Samuel Nhoma a Ɛto So Abien 22:1-51
22 Ɛda a Yehowa gyee Dawid fii n’atamfo nyinaa nsam,+ na ogyee no fii Saul nsam+ no, saa da no na Dawid kaa dwom+ yi mu nsɛm kyerɛɛ Yehowa.
2 Ɔkae sɛ:
“Yehowa ne me botan, m’abannennen,+ ne me Gyefo.+
3 Me Nyankopɔn yɛ me botan.+ Ɔno ne me guankɔbea,Me kyɛm+ ne me nkwagye* abɛn,* me hintabea.*+Me guankɔbea,+ me Gyefo;+ wugye me fi awudisɛm mu.
4 Yehowa fata ayeyi paa, na ɔno na misu frɛ no;Obegye me afi m’atamfo nsam.
5 Owu asorɔkye twaa me ho hyiae;+Ahuhufo a wɔte sɛ nsuyiri hunahunaa me.+
6 Ɔdamoa* nhama twaa me ho hyiae;+Owu sum mfiri wɔ m’anim.+
7 Misu frɛɛ Yehowa wɔ m’ahohia mu;+Misu frɛɛ me Nyankopɔn daa.
Ɔtee me nne wɔ n’asɔrefi hɔ,Na me sufrɛ no duu n’asom.+
8 Ɛnna asaase hinhimii, na ɛwosowee denneennen;+Ɔsoro fapem wosowee,+Na n’abufuw nti, ɛwosowee biribiri.+
9 Wusiw fi ne hwene mu puei,Na ogya a ɛhyew ade fi n’anom bae;+Nnyansramma fi ne mu dɛwee.
10 Ɔmaa ɔsoro kuntunii, na osianee.+Ná omununkum kusuu wɔ ne nan ase.+
11 Ɔtenaa kerubim so tu bae.+
Na wohuu no sɛ ɔte ɔbɔfo ntaban* so.+
12 Afei ɔde esum kataa no so te sɛ apata,+Ɔde osu a amuna tumm ne omununkum kusuu kataa ne ho.
13 Hann a efi n’anim no, emu na nnyansramma fi dɛwee.
14 Ɛnna Yehowa fi ɔsoro boboom;+Ɔsorosoroni no maa ne nne so.+
15 Ɔtotow n’agyan,+ na ɛbɔɔ wɔn hwetee;Ɔmaa n’anyinam pae guu wɔn so, na wɔn ani so tan wɔn.+
16 Ɛpo ase daa adi,+Asaase fapem yii ne ho adi, Yehowa animkaNe ne hwene mu home* nti.+
17 Ɔteɛɛ ne nsa fii soro;Osoo me mu yii me fii nsu a emu dɔ mu.+
18 Ogyee me fii me tamfo hoɔdenfo nsam,+Wɔn a wokyi me na wɔn ho yɛ den sen me no.
19 Wɔbɛtoaa me m’amanehunu da,+Nanso Yehowa twitwa gyee me.
20 Ɔde me kɔɔ baabi a bɔne biara renka me;*+Ɔpɛ m’asɛm nti, ogyee me.+
21 Me trenee nti, Yehowa tua me ka;+Me ho a enni asɛm* nti, ɔma me akatua.+
22 Mafa Yehowa akwan so,Na minnyaw me Nyankopɔn nkɔyɛɛ bɔne.
23 N’atemmusɛm+ nyinaa wɔ m’anim;N’ahyɛde+ nso, meremman mfi ho.
24 Meremma asɛm mma me ho+ wɔ n’anim,Na mɛtwe me ho afi bɔne ho.+
25 Me trenee ne me ho a enni asɛm nti,Ma Yehowa mma me akatua.+
26 Nea ɔyɛ ɔnokwafo no, wo nso wubedi no nokware;+Ɔbarima* a ne ho nni asɛm no, wobɛma wahu sɛ wo ho nni asɛm;+
27 Nea ɔyɛ kronkron no, wo nso wobɛyɛ kronkron ama no,+Na nea ɔyɛ ɔdaadaafo no, wobɛkyerɛ no sɛ w’ani atew kyɛn no.+
28 Wutwitwa gye ahobrɛasefo;+Na ahantanfo de, w’ani sa wɔn, na wobrɛ wɔn ase.+
29 O Yehowa, wo ne me kanea;+Yehowa na ɔma esum dan hann ma me.+
30 Woboa me ma metow hyɛ akorɔmfo-werɛmfo dɔm so;Onyankopɔn tumi nti, mitumi foro ɔfasu.+
31 Nokware Nyankopɔn no kwan di mu;+Yehowa asɛm nso, wɔasɔn so.+
Ɔyɛ ɔkyɛm ma wɔn a wɔde no ayɛ wɔn guankɔbea nyinaa.+
32 Hena na ɔyɛ Onyankopɔn ka Yehowa ho?+
Na hena na ɔyɛ ɔbotan ka yɛn Nyankopɔn ho?+
33 Nokware Nyankopɔn no ne m’abannennen,+Na ɔbɛma me kwan adi mu.+
34 Ɔma me nan yɛ sɛ ɔwansan de,Na ɔma migyina sorosoro.+
35 Ɔkyerɛ me nsa akodi;Me basa tumi kuntun kɔbere agyan mu.
36 Wode wo nkwagye kyɛm ma me,Na w’ahobrɛase ma meyɛ kɛse.+
37 Wotrɛw m’anammɔn kwan mu;Me nan* renwatiriw.+
38 Metiw m’atamfo akɔsɛe wɔn;Merensan kosi sɛ mɛtɔre wɔn ase.
39 Mɛtɔre wɔn ase abubu wɔn, na wɔrensɔre bio;+Wɔbɛhwe ase me nan ase.
40 Wobɛma me ahoɔden a mede bedi ako;+Wobɛma m’atamfo ahwe ase me nan ase.+
41 Wobɛma m’atamfo adan wɔn ho aguan;*+Wɔn a wokyi me no, mɛsɛe wɔn.*+
42 Wosu hwehwɛ mmoa, nanso ogyefo biara nni hɔ;Wosu frɛ Yehowa mpo, nanso ommua wɔn.+
43 Mɛyam wɔn muhumuhu sɛ fam mfuturu;Metiatia wɔn so awɔw wɔn sɛ abɔnten so atɛkyɛ.
44 Me man a wɔkasa tia me no, wubegye me afi wɔn nsam.+
Wobɛkora me so ma madi amanaman so.+Ɔman a minnim wɔn no, wɔn na wɔbɛsom me.+
45 Ahɔho bɛbrɛ wɔn ho ase ama me;+Nsɛm a wɔbɛtete no bɛma wɔayɛ aso ama me.*
46 Ahɔho bɛpa abaw;*Wɔde ahopopo befi wɔn hintabea apue.
47 Yehowa te ase! Ayeyi nka me Botan no!+
Me nkwagye botan Nyankopɔn no, ma yɛnkamfo no.+
48 Nokware Nyankopɔn no na otua m’atamfo so ka ma me;+Ɔka aman gu me nan ase;+
49 Ogye me fi m’atamfo nsam;
Woma me so,+ na wɔn a wɔtow hyɛ me so no annya me;Wugye me fi owudifo nsam.+
50 O Yehowa, ɛno nti, mɛda wo ase wɔ amanaman mu,+Na mɛto ayeyi nnwom* ama wo din:+
51 Nkwagye nnwuma akɛse na ɔyɛ* ma ne hene,+Ɔda ɔdɔ a enni huammɔ adi kyerɛ nea wasra no no,Dawid ne n’aseni* daa.”+
Ase Hɔ Nsɛm
^ Anaa “me gyefo a ne ho yɛ den.”
^ Hwɛ Nkyerɛkyerɛmu afã hɔ.
^ Anaa “m’abantenten.”
^ Anaa “Sheol,” kyerɛ sɛ, adasamma damoa. Hwɛ Nkyerɛkyerɛmu afã hɔ.
^ Anaa “mframa ntaban.”
^ Anaa “mframa a efi ne hwene mu.”
^ Anaa “baabi a ɛhɔ trɛw.”
^ Nt., “Me nsa a ɛho tew.”
^ Nt., “Ɔbarima kantinka.”
^ Anaa “Me nankɔn.”
^ Anaa “Wobɛma m’atamfo adan wɔn akyi ama me.”
^ Nt., “mɛma wɔaka wɔn ano atom.”
^ Nt., “Sɛ aso te a, wɔbɛyɛ osetie ama me.”
^ Anaa “bekisa.”
^ Anaa “mɛbɔ nnwom.”
^ Anaa “Nkonim akɛse na odi.”
^ Nt., “n’aba.”
