Kyerɛw Kronkron Bible no yɛ nhoma a Onyankopɔn nam so ne yɛn nyinaa kasa. Sɛ yebehu Onyankopɔn a ɔkyerɛwee no yiye a, gye sɛ yesua. (Yohane 17:3; 2 Timoteo 3:16) Wokan Bible no a, wubehu nea Yehowa Nyankopɔn abɔ ne tirim sɛ ɔbɛyɛ ama nnipa ne asaase a yɛte so yi.—Genesis 3:15; Adiyisɛm 21:3, 4.

Nhoma biara nni hɔ a ɛboa nnipa sen Bible. Bible ma yɛn ani gye ho sɛ yebesuasua Yehowa dɔ, ne mmɔborɔhunu, ne n’ayamhyehye. Ɛma nnipa nya anidaso, na sɛ wɔn haw so sɛ dɛn mpo a, ɛma wotumi gyina ano. Ɛnnɛ yi nyinaa, Bible ma yehu nneɛma a ɛwɔ wiase a ɛne Onyankopɔn apɛde nhyia.—Dwom 119:105; Hebrifo 4:12; 1 Yohane 2:15-17.

Kasa a wodii kan de kyerɛw Bible no ne Hebri, Aram, ne Greek. Nanso seesei wɔakyerɛ Bible no nyinaa anaa ne fã bi ase kɔ kasa bɛboro 3,000 mu. Nhoma biara mmaa wiase a wɔakyerɛ ase kɔ kasa pii mu saa anaa nnipa bebree anya bi te sɛ Bible. Ɛnyɛ nwonwa, efisɛ Bible hyɛɛ nkɔm sɛ: “Wɔbɛka Ahenni no ho asɛmpa yi [asɛntitiriw a ɛwɔ Bible mu] wɔ asaase so nyinaa de adi amanaman nyinaa adanse; ɛno ansa na awiei no bɛba.”—Mateo 24:14.

Yenim sɛ Bible mu asɛm yɛ asɛnhia paa, enti bere a yɛrekyerɛ Bible yi ase no, yɛtɔɔ yɛn bo ase yɛɛ no yiye. Esiane sɛ na adwuma a yɛreyɛ no yɛ aniberesɛm nti, yɛhwɛe sɛ yɛakyerɛ ase ma ɛne tete de a wodii kan kyerɛwee no ahyia pɛpɛɛpɛ. Afei yɛabɔ mmɔden ama emu ada hɔ, na ne kan nso ayɛ mmerɛw. Wohwɛ Nkekaho afã hɔ a, wubehu nsɛm a edidi so yi: “Ɔkwan a Wɔfa So Kyerɛ Bible Ase,” “Nneɛma Foforo a Ɛwɔ Nkyerɛase Yi Mu,” ne “Nea Ɛyɛe a Yɛn Nsa Kaa Bible.” Saa afã yi kyerɛ ɔkwan a yɛfaa so kyerɛɛ Bible yi ase, na ɛma yehu nneɛma foforo a ɛwom.

Wɔn a wɔdɔ Yehowa Nyankopɔn na wɔsom no no, wɔn ani gye ho sɛ wobenya Onyankopɔn Asɛm a wɔakyerɛ ase pɛpɛɛpɛ na ntease wom. (1 Timoteo 2:4) Ɛno nti, yɛde asi yɛn ani so sɛ yɛbɛkyerɛ Wiase Foforo Nkyerɛase no ase akɔ kasa dodow biara a yebetumi mu. Ɛno na ama yɛakyerɛ ase aba Twi kasa mu no. Yɛn dɔfo pa, yɛn mpaebɔ ne sɛ wokenkan Kyerɛw Kronkron yi a, ɛbɛboa wo ama ‘woahwehwɛ Onyankopɔn na woahu no.’—Asomafo Nnwuma 17:27.