Hesekiel 27:1-36
-
Tiro kurow a ɛbɛmem te sɛ hyɛn no ho awerɛhow dwom (1-36)
27 Yehowa san ka kyerɛɛ me sɛ:
2 “Onipa ba, to Tiro ho awerɛhow dwom.*+
3 Ka kyerɛ Tiro sɛ,‘Wo a wote ɛpo abobow ano,Oguadini a wo ne nsupɔw pii di gua,Nea Awurade Tumfo Yehowa aka ni:
“O Tiro, wo ara na wokae sɛ, ‘M’ahoɔfɛ wie pɛyɛ.’+
4 W’asaase da ɛpo mfinimfini* tɔnn,Wɔn a wɔyɛɛ wo no ama w’ahoɔfɛ awie pɛyɛ.
5 Woyɛ hyɛn a Senir ɔpopaw dua na wɔde ayɛ,+Na wɔde sida dua a efi Lebanon na ɛyɛɛ wo hyɛnnua.
6 Basan adum na wɔde yɛɛ w’atabon.Kitim+ nsupɔw so kwabɔhɔrɔ dua a wɔde asonse* asiesie ho na wɔde yɛɛ w’anim.
7 Egypt ntama a wɔde kɔla ahorow ayɛ na wɔde yɛɛ wo mframatama,Na hama bruu ne ntama kɔkɔɔ a efi Elisah+ nsupɔw so na wɔde yɛɛ wo nkataso.
8 Sidonfo ne Awadfo+ na wɔharee w’ahyɛn.
O Tiro, wo ara w’animdefo na wɔbɛyɛɛ w’ahyɛn mu adwumayɛfo.+
9 Gebal mpanyimfo a wonim adwuma+ ne emu animdefo na wotuatuaa w’ahyɛn mu ntokuru.+
Ɛpo so ahyɛn ne emu adwumayɛfo nyinaa baa wo nkyɛn ne wo bedii gua.
10 Persia ne Lud ne Put mmarima+ bɛyɛɛ w’asraafo, w’akofo.
Wɔde wɔn akyɛm ne wɔn dade kyɛw sensɛn wo ho, na wɔma wunyaa anuonyam.
11 Awadfo a wɔyɛ w’asraafo twaa w’afasu ho hyiae,Na mmarima akokodurufo na wɔwɛn w’aban so.
Wɔde akyɛm sensɛn w’afasu ho hyiae,Na wɔmaa w’ahoɔfɛ wiee pɛyɛ.
12 “‘“Ahode pii a wowɔ nti,+ Tarsis+ ne wo dii gua. Wode wo nneɛma maa no de gyee ne dwetɛ, dade, sanyaa,* ne sumpii.*+
13 Na Yawan, Tubal,+ ne Mesek+ ne wo dii gua. Nneɛma a wotɔn no, wode maa wɔn de gyee nkoa+ ne nneɛma a wɔde kɔbere ayɛ.
14 Wɔde apɔnkɔ ne mfurumpɔnkɔ fi Togarma fi+ brɛɛ wo de begyee wo nneɛma.
15 Dedanfo+ ne wo dii gua; na wofaa nkurɔfo ma wodii gua wɔ nsupɔw bebree so maa wo; asonse+ ne dua tuntum a ne bo yɛ den* na wɔde tuaa wo ka.
16 Nneɛma dodow a wotɔn nti, Edomfo ne wo dii gua. Na wode wo nneɛma maa wɔn de gyee nsrammabo, ntama kɔkɔɔ, ntama a wɔde kɔla ahorow anwene, ntama pa, ɛpo mu abohene, ne aboɔden abo kɔkɔɔ.
17 “‘“Wo ne Yuda ne Israel dii gua. Wode w’aguade maa wɔn de gyee+ hwiit a efi Minit,+ aduan pa, ɛwo,+ ngo, ne balsam aduhuam.+
18 “‘“Nneɛma dodow a wotɔn ne w’ahonyade nyinaa nti, Damasko+ ne wo dii gua. Ɔtɔn Helbon nsã* ne oguan nwi a efi Sahar* maa wo.
19 Wedan ne Yawan fi Usal bae na wɔne wo bedii gua. Wɔde dade nneɛma, kasia dua,* ne sibiri huamhuam* brɛɛ wo de gyee w’aguade.
20 Ntama* a wɔde to apɔnkɔ so tena so no, ɛno na Dedanfo+ de maa wo gyee wo nneɛma.
21 Wofaa Arabiafo ne Kedar abirɛmpɔn+ nyinaa ma wɔtɔn nguan mma, adwennini, ne mpɔnkye maa wo.+
22 Saba ne Raama+ aguadifo ne wo dii gua; wode wo nneɛma maa wɔn de gyee nnuhuam a ɛyɛ papa, aboɔden abo nyinaa bi, ne sika kɔkɔɔ.+
23 Wo ne Haran,+ Kane, Eden,+ aguadifo a wofi Saba,+ Asur,+ ne Kilmad dii gua.
24 Wɔne wo dii gua, na wɔde ntaade fɛfɛ, nguguso a wɔde ntama bruu ne ntama a wɔde kɔla ahorow anwene baa wo gua so; ɛne kapɛt a wɔde kɔla ahorow ayɛ. Wɔde nhama bɔɔ ne nyinaa mu kyekyeree no denneennen bae.
25 Tarsis ahyɛn+ na ɛsoaa w’aguade no,Enti ama woanya wo ho tam* wɔ ɛpo mfinimfini* tɔnn.
26 Wɔn a wɔhare wo no de wo aba ɛpo bun mu;Apuei mframa abubu wo wɔ ɛpo mfinimfini tɔnn.
27 W’ahonyade, wo nneɛma, w’aguade, w’ahyɛn mufo, ne emu adwumayɛfo,Wɔn a wotuatua w’ahyɛn mu ntokuru, w’aguadifo+ ne w’akofo nyinaa+—W’asafodɔm ne wɔn a wɔwɔ wo mu nyinaa—Da a wobɛhwe ase no, wɔn nyinaa bɛmem wɔ ɛpo mfinimfini.+
28 Sɛ wo hyɛn mu adwumayɛfo teɛm a, mpoano nsaase bɛwosow.
29 Wɔn a wokura atabon, ahyɛn mufo, ne ɛpo so adwumayɛfo nyinaaBesisi afi wɔn ahyɛn mu abegyinagyina asaase kesee so.
30 Wɔbɛma wɔn nne so asu wo yayaayaw+Na wɔde mfuturu agu wɔn atifi amunumunum wɔ nsõ mu.
31 Wɔbɛbɔ tikwaw na wɔafurafura awerɛhow ntama;*Wɔde awerɛhow* besu wo yayaayaw.
32 Na wɔbɛto wo ho awerɛhow dwom* abɔ bena sɛ:
‘Hena na ɔte sɛ Tiro a seesei wɔama wayɛ komm wɔ ɛpo mfinimfini yi?+
33 Bere a w’aguade fi ɛpo so bae no, womaa aman pii nyaa nea wɔpɛ.+
W’ahonyade ne w’aguade pii no maa asaase so ahemfo nyaa wɔn ho.+
34 Afei woabubu wɔ ɛpo so, subun mu tɔnn.+Wo ne w’aguade ne wo nkurɔfo nyinaa amem.+
35 Nsupɔw sofo nyinaa bɛtɛɛ wɔn anom ahwɛ wo,+Na ehu bɛma wɔn ahemfo ho apopo;+ obiara benyinyam n’anim.
36 Nea ato wo nti, aguadifo a wofi aman horow so bɛbɔ wo so hwirema.
W’awiei bɛba mpofirim na ɛbɛyɛ hu,Na wɔrenhu wo bio da biara da.’”’”+
Ase Hɔ Nsɛm
^ Anaa “kwadwom.”
^ Nt., “ɛpo komam.”
^ Anaa “asono se.”
^ Ɛyɛ dade bi a wɔde yɛ kankyee.
^ Ɛyɛ dade bi a emu yɛ duru.
^ Anaa “duabo.”
^ Anaa “oguan nwi a ani dum.”
^ Anaa “bobesa.”
^ Dua bi a ɛte sɛ sinamon dua.
^ Ɛyɛ afifide bi a ɛyɛ huam. Nanso obiara nhyɛ da nnim afifide pɔtee a ɛyɛ.
^ Anaa “Ntama a wɔde nsa anwene.”
^ Nt., “ɛpo komam.”
^ Ebetumi nso akyerɛ, “na w’anim aba nyam.”
^ Anaa “atweaatam.” Hwɛ Nkyerɛkyerɛmu afã hɔ.
^ Anaa “Wɔn kra de awerɛhow.”
^ Anaa “kwadwom.”
