Hesekiel 28:1-26
28 Yehowa ka kyerɛɛ me bio sɛ:
2 “Onipa ba, ka kyerɛ ɔpanyin a ɔda Tiro ano no sɛ, ‘Nea Awurade Tumfo Yehowa aka ni:
“Esiane sɛ wo koma ama ne ho so nti,+ woka sɛ, ‘Meyɛ onyame.
Mete anyame agua so wɔ ɛpo mfinimfini,’*+
Wo komam de, wote nka sɛ woyɛ onyame,Nanso woyɛ onipa, na wonyɛ onyame.
3 Hwɛ, wunim nyansa sen Daniel.+
Ahintasɛm biara nni hɔ a wɔde asie wo.
4 Wo nyansa ne wo nhumu ama woanya wo ho,Na daa wode sika kɔkɔɔ ne dwetɛ sie w’akorae.+
5 Aguadi mu nyansa a wowɔ nti, woanya wo ho tam,+Na w’ahonya dodow ama wo koma ama ne ho so.”’
6 “‘Enti nea Awurade Tumfo Yehowa aka ni:
“Esiane sɛ wote nka wɔ wo komam sɛ woyɛ onyame nti,
7 Mede ahɔho reba wo so, atirimɔdenfo a wɔwɔ amanaman no mu,+Na wɔbɛtwe wɔn sekan de asɛe wo nyansa bebrebe noNa wɔasɛe w’anuonyam.+
8 Wɔde wo besian akɔ amoa* mu tɔnn,Na wubewu owu yayaw wɔ ɛpo mfinimfini.*+
9 Wobɛkɔ so aka akyerɛ nea ɔrekum wo no sɛ, ‘Meyɛ onyame?
Worenyɛ onyame, mmom wobɛyɛ onipa kɛkɛ wɔ wɔn a wɔregu wo ho fĩ no nsam.”’
10 “‘Wubewu momonotofo* wu wɔ ahɔho nsam;Me na maka,’ Awurade Tumfo Yehowa asɛm ni.”
11 Na Yehowa ka kyerɛɛ me bio sɛ:
12 “Onipa ba, to Tiro hene ho awerɛhow dwom,* na ka kyerɛ no sɛ, ‘Nea Awurade Tumfo Yehowa aka ni:
“Sɛ yɛka obi a ne biribiara di mu a, na ɛyɛ wo.
Ná nyansa ahyɛ wo ma,+ na w’ahoɔfɛ wie pɛyɛ.+
13 Ná wote Eden, Onyankopɔn turom.
Wɔde abohene nyinaa bi siesiee wo—Abohene kɔkɔɔ, topas abohene, ahwehwɛbo, sikaberebo, abohene tuntum, abohene ahabammono, hoabo, nsrammabo,+ ne ahabammonobo;Sika kɔkɔɔ na wɔde yɛɛ nsiase ne nsiso de abo yi nyinaa tetaree so.
Da a mebɔɔ wo no, saa da no na meyɛɛ ne nyinaa.
14 Mede wo sii hɔ sɛ kerubim a wɔasra no a watrɛw ne ntaban mu.*
Onyankopɔn bepɔw kronkron so na na wote,+ na ogya abo ntam na wonantewee.
15 Da a wɔbɔɔ wo no, na w’akwan nyinaa teɛKosii sɛ wohuu nea ɛnteɛ wɔ wo mu.+
16 “‘“W’aguade dodow nti,+Amumɔyɛ hyɛɛ wo ma, na woyɛɛ bɔne.+
Enti metu wo sɛ abusude afi Onyankopɔn bepɔw so.+O kerubim a woatrɛw wo ntaban mu,* metu w’ase na woannantew ogya abo no ntam bio.
17 W’ahoɔfɛ nti, wo koma ama ne ho so.+
Na w’anuonyam nti, woasɛe wo nyansa.+
Mɛtow wo akyene asaase so.+
Mede wo begyina ahemfo anim ma wɔahwɛ wo.
18 W’amumɔyɛ dodow ne w’aguadi bɔne nti, woagu wo kronkronbea ho fĩ.
Mɛma ogya afi wo mu aba, na ɛbɛhyew wo.+
Mɛma woadan nsõ wɔ asaase so wɔ wɔn a wɔrehwɛ wo no nyinaa anim.
19 Aman horow mufo a wonim wo nyinaa bɛtɛɛ wɔn anom ahwɛ wo.+
W’awiei bɛba mpofirim na ɛbɛyɛ hu,Na wɔrenhu wo bio da biara da.”’”+
20 Yehowa san ka kyerɛɛ me sɛ:
21 “Onipa ba, fa w’ani kyerɛ Sidon+ na hyɛ nkɔm tia no.
22 Na ka sɛ, ‘Nea Awurade Tumfo Yehowa aka ni:
“O Sidon, me ne wo wɔ asɛm, na mɛhyɛ me ho anuonyam wɔ wo mu.Na sɛ mibu no atɛn ma me din ho tew a, nnipa behu sɛ mene Yehowa.
23 Mɛma nsanyare a edi awu aba no so na mogya asen afa ne mmɔnten so.
Sɛ sekan ba no so wɔ afã nyinaa a, nnipa bewuwu wɔ ne mu;Na wobehu sɛ mene Yehowa.+
24 Afei ohwirom bɔne ne nsɔe a ano yɛ yaw biara,+ kyerɛ sɛ, wɔn a wodi wɔn ho fɛw no rentwa Israel fi ho nhyia bio; na nnipa behu sɛ mene Awurade Tumfo Yehowa.”’
25 “‘Nea Awurade Tumfo Yehowa aka ni: “Sɛ mesan boaboa Israel fi ano fi aman a wɔahwete wɔn kɔ so no mu+ a, me din ho bɛtew wɔ amanaman no anim.+ Na wɔbɛtena wɔn asaase so;+ asaase a mede maa m’akoa Yakob no.+
26 Wɔbɛtena so dwoodwoo+ na wɔasisi adan ayeyɛ bobe mfuw.+ Sɛ mibu wɔn a wɔatwa wɔn ho ahyia a wodi wɔn ho fɛw no atɛn+ a, wɔbɛtena ase dwoodwoo; na wobehu sɛ mene Yehowa wɔn Nyankopɔn.”’”
Ase Hɔ Nsɛm
^ Nt., “ɛpo komam.”
^ Nt., “ɛpo komam.”
^ Anaa “ɔdamoa.”
^ Anaa “wɔn a wontwaa wɔn dua.”
^ Anaa “kwadwom.”
^ Nt., “wɔasra no a ɔkata so.”
^ Nt., “kerubim a ɔkata so.”
