Yosua 5:1-15
5 Afei bere a Amorifo+ ahene a wɔwɔ Yordan agya wɔ atɔe fam, ne Kanaan+ ahene a wɔtete po ho no nyinaa tee sɛ Yehowa maa Yordan nsu no yowee wɔ Israelfo no anim kosii sɛ wɔn nyinaa twae no, wɔn koma tui,+ na Israelfo no nti wɔn ho mmoa nyinaa guanee.+
2 Saa bere no ara Yehowa ka kyerɛɛ Yosua sɛ: “Fa abo a ano yɛ nnam yɛ asekan na twa Israelfo no twetia,+ nea ɛto so abien.”
3 Enti Yosua de abo yɛɛ asekan twaa Israelfo no twetia wɔ Gibeat-Haaralot.+
4 Nea enti a Yosua twaa wɔn twetia ni: Mmarima a wofi Egypt bae a na wobetumi akɔ ɔko no nyinaa wuwui+ ɔkwan mu wɔ sare no so bere a wofi Egypt reba no.
5 Wɔn a wofi Egypt bae no nyinaa de, na wɔatwa wɔn twetia dedaw, nanso wɔn a wofi Egypt reba a wɔwoo wɔn kwan so wɔ sare so no nyinaa de, na wontwaa wɔn twetia.
6 Israelfo no nantew sare no so mfe aduanan+ kosii sɛ ɔman no mu mmarima a wobetumi akɔ ɔko a wofi Egypt bae a wɔantie Yehowa no nyinaa ase hyewee. Wɔn na Yehowa kaa wɔn ntam sɛ ɔremma wonhu asase+ a Yehowa kaa wɔn agyanom ntam sɛ ɔde bɛma yɛn+ no, asase a nufusu ne ɛwo sen wɔ so+ no.
7 Ɔmaa wɔn mma besii wɔn anan.+ Eyinom na Yosua twaa wɔn twetia, efisɛ wɔantwa wɔn twetia wɔ kwan so.
8 Na bere a wotwaa ɔman no nyinaa twetia wiei no, wɔtenaa wɔn asoɛe hɔ kosii sɛ wɔn ho tɔɔ wɔn.+
9 Afei Yehowa ka kyerɛɛ Yosua sɛ: “Ɛnnɛ mapia Egypt animguase nyinaa afi mo so.”+ Enti wɔtoo hɔ din Gilgal,+ na wɔfrɛ hɔ saa besi nnɛ.
10 Israelfo no kɔɔ so tenaa Gilgal, na ɔsram no da a ɛto so dunan+ anwummere no, wodii twam no wɔ Yeriko sare no so.
11 Bere a wodii twam na ade kyee no, saa da no wofii ase dii asase no so nnɔbae, paanoo a mmɔkaw nnim+ ne nkyewe.
12 Na efi da a wodii asase no so nnɔbae no bi no, mana no to twae, na Israelfo annya mana bio.+ Saa afe no, wofii ase dii Kanaan asase no so nnɔbae+ no bi.
13 Bere bi na Yosua wɔ Yeriko mpɔtam hɔ baabi, afei ɔbɛma n’ani so a, ɔbarima+ bi na watwe nkrante+ gyina n’anim yi! Ɛnna Yosua twiw bɛn no bisaa no sɛ: “Hena afã na wowɔ, yɛn anaa yɛn atamfo?”
14 Ɔbarima no buae sɛ: “Ɛnte saa, mmom maba sɛ Yehowa safohene.”+ Ɛnna Yosua de n’anim butuw fam+ bisaa no sɛ: “Asɛm bɛn na me wura wɔ ma n’akoa?”
15 Na Yehowa safohene no ka kyerɛɛ Yosua sɛ: “Yi wo nan ase mpaboa, efisɛ baabi a wugyina no yɛ kronkron.” Ntɛm ara na Yosua yɛɛ saa.+
