Yeremia 31:1-40
31 “Saa bere no,” Yehowa asɛm ni, “mɛyɛ Israel mmusua nyinaa Nyankopɔn na wɔn nso ayɛ me man.”+
2 Nea Yehowa aka ni: “Nnipa a wofi nkrante ano fii no, wonyaa adom wɔ sare so+ bere a Israel nam kwan so rekɔhome no.”+
3 Yehowa yii ne ho adi kyerɛɛ me akyirikyiri, na ɔkae sɛ: “Ɔdɔ a enni awiei na mede adɔ wo.+ Ɛno nti na mede adɔe atwe wo no.+
4 Mɛma wo so asi hɔ bio ama woagyina bio,+ O Israel baabun. Wubekurakura wo mpintin, na woasaw sɛ wɔn a wɔresereserew.+
5 Wobɛyeyɛ bobe nturo bio Samaria mmepɔw so.+ Adwumayɛfo no bedua na wɔadi so aba.+
6 Ɛda bi wɔ hɔ a awɛmfo bɛteɛm Efraim mmepɔw so sɛ, ‘Monsɔre mma yɛmforo nkɔ Sion, na yɛnkɔ Yehowa, yɛn Nyankopɔn no nkyɛn.’”+
7 Nea Yehowa aka ni: “Momfa ahurusi nteɛm Yakob ho, na mommɔ nnye so wɔ amanaman+ no ti. Mommɔ no dawuru.+ Munyi ayɛ na monka sɛ, ‘O Yehowa, gye wo man Israel nkae+ no.’
8 Hwɛ, mede wɔn befi atifi fam+ asase so aba, na mɛboaboa wɔn ano afi asase ano nohoa.+ Wɔn mu anifuraefo ne mmubuafo ne apemfo ne wɔn a awo aka wɔn no, mɛboaboa wɔn nyinaa ano.+ Asafo kɛse na wɔbɛsan aba ha.+
9 Osũ na wɔde bɛba,+ na wɔn nkotɔsrɛ mu na mede wɔn bɛba. Mɛma wɔafa ɔkwan tẽẽ so akɔ asuten ho,+ na wɔrenhintiw wɔ so. Meyɛ Israel Agya,+ na Efraim yɛ m’abakan.”+
10 Amanaman, muntie Yehowa asɛm, na monka wɔ nsuano aman a ɛwɔ akyirikyiri+ no so sɛ: “Nea ɔbɔɔ Israel hwetee no, ɔno ara bɛboaboa wɔn ano,+ na ɔbɛhwɛ wɔn sɛnea oguanhwɛfo yɛ ne nguankuw.+
11 Ogye na Yehowa begye Yakob,+ na wayi no afi nea ne ho yɛ den sen no no nsam.+
12 Na wɔbɛba abɛto ahurusi dwom Sion bepɔw so+ na wɔabɔ ose Yehowa papayɛ ho,+ awi ne nsã+ foforo ne ngo ne nguammaa ne anantwi+ ho. Wɔn akra bɛyɛ sɛ turo a enya nsu pii,+ na wɔrentotɔ piti bio.”+
13 “Saa bere no, mmaabun bedi ahurusi wɔ asaw mu, na mmerante ne nkwakoraa nso bɛbom anya anigye.+ Mɛma wɔn awerɛhow adan ahurusi, na mɛkyekye wɔn werɛ na mama wɔadi ahurusi afi wɔn awerɛhow no mu.+
14 Na mɛma srade amee asɔfo no kra,+ na me papayɛ bɛma me man amee,”+ Yehowa asɛm ni.
15 “Nea Yehowa aka ni, ‘Wɔte nne bi wɔ Rama,+ agyaadwo ne osu yawyaw;+ ɛyɛ Rahel+ na ɔresu ne mma.+ Wɔkyekye ne werɛ ne mma ho a, ontie,+ efisɛ wonni hɔ bio.’”+
16 Nea Yehowa aka ni: “‘Sianka wo nne na woansu, ne w’aniwa na ansen nusu,+ na w’adwuma so akatua wɔ hɔ,’ Yehowa asɛm ni, ‘na wɔbɛsan afi ɔtamfo asase no so aba.’+
17 “‘Anidaso+ wɔ hɔ ma wo daakye,’ Yehowa asɛm ni, ‘na wo mma no bɛsan aba wɔn asase so bio.’”+
18 “Mate sɛ Efraim redi awerɛhow sɛ,+ ‘Wateɛ me so sɛ nantwi ba a wɔntetee no,+ na mateɛ.+ Ma mensan mmra wo nkyɛn, na mɛsan aba ntɛm,+ efisɛ wone Yehowa me Nyankopɔn.+
19 Bere a mesan m’akyi no, ɛyɛɛ me yaw,+ na bere a wɔma mihui no, mebɔɔ me srɛ ho.+ Mefɛree, na m’ani wui,+ efisɛ mesoaa me mmeranteberem ahohora.’”+
20 “So Efraim yɛ ɔba a ɔsom bo ma me, anaa ɔba a mepɛ n’asɛm yiye?+ Dodow a mekasa tia no no, dodow no ara na mɛkae no.+ Ɛno nti na me nsono mu twitwa me ne ho no.+ Hu ara na mehu no mmɔbɔ,”+ Yehowa asɛm ni.
21 “Sisi abo hyɛ ɔkwan no nsow fa. Sisi ɔkwan so ahyɛnsode fa.+ Fa wo koma si ɔkwantempɔn no so, ɔkwan a wobɛfa so no.+ San bra, O Israel ɔbaabun. San bra wo nkurow yi mu.+
22 Ɔbabea okontomponi,+ wobɛkɔ ha akɔ ha akosi da bɛn?+ Yehowa abɔ ade foforo asase so: Ɔbea na ɔbɛkyekyere ɔbarima.”
23 Nea asafo Yehowa, Israel Nyankopɔn no aka ni: “Sɛ meboaboa wɔn atukɔfo no ano a, wɔbɛsan aka asɛm yi bio wɔ Yuda asase ne ne nkurow mu sɛ, ‘O trenee tenabea,+ bepɔw kronkron,+ Yehowa nhyira wo.’+
24 Emu na Yuda ne ne nkurow nyinaa bɛbom atena, akuafo ne wɔn a wɔne nguankuw kyinkyin.+
25 Mɛma ɔkra a wabrɛ ahome, na mahyɛ ɔkra biara a watɔ piti mã.”+
26 Eyi so na minyanee, na mihui; me nna yɛɛ me dɛ.
27 “Hwɛ! Nna bi reba,” Yehowa asɛm ni, “na megu nnipa ne afieboa sɛ aba wɔ Israel fie ne Yuda fie.”+
28 “Na sɛnea mede m’ani sii wɔn so+ sɛ metutu wɔn ase na madwiriw wɔn agu abubu wɔn na masɛe wɔn ayɛ wɔn bɔne+ no, saa ara na mɛma m’ani aba wɔn so na mama wɔn so asi hɔ na madua wɔn,”+ Yehowa asɛm ni.
29 “Saa bere no, wɔrenka bio sɛ, ‘Agyanom adi bobebun, na mma na wɔn sẽ afem.’+
30 Obiara bewu n’ankasa bɔne ho.+ Obiara a obedi bobebun no, ɔno ara na ne sẽ bɛfem.”
31 “Hwɛ! Nna bi reba,” Yehowa asɛm ni, “na me ne Israel+ fie ne Yuda+ fie bɛyɛ apam foforo;+
32 ɛnte sɛ apam a me ne wɔn agyanom yɛe da a misusoo wɔn nsa yii wɔn fii Egypt asase so,+ ‘a wɔn de, wobuu m’apam so+ bere a meyɛ wɔn wura+ no,’ Yehowa asɛm ni.”
33 “Eyi ne apam+ a me ne Israel fie bɛyɛ wɔ nna no akyi,”+ Yehowa asɛm ni. “Mede me mmara bɛhyɛ wɔn mu+ na makyerɛw wɔ wɔn komam.+ Na mɛyɛ wɔn Nyankopɔn na wɔn nso ayɛ me man.”+
34 “Na obi renkyerɛ ne yɔnko ne ne nua bio+ sɛ, ‘Munhu Yehowa!’+ Efisɛ wɔn nyinaa behu me, efi akumaa so kosi ɔkɛse so,”+ Yehowa asɛm ni. “Na mede wɔn mfomso befiri wɔn, na wɔn bɔne nso, merenkae bio.”+
35 Yehowa a ɔma owia hyerɛn awia+ na wahyehyɛ mmara+ ama ɔsram+ ne nsoromma sɛ wɔnhyerɛn anadwo,+ nea ɔkanyan po ma n’asorɔkye huru+ a ne din ne asafo Yehowa+ no, nea waka ni:
36 “‘Sɛ ahyɛde yi betumi afi m’anim a,’+ Yehowa asɛm ni, ‘ɛnde wɔn a wɔyɛ Israel asefo nso renyɛ ɔman wɔ m’anim bio.’”+
37 Nea Yehowa aka ni: “‘Sɛ obi betumi asusuw ɔsoro, na wahwehwɛ asase fapem mu a,+ ɛnde me nso mɛpo Israel asefo nyinaa, nea wɔayɛ nyinaa nti,’+ Yehowa asɛm ni.”
38 “Hwɛ! Nna bi reba,” Yehowa asɛm ni, “na wɔbɛkyekye kurow no+ ama Yehowa afi Hananel Abantenten+ ho akosi Twea Pon+ no ho.
39 Susuhama+ befi akɔ Gareb koko so tee, na adan akɔ Goa.
40 Na afunu+ ne nsõ*+ bon no ne mfuwa no nyinaa kosi Kidron subon+ mu ne Apɔnkɔ Pon+ twea so, apuei fam, bɛyɛ ade kronkron ama Yehowa.+ Wɔrentutu ase, na wɔrennwiriw ngu bio da.”+
