Yosua 4:1-24
4 Afei bere a ɔman no nyinaa twaa Yordan wiei no,+ Yehowa ka kyerɛɛ Yosua sɛ:
2 “Yi mmarima dumien fi ɔman no mu, abusuakuw biara mu ɔbarima biako,+
3 na ka kyerɛ wɔn sɛ, ‘Momfa abo dumien+ mfi Yordan mfinimfini, faako a na asɔfo no nan sisi+ no, na momfa nkogu baabi a mobɛsoɛ+ anadwo yi.’”
4 Enti Yosua frɛɛ Israel mmarima dumien+ a ɔpaw wɔn no, abusuakuw biara mu ɔbarima biako;
5 na Yosua ka kyerɛɛ wɔn sɛ: “Monsen nkodi Yehowa mo Nyankopɔn apam adaka no anim nkɔ Yordan mfinimfini, na obiara mfa ɔbo biako nto n’abati, sɛnea Israel mmusua dodow te,
6 na eyi nyɛ sɛnkyerɛnne mma mo.+ Na sɛ da bi mo mma bisa mo sɛ, ‘Mode abo yi reyɛ dɛn?’+ a,
7 monka nkyerɛ wɔn sɛ, ‘Bere a wɔde Yehowa apam adaka no kɔfaa Yordan nsu no mu no, nsu no twae wɔ adaka no anim,+ na abo yi bɛyɛ nkae ama Israelfo daa.’”+
8 Enti Israelfo no yɛɛ nea Yosua kae no pɛpɛɛpɛ, na wɔtasee abo dumien fii Yordan mfinimfini, sɛnea Yehowa ka kyerɛɛ Yosua no. Abo no dodow ne Israel mmusua no dodow yɛ pɛ,+ na wɔde kaa wɔn ho koguu wɔn asoɛe.+
9 Afei nso Yosua de abo dumien guu Yordan mfinimfini, baabi a na asɔfo a wɔsõ apam adaka no nan sisi+ no, na ɛwɔ hɔ de besi nnɛ.
10 Na asɔfo a wɔsõ adaka no kɔɔ so gyinaa Yordan mfinimfini+ kosii sɛ wowiee nea Yehowa ka kyerɛɛ Yosua sɛ ɔnka nkyerɛ ɔman no nyinaa, sɛnea Mose ka kyerɛɛ Yosua no.+ Na ɔman no yɛɛ ntɛm+ twae.
11 Bere a ɔman no nyinaa twae no, Yehowa adaka+ no ne asɔfo no twae wɔ ɔman no anim.
12 Na Ruben asefo ne Gad asefo ne Manase abusuakuw fã+ no de wɔn akode+ twae wɔ Israelfo no anim, sɛnea Mose ka kyerɛɛ wɔn no.+
13 Asraafo a wɔasiesie wɔn ho ama ɔko bɛyɛ mpem aduanan na wotwa faa Yehowa anim kɔɔ Yeriko sare so.
14 Saa da no Yehowa maa Yosua so wɔ Israelfo nyinaa anim,+ na wofii ase suroo no sɛnea na wosuro Mose no, ne nkwa nna nyinaa.+
15 Afei Yehowa ka kyerɛɛ Yosua sɛ:
16 “Ka kyerɛ asɔfo a wɔsõ adanse adaka+ no sɛ womfi Yordan mu.”
17 Enti Yosua ka kyerɛɛ asɔfo no sɛ: “Mumfi Yordan mu.”
18 Afei bere a asɔfo a wɔsõ Yehowa apam adaka no+ fii Yordan mu bae a wɔn nan+ kaa asase kesee no ara pɛ na Yordan nsu no san bae, na eyiri faa ne kɔn so+ nyinaa sɛnea na ɛte kan no.
19 Ɔsram a edi kan no da a ɛto so du na ɔman no fii Yordan mu, na wɔbɛsoɛɛ Gilgal+ wɔ Yeriko hye so wɔ apuei fam.
20 Yosua de abo dumien a wɔfa fii Yordan mu no besisii Gilgal.+
21 Ɔtoaa so ka kyerɛɛ Israelfo no sɛ: “Sɛ da bi mo mma bisa wɔn papanom sɛ, ‘Abo yi nso kyerɛ dɛn?’+ a,
22 monka nkyerɛ mo mma no sɛ, ‘Israelfo faa asase kesee so na wotwaa Yordan yi.+
23 Yehowa mo Nyankopɔn maa Yordan nsu no yowee kosii sɛ wɔn nyinaa twa kɔɔ n’agya, sɛnea Yehowa mo Nyankopɔn maa Po Kɔkɔɔ no yowee wɔ yɛn anim kosii sɛ yetwae+ no.
24 Na ɛbɛma asase so aman nyinaa ahu sɛ Yehowa nsa+ yɛ den,+ na mo nso mubesuro Yehowa mo Nyankopɔn daa.’”+
