɛ apuei, baabi a owia pue fi. Wɔn na na wɔhwɛ kronkronbea hɔ dwumadi so+ ma Israelfo. Onipahunu biara bɛn hɔ a, na wobekum no.+
39 Lewifo mmarima a wɔadi fi ɔsram biako a Yehowa maa Mose ne Aaron kan wɔn mmusua mmusua no nyinaa ano si mpem aduonu abien.
40 Afei Yehowa ka kyerɛɛ Mose sɛ: “Kyerɛw Israelfo mmarima a wɔyɛ mmakan a wɔadi fi ɔsram biako nyinaa+ din na bu wɔn dodow ano.
41 Afei fa Lewifo no ma me—mene Yehowa—na memfa wɔn nsi Israelfo mmakan nyinaa ananmu.+ Na Lewifo mmoa nsi Israelfo mmoa mmakan nyinaa ananmu.”+
42 Na Mose fii ase kan Israelfo mmakan nyinaa sɛnea Yehowa hyɛɛ no no.
43 Owiei no, na mmakan a wɔyɛ mmarima a wɔadi fi ɔsram biako no nyinaa ano si mpem aduonu abien, ahanu aduɔson abiɛsa.
44 Yehowa toaa so ka kyerɛɛ Mose sɛ:
45 “Fa Lewifo no si Israelfo mmakan nyinaa ananmu, na Lewifo mmoa nsi wɔn mmoa ananmu; na Lewifo no nyɛ me dea.+ Mene Yehowa.
46 Na Israelfo mmakan ahanu aduɔson abiɛsa a wɔboro Lewifo no so+ no de, wobetua wɔn ho agyede.+
47 Enti gye onipa biako biara ti so nnwetɛbona anum.+ Susuw no sɛnea wobu dwetɛbona ano wɔ kronkronbea hɔ no. Dwetɛbona biara yɛ gerah aduonu.+
48 Na fa sika no ma Aaron ne ne mma sɛ wɔn a wɔboro wɔn so no ho agyede.”
49 Enti Mose gyee sika no fii wɔn a wɔboro so no hɔ, efisɛ na wɔboro agyede a Lewifo tuae no so.
50 Ogyee sika no fii Israelfo mmakan hɔ, na onyaa nnwetɛbona apem ahasa aduosia anum, sɛnea wobu dwetɛbona ano wɔ kronkronbea hɔ no.
51 Na Mose de sika no maa Aaron ne ne mma sɛnea Yehowa hyɛe sɛ ɔnyɛ no. Mose yɛɛ nea Yehowa kae no pɛpɛɛpɛ.
