Sakaria 8:1-23
8 Na asafo Yehowa toaa so kae sɛ:
2 “Nea asafo Yehowa+ aka ni, ‘Mede anibere kɛse bɛtwe Sion ho ninkunu;+ mede abufuw+ kɛse bɛtwe ne ho ninkunu.’”
3 “Nea Yehowa aka ni, ‘Mɛsan aba Sion+ na matena Yerusalem;+ na wɔbɛfrɛ Yerusalem sɛ nokware kurow,+ na wɔafrɛ asafo Yehowa bepɔw+ no bepɔw kronkron.’”+
4 “Nea asafo Yehowa aka ni, ‘Nkwakoraa ne mmerewa bɛkɔ so atenatena Yerusalem mmɔnten so+ a onyinkyɛ nti wɔn mu biara kura ne poma.+
5 Na mmarimaa ne mmeawa bɛhyɛ kurow no mmɔnten so mã adi agoru.’”+
6 “Nea asafo Yehowa aka ni, ‘Sɛ ɛbɛyɛ den wɔ nnipa a aka no ani so saa bere no a, me nso ɛbɛyɛ den wɔ m’ani so anaa?’+ Asafo Yehowa asɛm ni.”
7 “Nea asafo Yehowa aka ni, ‘Hwɛ, megye me man afi owiapuei ne owiatɔe asase so.+
8 Na mede wɔn bɛba abɛtena Yerusalem;+ na wɔbɛyɛ me man+ na mayɛ wɔn Nyankopɔn, nokware ne trenee mu.’”+
9 “Nea asafo Yehowa aka ni, ‘Monyere mo nsam denneennen,+ mo a nna yi moate nsɛm yi afi adiyifo+ no anom, da a wɔtoo asafo Yehowa fie fapem sɛ wɔresi asɔrefie no.+
10 Ansa na saa bere no reba no, na akatua biara nni hɔ mma adesamma,+ na na akatua biara nni hɔ mma mmoa nso; na ɔtamfo nti, na nea ɔrekɔ ne nea ɔreba nni asomdwoe,+ na memaa nnipa nyinaa ne wɔn ho dii asi.’+
11 “‘Afei merenyɛ nnipa a aka yi sɛnea meyɛe kan no bio,’+ asafo Yehowa asɛm ni.
12 ‘Wobedua asomdwoe aba+ na bobe asow n’aba,+ na asase bɛma ne nnɔbae+ na ɔsoro ama ne bosu.+ Na mede eyinom+ nyinaa bɛma nnipa a aka no.+
13 O Yuda ne Israel fie,+ sɛnea moyɛɛ nnome wɔ amanaman mu no,+ saa ara na me nso megye mo na moabɛyɛ nhyira.+ Munnsuro,+ na mmom monyere mo nsam denneennen.’+
14 “Nea asafo Yehowa aka ni, ‘“Sɛnea mo agyanom hyɛɛ me abufuw na meyɛɛ m’adwene sɛ mɛyɛ mo bɔne+ na mannu me ho no,”+ asafo Yehowa asɛm ni,
15 “saa ara na saa bere yi nso mayɛ m’adwene sɛ me ne Yerusalem ne Yuda fie bedi no yiye.+ Enti munnsuro.”’+
16 “‘Nea monyɛ ni:+ Obiara nka nokware nkyerɛ ne yɔnko.+ Na momfa nokware ne asomdwoe mmu atɛn wɔ mo kurow apon ano.+
17 Mommmɔ mo yɔnko ho pɔw bɔne wɔ mo komam,+ na mommma mo ani nnnye ntanhunu+ ho, efisɛ metan eyinom nyinaa,’+ Yehowa asɛm ni.”
18 Na asafo Yehowa ka kyerɛɛ me sɛ:
19 “Nea asafo Yehowa aka ni, ‘Mmuada a wodi no ɔsram a ɛto so anan,+ ɔsram a ɛto so anum,+ ɔsram a ɛto so ason,+ ne ɔsram a ɛto so du+ mu nyinaa bɛyɛ ahurusidi ne anigye bere ne afahyɛ pa ama Yuda fie.+ Enti monnɔ nokware ne asomdwoe.’+
20 “Nea asafo Yehowa aka ni, ‘Aman ne nkurow pii mufo bɛba;+
21 na kurow biako mu nnipa bɛkɔ kurow foforo mu akɔka sɛ: “Momma yɛnkɔ+ nkɔkotow nsrɛ+ Yehowa na yɛnhwehwɛ asafo Yehowa akyi kwan. Me nso mɛkɔ.”+
22 Na amanaman mu nnipa ne aman akɛse bɛba abɛhwehwɛ asafo Yehowa akyi kwan wɔ Yerusalem+ na wɔakotow asrɛ Yehowa.’
23 “Nea asafo Yehowa aka ni, ‘Saa bere no, nnipa du a wɔka amanaman+ no kasa horow nyinaa bɛba abesuso+ Yudani+ biako atade mu aka sɛ: “Yɛne mo bɛkɔ,+ na yɛate sɛ Onyankopɔn ka mo ho.”’”+
