Yeremia 23:1-40
23 “Nguanhwɛfo a wɔsɛe m’adidibea nguan bɔ wɔn hwete no nnue!”+ Yehowa asɛm ni.
2 Enti nea Yehowa, Israel Nyankopɔn no aka atia ahwɛfo a wɔhwɛ me man no ni: “Mo na moabɔ me nguankuw ahwete, moapansam wɔn, na moanhwɛ wɔn.”+
“Hwɛ, meredan m’ani aba mo so, mo nneyɛe bɔne nti,”+ Yehowa asɛm ni.
3 “Na me ara mɛboaboa me nguankuw nkae ano afi nsase a mebɔɔ wɔn hwetee so no nyinaa so,+ na mɛsan de wɔn aba wɔn adidibea,+ na wɔbɛwo na wɔayɛ bebree.+
4 Na mede ahwɛfo a wɔbɛhwɛ wɔn besisi wɔn so;+ wɔrensuro bio, na ehu biara nso renka wɔn,+ na wɔn mu biara renyera,” Yehowa asɛm ni.
5 “Hwɛ, nna bi reba,” Yehowa asɛm ni, “na mɛma trenee duforo bi so ama Dawid.+ Ɔhene bi bedi hene,+ na ɔde nyansa bɛyɛ ade na wabu atɛntrenee ayɛ adetrenee asase no so.+
6 Ne nna mu no, wobegye Yuda,+ na Israel bɛtena ase dwoodwoo.+ Edin a wɔde bɛfrɛ no ne, Yehowa Ne Yɛn Trenee.”+
7 “Ɛno nti hwɛ, nna bi reba,” Yehowa asɛm ni, “na wɔrenka bio sɛ, ‘Sɛ́ Yehowa a oyii Israel fii Egypt asase so bae no te ase yi,’+
8 na mmom wɔbɛka sɛ, ‘Sɛ́ Yehowa a oyii Israel fie asefo fii atifi fam asase so ne nsase a mebɔɔ wɔn hwetee so nyinaa so bae no te ase yi,’ na wɔbɛtena wɔn ankasa asase so.”+
9 Me koma abubu wɔ me mu, adiyifo no ho. Me nnompe nyinaa rewosow. Yehowa ne ne nsɛm kronkron nti, mayɛ sɛ ɔbarima a wabow,+ ɔbarima a nsa abow no.
10 Awaresɛefo+ na wɔahyɛ asase no so ma.+ Nnome no nti, asase no redi awerɛhow,+ sare so adidibea akisa;+ wɔn nneyɛe yɛ bɔne, na wɔn tumidi nteɛ.
11 “Odiyifo ne ɔsɔfo mpo ho agu fĩ.+ Mahu wɔn bɔne no wɔ me fie+ nso,” Yehowa asɛm ni.
12 “Ɛno nti wɔn kwan bɛyɛ sɛ ɔkwan torotoro wɔ esum kabii mu,+ na ɛso na wobepiapia wɔn ma wɔahwehwe ase.”+
“Na mede mmusu bɛba wɔn so, wɔn akontaabu afe no,”+ Yehowa asɛm ni.
13 “Mahu ade a ɛnteɛ wɔ Samaria+ adiyifo mu. Wɔyɛ adiyifo a wɔkasa ma Baal,+ na wɔma me man Israel de wɔn ti pempem.+
14 Na mahu ahodwiriwde+ wɔ Yerusalem adiyifo mu. Wɔsɛe aware,+ na wɔnantew nkontompo mu;+ wɔhyɛ abɔnefo nsam den, nea ɛbɛyɛ na wɔn mu biara rensan+ mfi ne bɔne ho. M’ani so no, wɔn nyinaa ayɛ sɛ Sodom,+ na wɔn a wɔtete hɔ no ayɛ sɛ Gomora.”+
15 Enti nea asafo Yehowa aka wɔ adiyifo no ho ni: “Mɛma wɔn awɔnwene adi, na mama wɔn awuduru nsu anom,+ efisɛ Yerusalem adiyifo mu na ɔwae+ afi kɔ asase no nyinaa so.”
16 Nea asafo Yehowa aka ni: “Munntie adiyifo a wɔhyɛ nkɔm kyerɛ mo no nsɛm.+ Wɔrema moadan ahuhude.+ Wɔn koma so anisoadehu na wɔka,+ emfi Yehowa anom.+
17 Ka ara na wɔka kyerɛ wɔn a wommu me no sɛ, ‘Yehowa aka sɛ: “Asomdwoe na mubenya.”’+ Na obiara a odi n’atuatew koma akyi no nso,+ wɔka kyerɛ no sɛ, ‘Mmusu biara remma mo so.’+
18 Hena na ɔne Yehowa anya ayɔnkofa+ ahu n’asɛm na wate?+ Hena na wawɛn n’aso na wate n’asɛm?+
19 Hwɛ! Yehowa ahum, n’abufuw no, betu, mframa a edi kyinhyia no.+ Ebetwa ne ho wɔ abɔnefo atifi.+
20 Yehowa abufuw rensan kosi sɛ ɔbɛyɛ+ ne komam nsusuwii na wama aba mu.+ Awiei nna no mu no, mode mo adwene bɛkɔ so na moate ase.+
21 “Mansoma adiyifo no, wɔn ankasa na wotutuu mmirika. Manka hwee ankyerɛ wɔn, wɔn ankasa na wɔhyehyɛɛ nkɔm.+
22 Sɛ wɔne me nyaa ayɔnkofa+ a, anka wɔbɛma me man ate me nsɛm, na wɔbɛma wɔasan afi wɔn kwammɔne ne wɔn nneyɛe bɔne no ho.”+
23 “So menyɛ Onyankopɔn a ɔbɛn,” Yehowa asɛm ni, “na menyɛ Onyankopɔn a ɔwɔ akyirikyiri+ nso?”
24 “Anaa obi betumi ahintaw hintabea a merenhu no?”+ Yehowa asɛm ni.
“So menhyɛɛ ɔsoro ne asase nyinaa mã?”+ Yehowa asɛm ni.
25 “Mate nea adiyifo a wɔhyɛ nkɔntoro wɔ me din+ mu no keka no sɛ, ‘Maso dae! Maso dae!’+
26 Adiyifo a wɔhyɛ nkɔntoro ne adiyifo a wɔka wɔn komam nnaadaasɛm+ no, ɛbɛtena wɔn komam akosi da bɛn?
27 Wodwen sɛnea wɔde wɔn adae a wɔkeka kyerɛ wɔn ho+ no bɛma me man werɛ afi me din sɛnea Baal+ nti wɔn agyanom werɛ fii me din no.
28 Odiyifo a ɔsõ dae no, ma ɔnka dae no, na nea m’asɛm wɔ ne nkyɛn no, ma ɔnka m’asɛm no nokwarem.”+
“Dɛn na ntɛtɛwa ne awi wɔ yɛ?”+ Yehowa asɛm ni.
29 “So m’asɛm nte sɛ ogya,”+ Yehowa asɛm ni, “ɛnte sɛ asae a ebubu ɔbotan pasaa?”+
30 “Enti me ne adiyifo no anya,”+ Yehowa asɛm ni, “wɔn a wowia me nsɛm fi wɔn yɔnko hɔ no.”+
31 “Hwɛ, me ne adiyifo no anya,” Yehowa asɛm ni, “wɔn a wɔde wɔn tɛkrɛma keka sɛ, ‘N’anom asɛm ni!’ no.”+
32 “Hwɛ, me ne adiyifo a wɔsosõ atoro adae no anya,” Yehowa asɛm ni, “wɔn a wɔkeka adae, a wɔn nkontompo+ ne wɔn ahohoahoa+ nti, wɔma me man de wɔn ti pempem no.”
“Nanso mansoma wɔn, na manhyɛ wɔn. Ɛno nti wɔremfa mfaso biara mmrɛ ɔman yi,”+ Yehowa asɛm ni.
33 “Na sɛ ɔman yi anaa odiyifo anaa ɔsɔfo bisa wo sɛ, ‘Yehowa asɛm a emu yɛ duru bɛn na ɛwɔ hɔ?’ a,+ wo nso ka kyerɛ wɔn sɛ, ‘“Mo nkurɔfo yi, moyɛ adesoa a emu yɛ duru yiye!+ Na mɛpo mo,”+ Yehowa asɛm ni.’
34 Na odiyifo anaa ɔsɔfo anaa ɔman yi muni a ɔka sɛ, ‘Yehowa asɛm a emu yɛ duru!’ no, me nso mede m’ani besi onii no so, ɔne ne fie.+
35 Mo nyinaa, nea obiara ka kyerɛ ne yɔnko ne ne nua ne sɛ, ‘Dɛn na Yehowa abua? Na dɛn na Yehowa aka?’+
36 Nanso Yehowa asɛm a emu yɛ duru no,+ munnyae ka,+ efisɛ asɛm a emu yɛ duru no adan mo ara mo anom asɛm,+ na Onyankopɔn teasefo no,+ asafo Yehowa, yɛn Nyankopɔn nsɛm no, moasesa no.
37 “Nea ka kyerɛ saa odiyifo no ne sɛ, ‘Dɛn na Yehowa abua wo? Na dɛn na Yehowa aka?+
38 Na sɛ mokɔ so ka sɛ “Yehowa asɛm a emu yɛ duru!” a, ɛnde nea Yehowa aka ni: “Esiane sɛ moka sɛ, ‘Yehowa asɛm a emu yɛ duru no ni,’ bere a mesoma baa mo nkyɛn mpɛn pii sɛ, ‘Monnka sɛ: “Yehowa asɛm a emu yɛ duru ni!” nti,’
39 hwɛ! Merebegyae mo asɛm ama mo koraa,+ na mapo mo ne kurow a mede maa mo ne mo agyanom no wɔ m’anim.+
40 Na mede daa ahohora bɛba mo so na mama animguase aka mo daa, na werɛ remfi da.”’”+
