Yohane 14:1-31
14 “Mommma mo koma nntu.+ Munnya Onyankopɔn mu gyidi,+ munnya me nso me mu gyidi.+
2 Tenabea pii wɔ m’Agya fie.+ Sɛ ɛnte saa a, anka maka akyerɛ mo, efisɛ merekɔ akosiesie baabi+ ama mo.
3 Afei sɛ mekɔ kosiesie baabi ma mo a, mɛba bio+ na magye mo aba me nkyɛn,+ na baabi a mewɔ no, mo nso moaba hɔ.+
4 Na baabi a merekɔ no, munim kwan no.”
5 Toma+ ka kyerɛɛ no sɛ: “Awurade, yennim baabi a worekɔ.+ Ɛbɛyɛ dɛn na yɛahu kwan no?”
6 Yesu ka kyerɛɛ no sɛ: “Mene ɔkwan+ no ne nokware+ no ne nkwa.+ Obiara mma Agya no nkyɛn gye sɛ ɔnam me so.+
7 Sɛ munim me a, ɛnde na munim m’Agya nso; efi seesei rekɔ no munim no na moahu no.”+
8 Filipo ka kyerɛɛ no sɛ: “Awurade, kyerɛ yɛn Agya no, na ɛno ara dɔɔso ma yɛn.”
9 Yesu ka kyerɛɛ no sɛ: “Bere tenten a me ne mo atena yi nyinaa wunnya nhuu me, Filipo? Nea wahu me no ahu Agya+ no nso. Adɛn nti na woka sɛ, ‘Kyerɛ yɛn Agya no’?+
10 Wunnye nni sɛ mewɔ Agya no mu na Agya no nso wɔ me mu?+ Nsɛm a meka kyerɛ mo no, memmɔ me tirim na meka; na mmom Agya a ɔwɔ me mu no na ɔreyɛ ne nnwuma.+
11 Munnye me nni sɛ mewɔ Agya no mu na Agya no nso wɔ me mu; sɛ ɛnte saa nso a, monhwɛ nnwuma no ho nnye nni.+
12 Nokware, nokware, mise mo sɛ, nea onya me mu gyidi no, ɔno nso bɛyɛ nnwuma a meyɛ no bi; na ɔbɛyɛ nnwuma akɛse asen+ eyinom, efisɛ merekɔ Agya no nkyɛn.+
13 Afei nso biribiara a mubebisa me din mu no, mɛyɛ, na ama wɔahyɛ Agya no anuonyam Ɔba no mu.+
14 Sɛ mubisa biribiara me din mu a, mɛyɛ.
15 “Sɛ modɔ me a, mubedi m’ahyɛde so;+
16 na mɛsrɛ Agya no na wama mo ɔboafo foforo a ɔne mo bɛtena daa,+
17 nokware no honhom+ a wiase ntumi nnye,+ efisɛ wiase no nhu no, na ennim no nso. Mo de, munim no, efisɛ ɛwɔ mo nkyɛn, na ɛte mo mu.+
18 Merennyaw mo nnyanka.+ Mereba mo nkyɛn.
19 Aka bere tiaa bi na wiase nhu me bio,+ na mo de, mubehu me,+ efisɛ mete ase na mo nso mobɛtena ase.+
20 Saa da no mubehu sɛ mewɔ m’Agya mu na mowɔ me mu na me nso mewɔ mo mu.+
21 Nea ɔwɔ m’ahyɛde na odi so no, ɔno na ɔdɔ me.+ Na nea ɔdɔ me no m’Agya bɛdɔ no, na me nso mɛdɔ no na mayi me ho akyerɛ no pefee.”
22 Yuda+ (ɛnyɛ Iskariot) ka kyerɛɛ no sɛ: “Awurade, dɛn na asi a enti wopɛ sɛ wuyi wo ho adi kyerɛ yɛn pefee, na ɛnyɛ wiase no?”+
23 Yesu bua see no sɛ: “Sɛ obi dɔ me a, obedi m’asɛm so,+ na m’Agya bɛdɔ no, na yɛbɛba ne nkyɛn de hɔ abɛyɛ yɛn tenabea.+
24 Nea ɔnnɔ me no, me nsɛm nso onni so; na asɛm a mote no nyɛ me dea, na mmom ɛyɛ Agya a ɔsomaa me no dea.+
25 “Maka eyinom akyerɛ mo bere a mewɔ mo nkyɛn yi.
26 Nanso ɔboafo no, honhom kronkron no, a Agya no bɛsoma no me din mu no, ɔno na ɔbɛkyerɛ mo biribiara akaakae mo nea maka akyerɛ mo nyinaa.+
27 Mede asomdwoe gyaw mo, mede m’asomdwoe+ ma mo. Ɛnyɛ sɛnea wiase de ma no na mede ma. Mommma mo koma nntu na mommma ɛmmmɔ hu.
28 Motee sɛ meka kyerɛɛ mo sɛ, merekɔ na mɛsan aba mo nkyɛn. Sɛ modɔ me a, mo ani begye sɛ merekɔ Agya no nkyɛn, efisɛ Agya no yɛ kɛse sen+ me.
29 Enti afei madi kan aka akyerɛ mo ansa na aba,+ na sɛ ɛba a, moagye adi.
30 Me ne mo renkasa pii bio, efisɛ wiase sodifo+ no reba. Na onni tumi wɔ me so,+
31 nanso nea ɛbɛyɛ na wiase ahu sɛ medɔ Agya no, sɛnea Agya no ahyɛ+ me sɛ menyɛ no, saa ara na mereyɛ. Monsɔre, momma yemfi ha nkɔ.
