Yosua 20:1-9
20 Na Yehowa ka kyerɛɛ Yosua sɛ:
2 “Ka kyerɛ Israelfo sɛ, ‘Munyi guankɔbea+ nkurow a menam Mose so kaa ho asɛm kyerɛɛ mo no,
3 na sɛ obi anhyɛ da na ne nsa pa kum+ ɔkra bi a, waguan akɔ hɔ. Ɛbɛyɛ mo guankɔbea na nea ne nsa apa no atumi akɔbɔ ne ho aguaa wɔ hɔ na owufo no busuani* ankum no antua ka.+
4 Onguan+ nkɔ nkurow yi biako mu na onkogyina kurow no pon ano.+ Afei ɔmfa n’asɛm nto ɛhɔ mpanyimfo anim,+ na wɔmfa no nkɔ kurow no mu nkɔma no baabi ntena wɔ wɔn nkyɛn.
5 Sɛ obusuani no tiw no kɔ hɔ a, wɔnhwɛ na wɔamfa nea wakum nipa no amma no,+ efisɛ wanhyɛ da na okum no; onni ne ho adwemmɔne biara.+
6 Ɔntena kurom hɔ nkosi sɛ ɔbɛba abegyina asafo no anim na wɔabu no atɛn,+ na ɔbɛtena hɔ akosi sɛ ɔsɔfo panyin+ a ɔwɔ so no bewu. Ɛno akyi no, nea ne nsa apa no betumi asan akɔ+ ne fie ne kurow a oguan fii mu no mu.’”
7 Enti wohyiraa nkurow yi so: Kedes+ a ɛwɔ Galilea wɔ Naftali mmepɔw so; Sekem+ a ɛwɔ Efraim mmepɔw so; ne Kiriat-Arba+ anaa Hebron a ɛwɔ Yuda mmepɔw so.
8 Afei Yordan mpɔtam wɔ Yeriko apuei nso, woyii Beser+ a ɛwɔ sare so fii Ruben+ abusuakuw mu; Ramot+ a ɛwɔ Gilead fii Gad abusuakuw mu; ne Golan+ a ɛwɔ Basan fii Manase abusuakuw mu.
9 Nkurow yi na woyi maa Israelfo ne ahɔho a wɔte wɔn mu no na sɛ obi nsa pa kum ɔkra+ bi a, waguan akɔ hɔ, na nea wawu no busuani ankum no ansa na wabegyina asafo no anim ma wɔadi n’asɛm.+
