Yohane 7:53–8:59
* Tete nkyerɛwee ahorow a wɔato din Codex Sinaiticus, Codex Vaticanus, ne Sinaitic Syriac codex no ayi nkyekyɛm 53 kosi ti 8, nkyekyɛm 11 afi mu, na ɛkenkan sɛnea edi so yi (na nsonsonoe bi wɔ Hela nkyerɛwee ahorow no bi mu):
53 Enti wɔn mu biara kɔɔ ne fie.
8 Na Yesu kɔɔ Ngo Bepɔw no so.
2 Ahemadakye no, ɔsan kɔɔ asɔrefie hɔ, na nnipa no nyinaa fii ase baa ne nkyɛn, na ɔtenaa ase fii ase kyerɛkyerɛɛ wɔn.
3 Afei akyerɛwfo ne Farisifo no de ɔbea bi a wɔakyere no sɛ wasɛe aware bae, na wɔde no begyinaa wɔn mfinimfini no,
4 wɔka kyerɛɛ no sɛ: “Ɔkyerɛkyerɛfo, wɔakyere ɔbea yi sɛ ɔresɛe aware.
5 Mose de ahyɛde mae wɔ Mmara no mu sɛ yensiw ɔbea a ɔte saa abo. Ɛdɛn na wowɔ ka?”
6 Asɛm no ne sɛ na wɔreka eyi de asɔ no ahwɛ na wɔanya biribi de abɔ no sobo. Nanso Yesu bɔɔ ne mu ase na ofii ase de ne nsateaa kyerɛkyerɛw fam.
7 Bere a wɔkɔɔ so ara bisaa no no, ɔmaa ne mu so ka kyerɛɛ wɔn sɛ: “Mo mu nea ɔnyɛɛ bɔne da no, momma onni kan nto ɔbo mmɔ ɔbea no.”
8 Afei ɔbɔɔ ne mu ase bio kɔɔ so kyerɛkyerɛw fam hɔ.
9 Na wɔn a wɔtee eyi no fii adi mmiako mmiako, mpanyimfo no na edi kan, na ɛkaa ɔno nkutoo ne ɔbea a na ogyina wɔn mfinimfini no.
10 Yesu maa ne mu so ka kyerɛɛ no sɛ: “Ɔbea, wɔwɔ he? Obiara ammu wo fɔ?”
11 Ɔkae sɛ: “Owura, obiara ammu me fɔ.” Yesu kae sɛ: “Saa ara na me nso mimmu wo fɔ. Kɔ; efi nnɛ rekɔ ntena bɔne mu bio.”
12 Ɛnna Yesu ka kyerɛɛ wɔn bio sɛ: “Mene wiase hann.+ Nea odi m’akyi no rennantew sum mu da,+ mmom obenya nkwa hann.”
13 Enti Farisifo no ka kyerɛɛ no sɛ: “Wudi w’ankasa wo ho adanse; w’adanse no nyɛ nokware.”
14 Yesu bua see wɔn sɛ: “Sɛ midi m’ankasa me ho adanse mpo a, m’adanse+ no yɛ nokware, efisɛ minim baabi a mifi bae ne baabi a merekɔ.+ Mo de, munnim baabi a mifi bae ne baabi a merekɔ.
15 Mugyina nea aniwa hu so na mubu atɛn;+ me de, mimmu onipa biara atɛn koraa.+
16 Nanso sɛ mibu atɛn a, m’atemmu yɛ nokware, efisɛ ɛnyɛ me nkutoo na mewɔ hɔ, na mmom Agya a ɔsomaa me no ka me ho.+
17 Afei nso wɔakyerɛw wɔ mo ankasa Mmara mu sɛ, ‘Nnipa baanu adanse yɛ nokware.’+
18 Midi me ho adanse, na Agya a ɔsomaa me no nso di me ho adanse.”+
19 Enti wɔkɔɔ so ka kyerɛɛ no sɛ: “Ɛhe na w’Agya wɔ?” Yesu buae sɛ: “Munnim me, na saa ara nso na munnim m’Agya no.+ Sɛ munim me a, anka mubehu m’Agya no nso.”+
20 Ɔkaa eyinom wɔ baabi a woyi ntoboa+ no bere a ɔrekyerɛkyerɛ wɔ asɔrefie hɔ no. Nanso obiara amfa ne nsa anka no,+ efisɛ na ne dɔn+ nnui.
21 Enti ɔka kyerɛɛ wɔn sɛ: “Merekɔ, na mobɛhwehwɛ+ me, nanso mubewu wɔ mo bɔne mu.+ Baabi a merekɔ no muntumi mma hɔ.”
22 Ɛnna Yudafo no fii ase kae sɛ: “Ɛnyɛ kum na ɔpɛ sɛ okum ne ho yi? Efisɛ ɔka sɛ, ‘Baabi a merekɔ no muntumi mma hɔ.’”+
23 Enti ɔtoaa so ka kyerɛɛ wɔn sɛ: “Mufi fam; me de, mifi soro.+ Mufi wiase;+ me de, mimfi wiase.+
24 Enti meka kyerɛɛ mo sɛ, mubewu mo bɔne mu.+ Na sɛ munnye nni sɛ mene no a, ɛnde mubewu mo bɔne mu.”+
25 Ɛnna wofii ase bisaa no sɛ: “Wone hena?” Yesu ka kyerɛɛ wɔn sɛ: “Adɛn na me ne mo rekasa koraa?
26 Mewɔ nsɛm pii a mɛka afa mo ho na mabu ho atɛn. Nokwasɛm ni, nea ɔsomaa me no yɛ ɔnokwafo, na nea mete fii ne nkyɛn no ara na mereka wɔ wiase.”+
27 Wɔante ase sɛ Agya no ho asɛm na na ɔreka akyerɛ wɔn.
28 Enti Yesu kae sɛ: “Sɛ munya ma onipa Ba+ no so+ a, ɛno na mubehu sɛ mene no,+ na memmɔ me tirim nyɛ biribiara;+ na sɛnea Agya no kyerɛɛ me no, ɛno ara na meka.+
29 Na nea ɔsomaa me no ka me ho; wannyaw me nko, efisɛ meyɛ nea ɛsɔ n’ani daa.”+
30 Bere a ɔreka nsɛm yi no, nnipa pii nyaa ne mu gyidi.+
31 Enti Yesu toaa so ka kyerɛɛ Yudafo a na wɔagye no adi no sɛ: “Sɛ motena m’asɛm mu a,+ na moyɛ m’asuafo ampa,
32 na mubehu nokware no,+ na nokware no bɛma moade mo ho.”+
33 Wobuaa no sɛ: “Yɛyɛ Abraham asefo+ na yɛnyɛɛ nkoa mmaa obiara da.+ Adɛn nti na woka sɛ, ‘Mobɛde mo ho’?”
34 Yesu buaa wɔn sɛ: “Nokware, nokware, mise mo sɛ, obiara a ɔyɛ bɔne no yɛ bɔne akoa.+
35 Afei nso akoa ntena fie daa; ɔba na ɔtena hɔ daa.+
36 Enti sɛ Ɔba no ma mode mo ho a, mobɛde mo ho ampa.+
37 Minim sɛ moyɛ Abraham asefo; nanso mopɛ sɛ mukum me,+ efisɛ m’asɛm nnya nkɔso wɔ mo mu.+
38 Nea mahu wɔ m’Agya+ nkyɛn no na meka;+ enti mo nso moyɛ nea moate afi mo agya hɔ.”
39 Wobua see no sɛ: “Yɛn agya ne Abraham.”+ Yesu see wɔn sɛ: “Sɛ moyɛ Abraham mma+ a, monyɛ Abraham nnwuma.
40 Nanso seesei mopɛ sɛ mukum me, onipa a maka nokware a mete fii Onyankopɔn nkyɛn akyerɛ mo no.+ Abraham anyɛ eyi.+
41 Moyɛ mo agya no nnwuma.” Wɔka kyerɛɛ no sɛ: “Wɔanwo yɛn aguamammɔ mu; yɛwɔ Agya biako,+ Onyankopɔn.”
42 Yesu ka kyerɛɛ wɔn sɛ: “Sɛ Onyankopɔn yɛ mo Agya a, anka mobɛdɔ me,+ efisɛ Onyankopɔn hɔ na mifi a mewɔ ha yi.+ Ɛnyɛ me ara na mede me pɛ bae, na mmom Ɔno na ɔsomaa me.+
43 Adɛn nti na munnim nea mereka no? Efisɛ muntumi ntie m’asɛm.+
44 Mufi mo agya Ɔbonsam hɔ,+ na mopɛ sɛ moyɛ mo agya no apɛde.+ Ɔno na ɔyɛ owudifo fi mfiase,+ na wannyina nokware no mu, efisɛ nokware nni ne mu. Sɛ ɔka atosɛm a, efi n’ankasa suban, efisɛ ɔyɛ ɔtorofo ne atoro agya.+
45 Esiane sɛ me de meka nokware nti, munnye me nni.+
46 Mo mu hena na oyi me bɔne ho ntɛn?+ Sɛ meka nokware a, adɛn nti na munnye me nni?
47 Nea ofi Onyankopɔn no tie Onyankopɔn asɛm.+ Ɛno nti na muntie no, efisɛ mumfi Onyankopɔn.”+
48 Yudafo no bua see no sɛ: “Sɛ yɛka sɛ woyɛ Samariani+ na wowɔ adaemone a, ɛnyɛ nokware?”+
49 Yesu buae sɛ: “Minni adaemone, na mmom midi m’Agya no ni,+ na mo de, mobɔ me ahohora.
50 Nanso menhwehwɛ anuonyam mma me ho;+ Obi wɔ hɔ a ɔhwehwɛ na obu atɛn.+
51 Nokware, nokware, mise mo sɛ, obiara a obedi m’asɛm so no, ɔrenhu owu koraa.”+
52 Yudafo no ka kyerɛɛ no sɛ: “Afei paa na yɛahu sɛ wowɔ adaemone.+ Abraham wui,+ na adiyifo no nso saa ara;+ nanso woka sɛ, ‘Obiara a obedi m’asɛm so no, ɔrenka owu nhwɛ+ koraa.’
53 Woyɛ kɛse+ sen yɛn agya Abraham a owui no anaa? Afei nso adiyifo no wuwui.+ Wuse woyɛ hena?”
54 Yesu buae sɛ: “Sɛ mehyɛ me ho anuonyam a, m’anuonyam no nyɛ hwee. Ɛyɛ m’Agya a moka sɛ ɔyɛ mo Nyankopɔn no na ɔhyɛ me anuonyam;+
55 nanso munnim no.+ Na me de, minim no.+ Sɛ meka sɛ minnim no a, na meyɛ ɔtorofo sɛ mo. Nanso minim no na midi n’asɛm so.+
56 Mo agya Abraham dii anidaso a na ɔwɔ sɛ obehu me da no mu ahurusi,+ na ohu dii ahurusi.”+
57 Enti Yudafo no ka kyerɛɛ no sɛ: “Wunnii mfe aduonum mpo na woahu Abraham yi?”
58 Yesu ka kyerɛɛ wɔn sɛ: “Nokware, nokware, mise mo sɛ, ansa na Abraham reba no, na mewɔ hɔ.”+
59 Eyi nti wɔtasee abo sɛ wɔrebɛtotow abɔ no;+ nanso Yesu de ne ho siei, na ofii asɔrefie hɔ kɔe.
