Yohane 21:1-25
21 Eyinom akyi no, Yesu yii ne ho adi bio kyerɛɛ asuafo no wɔ Tiberia po ho; na oyii ne ho adi saa kwan yi so.
2 Ná wɔn a wɔwɔ hɔ ne Simon Petro ne Toma a wɔfrɛ no Ata+ no, ne Natanael+ a ofi Kana a ɛwɔ Galilea no, ne Sebedeo+ mma no, ne n’asuafo foforo baanu.
3 Simon Petro ka kyerɛɛ wɔn sɛ: “Merekoyi nam.” Wɔka kyerɛɛ no sɛ: “Yɛn nso yɛne wo bɛkɔ.” Enti wofii adi kɔtenaa ɔkorow mu, nanso wɔanyi hwee anadwo no.+
4 Na ade reyɛ akye no, Yesu begyinaa po no ano, nanso asuafo no anhu sɛ ɛyɛ Yesu.+
5 Afei Yesu bisaa wɔn sɛ: “Mma nkumaa, munnyaa nea mubedi, meboa?” Wobuaa no sɛ “Dabi!”
6 Ɔka kyerɛɛ wɔn sɛ: “Montow asau no ngu ɔkorow no nifa na mubenya bi.”+ Ɛnna wɔtowee, na mpataa no dodow nti na wontumi ntwe bio.+
7 Enti osuani a na Yesu dɔ no+ no ka kyerɛɛ Petro+ sɛ: “Ɛyɛ Awurade!” Afei bere a Simon Petro tee sɛ ɛyɛ Awurade no, ɔde soro atade kyekyeree ne ho, efisɛ na ɔnhyɛ hwee, na ɔtow ne ho too po no mu.
8 Nanso asuafo a wɔaka no de ɔkorow ketewa no bae, efisɛ na wɔne asase ntam kwan nware, bɛyɛ anammɔn ahasa, na wɔtwee asau a mpataa wom no bae.
9 Afei wofi ɔkorow no mu sii fam no, wohuu gyabiriw a wɔasɔ+ a nam gu so ne paanoo.
10 Yesu ka kyerɛɛ wɔn sɛ: “Momfa mpataa a muyii no seesei yi ara no bi mmra.”
11 Ɛnna Simon Petro foro kɔtwee asau a mpataa akɛse ɔha aduonum abiɛsa ahyɛ no mã no baa asase so. Na ɛdɔɔso paa de, nanso asau no antetew.
12 Yesu ka kyerɛɛ wɔn sɛ: “Mommra mmedidi.”+ Nanso asuafo no mu biako mpo annya akokoduru ammisa no sɛ: “Woyɛ hena?” efisɛ na wonim sɛ ɛyɛ Awurade.
13 Yesu bɛfaa paanoo no de maa wɔn,+ na ɔde nam no nso maa wɔn saa ara.
14 Eyi ne ne mprɛnsa+ so a na Yesu ayi ne ho adi akyerɛ asuafo no fi bere a wonyan no fii awufo mu no.
15 Afei bere a wɔadidi awie no, Yesu bisaa Simon Petro sɛ: “Simon, Yohane ba, wodɔ me sen eyinom anaa?”+ Ɔka kyerɛɛ no sɛ: “Yiw, Awurade, wunim sɛ mepɛ w’asɛm.”+ Ɔka kyerɛɛ no sɛ: “Ma me nguammaa aduan.”+
16 Obisaa no ne mprenu so sɛ: “Simon, Yohane ba, wodɔ+ me?” Ɔka kyerɛɛ no sɛ: “Yiw, Awurade, wunim sɛ mepɛ w’asɛm.” Ɔka kyerɛɛ no sɛ: “Yɛn me nguan nkumaa.”+
17 Obisaa no ne mprɛnsa so sɛ: “Simon, Yohane ba, wopɛ m’asɛm anaa?” Petro werɛ howee sɛ obisaa no ne mprɛnsa so sɛ: “Wopɛ m’asɛm?” Enti ɔka kyerɛɛ no sɛ: “Awurade wunim nneɛma nyinaa;+ wunim sɛ mepɛ w’asɛm.” Yesu ka kyerɛɛ no sɛ: “Ma me nguan nkumaa aduan.+
18 Nokware, nokware, mise wo sɛ, woyɛ aberante no, na wode ade bɔ wo mu nantew kɔ baabi a wopɛ. Nanso sɛ wobɔ akora a, wobɛteɛ wo nsa na obi de ade abɔ wo mu,+ na ɔde wo akɔ baabi a wompɛ.”+
19 Ɔkaa eyi de kyerɛɛ owu+ ko a ɔde bɛhyɛ Onyankopɔn anuonyam.+ Enti ɔkaa eyi no, ɔka kyerɛɛ no sɛ: “Kɔ so di m’akyi.”+
20 Petro dan ne ho no, ohuu osuani a na Yesu dɔ+ no no sɛ odi n’akyi, nea anwummeduan no ase no na ɔtweri ne kokom a obisae sɛ: “Awurade, hena na ɔreyi wo ama?” no.
21 Enti bere a Petro huu no no, obisaa Yesu sɛ: “Awurade, oyi nso bɛyɛ dɛn?”
22 Yesu ka kyerɛɛ no sɛ: “Sɛ mepɛ sɛ ɔtena hɔ kosi sɛ mɛba a,+ ɛfa wo ho bɛn? Wo de, kɔ so di m’akyi.”
23 Afei asɛm no trɛwee anuanom mu sɛ saa osuani no renwu. Nanso Yesu anka ankyerɛ no sɛ ɔrenwu, na mmom ɔkae sɛ: “Sɛ mepɛ sɛ ɔtena hɔ+ kosi sɛ mɛba a, ɛfa wo ho bɛn?”
24 Oyi ne osuani+ a odi nneɛma yi ho adanse na ɔkyerɛw eyinom, na yenim sɛ adanse a odi no yɛ nokware.+
25 Nokwasɛm ni, nneɛma foforo pii wɔ hɔ a Yesu yɛe a, sɛ wɔkyerɛw ne nyinaa a, anka misusuw sɛ nhoma a wɔbɛkyerɛw no renkɔ wiase mpo.+
