Yeremia 19:1-15
19 Nea Yehowa kae ni: “Kɔ na kɔfa ɔnwemfo+ ahina, na fa ɔman no mu mpanyimfo ne asɔfo mu mpanyimfo no bi ka wo ho,
2 na fi adi kɔ Hinom ba bon+ a ɛwɔ Anwemfo Pon ano no mu. Ɛhɔ na ka nsɛm a mɛka akyerɛ wo no.+
3 Ka sɛ, ‘Muntie Yehowa asɛm, Yuda ahene ne Yerusalemfo.+ Nea asafo Yehowa,+ Israel Nyankopɔn no aka ni:
“‘“Hwɛ, mede mmusu reba ha, na obiara a ɔbɛte no, n’asom bɛyɛ no yɔnn,+
4 efisɛ wɔagyaw me,+ na wɔasẽsa ha yi koraa;+ wɔakɔhyew afɔrebɔde ama anyame foforo a wonnim wɔn,+ wɔne wɔn agyanom ne Yuda ahene, na wɔde wɔn a wodi bem mogya ahyɛ ha ma.+
5 Wɔasisi Baal sorɔnsorɔmmea sɛ wɔde ogya bɛhyew wɔn mma de abobɔ ɔhyew afɔre ama Baal,+ nanso menhyɛɛ wɔn saa na menkaa hwee nkyerɛɛ wɔn,+ na ɛmmaa me komam da.”’+
6 “‘“Ɛno nti, hwɛ,” Yehowa asɛm ni, “nna bi reba a wɔremfrɛ ha yi sɛ Tofet,+ anaa Hinom ba bon+ bio, na mmom wɔbɛfrɛ no okum bon.
7 Na mɛma Yuda ne Yerusalem agyinatu ayɛ ɔkwa ɛha yi,+ na mɛma wɔatotɔ nkrante ano, wɔn atamfo anim ne wɔn a wɔhwehwɛ wɔn kra no nsam.+ Na mede wɔn afunu bɛyɛ aduan ama wim nnomaa ne asase so mmoa.+
8 Obiara a obehu kurow yi no, ne ho bedwiriw no, na ɔbɛbɔ hwirema.+ Obiara a obetwam ha no, mmusu no nti, ɔde ahodwiriw bɛhwɛ na wabɔ hwirema.+
9 Mɛma wɔadi wɔn mmabarima nam ne wɔn mmabea nam, na obiara bedi ne yɔnko nam, ahokyere ne ahohia a wɔn atamfo ne wɔn a wɔhwehwɛ wɔn kra de beguan wɔn ho nti.”’+
10 “Afei bɔ ahina no wɔ mmarima a wo ne wɔn kɔe no anim.
11 Na ka kyerɛ wɔn sɛ, ‘Nea asafo Yehowa aka ni: “Sɛnea wɔbɔ ɔnwemfo anwenne a wontumi nyɛ no yiye bio no,+ saa ara na mɛbɔ ɔman yi ne kurow yi, na wobesie wɔn Tofet+ kosi sɛ wɔrennya baabi nsie wɔn bio.”’+
12 “‘Saa na mɛyɛ ɛha yi ne wɔn a wɔtete ha,’ Yehowa asɛm ni, ‘na mɛyɛ kurow yi sɛ Tofet.+
13 Na Yerusalem afie ne Yuda ahene afie a ɛho agu fĩ no, kyerɛ sɛ, afie a ɛwowɔ adan atifi a wɔhyew afɔrebɔde wɔ hɔ ma ɔsoro asafo+ nyinaa a wohwie afɔrebɔ nsã wɔ hɔ ma anyame foforo+ no, ne nyinaa bɛyɛ sɛ Tofet.’”+
14 Ɛnna Yeremia fi Tofet,+ beae a Yehowa somaa no sɛ ɔnkɔhyɛ nkɔm no, bae, na obegyinaa Yehowa fie adiwo, na ɔka kyerɛɛ ɔman no nyinaa sɛ:+
15 “Nea asafo Yehowa, Israel Nyankopɔn no aka ni, ‘Hwɛ, mede mmusu a maka atia kurow yi nyinaa reba kurow yi ne ɛho nkurow nyinaa so, efisɛ wɔasen wɔn kɔn sɛ wɔrentie m’asɛm.’”+
