Yoel 2:1-32
2 “Monhyɛn abɛn wɔ Sion,+ na monhyɛn ɔko torobɛnto+ me bepɔw kronkron+ so. Momma asase sofo nyinaa mmɔ hu,+ efisɛ Yehowa da no reba,+ na abɛn!
2 Ɛyɛ esum ne kusuuyɛ da,+ omununkum ne kusukuukuu da; ɛte sɛ adekyee hann a ɛkata mmepɔw so.+
“Ɔman bi wɔ hɔ a wɔdɔɔso na wɔn ho yɛ den;+ ɛso bi mmae da fi teteete,+ na wɔn akyi nso, ebi remma bio, awo ntoatoaso akyi awo ntoatoaso mfe mu.
3 Ogya hyew+ di wɔn anim, na wɔn akyi nso, ogyaframa sɛe ade.+ Asase a ɛda wɔn anim no te sɛ Eden turo,+ na wɔn akyi de, ɛyɛ sare pradada, na biribiara mfi mu nka.
4 “Wɔn ho te sɛ apɔnkɔ ho, na wotu mmirika sɛ apɔnkɔ.+
5 Wohuruhuruw sɛnea nteaseɛnam yɛ kitikiti wɔ mmepɔw so,+ ne sɛnea ogyaframa hyew buronan+ turuturuw no. Wɔte sɛ ɔman a ɛyɛ den a wɔatwa ɔko mpasua.+
6 Wɔn nti, nkurɔfo bedi yaw pii.+ Wɔn nyinaa anim besinsiam.+
7 “Wotu mmirika sɛ ahoɔdenfo.+ Wɔforo ɔfasu sɛ mmarima a wɔkɔ ɔsa. Obiara nam ne kwan so na wɔmman mfi wɔn kwan so.+
8 Obi nsum ne yɔnko. Wɔnam wɔn kwan so tẽẽ sɛ nnɔmmarima. Sɛ wɔn mu bi tɔ akode ano mpo a, wɔn a wɔaka no mman.
9 “Wɔbɔ kirididi kɔ nkurow mu. Wotu mmirika fa afasu so. Wɔforo afie. Wɔhyɛn mfɛnsere mu sɛ akorɔmfo.
10 Asase hinhim wɔn anim, na ɔsoro wosow. Owia ne ɔsram dan sum,+ na nsoromma gyae hyerɛn.+
11 Yehowa na ɔma ne nne+ so n’asraafodɔm+ no anim, efisɛ ne dɔm no dɔɔso paa.+ Nea ɔma n’asɛm ba mu no yɛ otumfoɔ; Yehowa da+ no yɛ kɛse na ɛyɛ hu sɛ. Hena na obetumi agyina ano?”+
12 “Enti afei,” Yehowa asɛm ni, “mumfi mo koma nyinaa mu mfa mmuadadi+ ne osũ ne agyaadwotwa+ nsan mmra me nkyɛn.+
13 Munsuan mo koma mu,+ na ɛnyɛ mo ntade mu,+ na monsan mmra Yehowa mo Nyankopɔn nkyɛn, efisɛ ɔyɛ ɔdomfo ne mmɔborɔhunufo,+ ne bo kyɛ fuw+ na n’adɔe dɔɔso,+ na amanehunu no nti, obegyae mu ma aka.+
14 Hena na onim sɛ ebia ɔbɛsan, na wagyae mu ma aka+ na akyiri yi, wagyaw nhyira+ ne aduan afɔre ne afɔrebɔ nsã a wɔde bɛma Yehowa mo Nyankopɔn?
15 “Monhyɛn abɛn wɔ Sion.+ Monhyɛ bere mma mmuada+ kronkron. Monyɛ afahyɛ nhyiam titiriw.+
16 Mommoaboa ɔman no ano. Montew asafo ho.+ Mommoaboa mpanyimfo no ano. Mommoaboa mmofra ne wɔn a wonum nufu ano.+ Momma ayeforokunu mpue mfi ne pia mu na ayeforo mpue mfi n’ayeforo dan mu.
17 “Momma asɔfo no, Yehowa asomfo no nsũ wɔ abantenten no ne afɔremuka+ no ntam sɛ, ‘O Yehowa, hu wo man mmɔbɔ, na mma w’agyapade nnyɛ ahohorade,+ mma amanaman nnni wɔn so. Dɛn nti na ɛsɛ sɛ wɔka wɔ aman mu sɛ: “Wɔn Nyankopɔn no wɔ he?”’+
18 Yehowa bɛtwe n’asase ho ninkunu+ na wahu ne man mmɔbɔ.+
19 Na Yehowa bebua ne man aka akyerɛ wɔn sɛ, ‘Hwɛ, mede aduan ne bobesa foforo ne ngo rebrɛ mo, na ɛbɛmee mo;+ meremma monyɛ ahohorade bio amanaman mu.+
20 Na mɛma nea ofi atifi fam+ no afi wo ho akɔ akyirikyiri; mɛbɔ no ahwete asase a nsu nni so ne amamfõ so, na mede n’ani bɛkyerɛ apuei fam po+ na mede n’akyi akyerɛ atɔe fam po.+ Ne ho kankan bɛkɔ akodu soro,+ na ɔsoro ara na ne ho nka bɛkɔ; Onyankopɔn bɛyɛ ade kɛse.’
21 “O asase, nsuro. Ma w’ani nnye na di ahurusi, na Yehowa bɛyɛ ade kɛse.+
22 Wuram mmoa,+ munnsuro, efisɛ sare so adidibea bɛyɛ wura momono.+ Nnua bɛsow aba.+ Borɔdɔma dua ne bobe bɛsow bebree.+
23 Sion mma, momma mo ani nnye, na munni Yehowa mo Nyankopɔn mu ahurusi,+ na ɔbɛma mo asusow sɛnea ɛsɛ,+ na ɔbɛma osu atɔ ama mo ma moanya asusow ne adonsu sɛ kan no.+
24 Awi a wɔaporow bɛyɛ awiporowbea ma, na bobesa foforo ne ngo bebu so wɔ nsã-kyi-amoa mu.+
25 Na mfe dodow a mmoadabi ne hwidɔm ne ntɛfrɛw ne ɔsã, m’asraafodɔm kɛse a mesomaa wɔn baa mo mu no dii no,+ mɛhyɛ ananmu.
26 Na mubedidi; mubedidi na moamee,+ na moayi Yehowa mo Nyankopɔn din ayɛ,+ nea wayɛ anwonwade yi ama mo no;+ me man ani renwu da biara da.+
27 Mubehu sɛ mewɔ Israel mu,+ na mene Yehowa mo Nyankopɔn, na obi nni hɔ bio.+ Na me man ani renwu da biara da.
28 “Ɛno akyi no, ɛbɛba sɛ mehwie me honhom+ agu ɔhonam ahorow nyinaa so,+ na mo mmabarima ne mo mmabea+ bɛhyehyɛ nkɔm. Mo mpanyimfo nso bɛsõsõ adae. Na mo mmerante behu anisoade.
29 Mehwie me honhom agu nkoa ne mfenaa mpo so, saa nna no mu.+
30 “Na mɛma anwonwade aba soro+ na mama mogya ne ogya ne wusiw kumɔnn aba asase so.+
31 Owia bɛdan sum+ na ɔsram adan mogya+ ansa na Yehowa da kɛse a ɛyɛ hu no aba.+
32 Na ɛbɛba sɛ obiara a ɔbɛbɔ Yehowa din afrɛ no no, obenya nkwa.+ Na sɛnea Yehowa kae no, wɔn a wobeguan no,+ Bepɔw Sion so ne Yerusalem ne wɔn a wɔafi mu afi a Yehowa afrɛ wɔn no mu na wɔbɛtena.”+
