Yohane 7:1-53
7 Eyinom akyi no, Yesu kɔɔ so kyin faa Galilea, na na ɔmpɛ sɛ ɔbɛkɔ Yudea, efisɛ na Yudafo no repɛ no akum+ no.
2 Nanso na Yudafo afahyɛ, asese afahyɛ+ no abɛn.
3 Enti ne nuanom+ ka kyerɛɛ no sɛ: “Fi ha kɔ Yudea na w’asuafo no nso nhu nnwuma a woyɛ no bi.
4 Obiara nni hɔ a ɔbɛyɛ ade kokoam bere a ɔpɛ sɛ afoforo hu no. Sɛ woyɛ eyinom a, yi wo ho adi kyerɛ wiase no ɛ.”
5 Asɛm no ara ne sɛ, na ne nuabarimanom+ nnye no nni.+
6 Enti Yesu ka kyerɛɛ wɔn sɛ: “Me bere nnui,+ na mo de, bere biara ye ma mo.
7 Wiase no nni nea ebegyina so atan mo, na me de, ɛtan me, efisɛ midi ne ho adanse sɛ ne nnwuma yɛ bɔne.+
8 Monkɔ afahyɛ no ase; me de, minnya nkɔɔ afahyɛ yi ase, efisɛ me bere+ nnui.”+
9 Enti bere a ɔkaa eyinom kyerɛɛ wɔn no, ɔtenaa Galilea.
10 Nanso bere a ne nuanom kɔɔ afahyɛ no ase no, ɔno nso kɔe a wanyi ne ho adi na mmom ɔde ne ho siei.+
11 Enti Yudafo no hwehwɛɛ+ no wɔ afahyɛ no ase, na wobisae sɛ: “Ɔwɔ he?”
12 Afei wɔyɛɛ ne ho huhuhuhu wɔ nnipakuw no mu.+ Ebinom kae sɛ: “Ɔyɛ onipa pa.” Afoforo nso kae sɛ: “Ɛnyɛ nokware, mmom ɔdaadaa nkurɔfo.”
13 Nanso Yudafo no ho hu+ nti, obiara anyi n’anim anka ne ho asɛm.
14 Afei bere a afahyɛ no duu mfinimfini no, Yesu kɔɔ asɔrefie hɔ na ofii ase kyerɛkyerɛe.+
15 Eyi yɛɛ Yudafo no nwonwa na wɔkae sɛ: “Ɛyɛɛ dɛn na onipa yi nim nhoma+ saa bere a ɔnkɔɔ sukuu biara?”+
16 Yesu nso bua see wɔn sɛ: “Nea mekyerɛkyerɛ no nyɛ me dea, na mmom nea ɔsomaa me no dea.+
17 Sɛ obi pɛ sɛ ɔyɛ N’apɛde a, obehu sɛ nkyerɛkyerɛ no fi Onyankopɔn+ hɔ anaasɛ m’ankasa na mebɔ me tirim kasa.
18 Nea n’ankasa bɔ ne tirim kasa no hwehwɛ n’ankasa anuonyam; na nea ɔhwehwɛ nea ɔsomaa no no anuonyam+ no, ɔyɛ ɔnokwafo na nea ɛnteɛ biara nni ne mu.
19 Ɛnyɛ Mose na ɔmaa mo Mmara no?+ Nanso mo mu biako mpo nni Mmara no so. Adɛn nti na morehwehwɛ me akum me?”+
20 Nnipakuw no buae sɛ: “Wowɔ adaemone.+ Hena na ɔrehwehwɛ wo akum wo?”
21 Yesu bua see wɔn sɛ: “Ade biako na meyɛe+ a ɛyɛ mo nyinaa nwonwa.
22 Eyi nti na Mose ama mo twetiatwa+—ɛnyɛ sɛ efi Mose, na mmom efi agyanom hɔ+—na mutwa nnipa twetia homeda.
23 Sɛ wotumi twa obi twetia homeda sɛnea ɛbɛyɛ a ɔrento Mose mmara no a, ɛnde dɛn nti na mo bo afuw me pii sɛ mama obi ho ayɛ no den homeda?+
24 Monnhwɛ nea etua aniwa mmmu atɛn, na mmom mummu atɛntrenee.”+
25 Enti Yerusalemfo no bi kae sɛ: “Ɛnyɛ ɔbarima yi na wɔrehwehwɛ no akum+ no no?
26 Nanso hwɛ! ɔrekasa nnipa mu,+ nanso wɔnka hwee nkyerɛ no. Atumfoɔ no bu no sɛ ɔno ne Kristo no anaa?+
27 Yɛn de yenim nea onipa yi fi;+ nanso sɛ Kristo no ba a, obiara renhu baabi a ofi.”+
28 Enti bere a Yesu rekyerɛkyerɛ asɔrefie hɔ no, ɔteɛɛm kae sɛ: “Munim me na munim baabi a mifi nso.+ Na ɛnyɛ me ara me pɛ so na mebae,+ na nea ɔsomaa me no wɔ hɔ ankasa,+ na munnim no.+
29 Me de minim no,+ efisɛ mebae sɛ ne nanmusini, na Ɔno na ɔsomaa me.”+
30 Enti wɔhwehwɛɛ ɔkwan a wɔbɛfa so akyere no,+ nanso obiara amfa ne nsa anka no, efisɛ na ne dɔn+ nnui.
31 Eyi nyinaa mu no, nnipakuw no mu pii gyee no dii;+ na wofii ase kae sɛ: “Sɛ Kristo no ba a, ɔbɛyɛ nsɛnkyerɛnne+ asen nea oyi ayɛ yi anaa?”
32 Farisifo no tee sɛ nnipakuw no reyɛ huhuhuhu keka nsɛm yi fa ne ho, na asɔfo mpanyin no ne Farisifo no somaa awɛmfo sɛ wɔnkɔkyere no.+
33 Enti Yesu kae sɛ: “Mewɔ mo nkyɛn bere tiaa bi ansa na makɔ nea ɔsomaa me no nkyɛn.+
34 Mobɛhwehwɛ me nso morenhu me,+ na baabi a mewɔ no muntumi mma hɔ.”+
35 Enti Yudafo no sisee wɔn ho sɛ: “Ɛhe na onipa yi pɛ sɛ ɔkɔ a enti yenhu no? Ɔpɛ sɛ ɔkɔ Yudafo a wɔahwete+ Helafo mu no nkyɛn na ɔkɔkyerɛkyerɛ Helafo no anaa?
36 Asɛm a ɔkae yi kyerɛ dɛn, ‘Mobɛhwehwɛ me nso morenhu me, na baabi a mewɔ no muntumi mma hɔ’?”
37 Afei da a edi akyiri a ɛyɛ afahyɛ no da kɛse no,+ Yesu gyinaa hɔ teɛɛm kae sɛ: “Sɛ osukɔm de obi a,+ ɔmmra me nkyɛn mmɛnom nsu.
38 Nea ogye me di no,+ sɛnea Kyerɛwnsɛm no aka no, ‘Ne mu na nkwa asubɔnten bɛtene afi.’”+
39 Nanso ɔkaa eyi faa honhom a na wɔn a wogye no di no rebenya no ho; saa bere no na honhom nni hɔ,+ efisɛ na wɔnhyɛɛ Yesu anuonyam.+
40 Ɛnna nnipakuw no mu bi a wɔtee nsɛm yi fii ase kae sɛ: “Nokwasɛm ni, oyi ne Odiyifo no.”+
41 Ná afoforo nso reka sɛ: “Oyi ne Kristo no.”+ Nanso na ebinom reka sɛ: “Galilea na Kristo+ no befi aba anaa?+
42 Kyerɛwnsɛm no nkae sɛ Kristo no befi Dawid+ ase ne Betlehem+ akuraa a na Dawid te no na aba anaa?”+
43 Afei, ne nti nnipakuw no mu kyɛe.+
44 Na wɔn mu binom pɛ sɛ wɔkyere no, nanso obiara amfa ne nsa anka no.
45 Enti awɛmfo no san kɔɔ asɔfo mpanyin no ne Farisifo no hɔ, na wobisaa awɛmfo no sɛ: “Adɛn nti na moamfa no amma?”
46 Awɛmfo no buae sɛ: “Obiara nkasae saa da.”+
47 Farisifo no nso buae sɛ: “Wɔadaadaa mo nso anaa?
48 Atumfoɔ no anaa Farisifo no bi agye no adi anaa?+
49 Nanso nnipakuw a wonnim Mmara yi yɛ wɔn a wɔadome wɔn.”+
50 Nikodemo a na ɔka Farisifo no ho a bere bi ɔkɔɔ ne nkyɛn no ka kyerɛɛ wɔn sɛ:
51 “Sɛ wonnii kan ntiee+ obi anom asɛm nhuu nea ɔreyɛ a, so yɛn mmara tumi bu no atɛn?”
52 Wobua see no sɛ: “Adɛn, wo nso wufi Galilea anaa? Hwehwɛ mu hwɛ na wubehu sɛ odiyifo+ biara nni hɔ a obefi Galilea asɔre.”*
* Tete nkyerɛwee ahorow a wɔato din Codex Sinaiticus, Codex Vaticanus, ne Sinaitic Syriac codex no ayi nkyekyɛm 53 kosi ti 8, nkyekyɛm 11 afi mu, na ɛkenkan sɛnea edi so yi (na nsonsonoe bi wɔ Hela nkyerɛwee ahorow no bi mu):
53 Enti wɔn mu biara kɔɔ ne fie.
