Solomon Dwom 2:1-17
2 “Me de, meyɛ nhwiren+ a misi mpoano tataw+ so, sukooko a misi bon mu.”+
2 “Sɛnea sukooko te wɔ nsɔe mu no, saa ara na me komam hemmaa te wɔ mmabaa mu.”+
3 “Sɛnea aprɛ+ te wɔ kwaem nnua mu no, saa ara na me dɔfo te wɔ mmerante mu.+ Ne nwini ase na m’ani gyina, na ɛhɔ na metenae. Na n’aba yɛ me dodom dɛ.
4 Ɔde me aba nsã dan mu,+ na ohim ne dɔ+ wɔ me so sɛ frankaa.+
5 Momfa bobe tetare+ nnwudwo me koma, na momfa aprɛ nwowaw me, efisɛ ne dɔ ho anigyina abɔ me yare.+
6 Ne nsa benkum hyɛ me ti ase, na ɔde ne nsa nifa abam me.+
7 Yerusalem mmabea, mede ɔwansanbere+ ne wuram ɔforotebere+ ka ntam+ sɛ monnkanyan ɔdɔ wɔ me mu kosi sɛ ne bere bɛso.+
8 “Mete sɛ obi reba te sɛ me dɔfo!+ Hwɛ, ɔreba!+ Ɔforo mmepɔw na ohuruw tra nkoko.
9 Me dɔfo te sɛ ɔwansan+ anaa ɔforote ba. Hwɛ, ogyina yɛn dan akyi hwɛ mfɛnsere mu, ɔto n’ani fa ntokuwa mu.+
10 Me dɔfo bua see me sɛ: ‘Me komam hemmaa hoɔfɛfo,+ sɔre bra ɛ.+
11 Hwɛ, asusowbere+ atwam, osu atɔ atew koraa.
12 Nhwiren apae asase so baabiara,+ bere adu sɛ wotwitwa bobe ho,+ na wɔte aburuburuw+ su wɔ yɛn asase so.
13 Borɔdɔma+ aba a edi kan+ agyigye wɔ ne dua so; bobe agu nhwiren na eyi hua. Me komam hemmaa+ hoɔfɛfo, sɔre bra ɛ.
14 O m’aborɔnoma+ a wowɔ ɔbotan mu, bepɔw nkyɛn ahintawee, dannan wo ho ma menhwɛ ɛ,+ na wo ho yɛ me fɛ.+ Ma mente wo nne ɛ, na wo nne yɛ me dɛ.’”
15 “Monkyere sakraman+ no mma yɛn, sakraman nkumaa a wɔresɛe yɛn bobeturo no, efisɛ yɛn bobe no agu nhwiren.”+
16 “Me dɔfo wɔ hɔ ma me, na me nso mewɔ hɔ ma no.+ Ɔhwɛ ne nguan+ wɔ sukooko mu.+
17 Me dɔfo, dan wo ho hwɛ me kosi sɛ mframa bɛbɔ brɛoo na sunsuma ayera; yɛ sɛ ɔwansan+ anaa ɔforote mma a wɔwɔ mpaapaemu mmepɔw so.
