Hesekiel 32:1-32
32 Afe a ɛto so 12, bosome a ɛto so 12 no da a edi kan no, Yehowa san ka kyerɛɛ me sɛ:
2 “Onipa ba, to Egypt hene Farao ho awerɛhow dwom* na ka kyerɛ no sɛ:‘Ná wote sɛ gyata* a ne ho yɛ den wɔ amanaman no mu,Nanso wɔama woayɛ dinn.
Ná wote sɛ ɛpo mu asuboa kɛse;+ ná wuhuruhuruw pete wo ho wɔ wo nsubɔnten mu,Na wode wo nan fono nsu na woyɛ nsubɔnten* no fĩ.’
3 Nea Awurade Tumfo Yehowa aka ni,
‘Mɛma asafodɔm a wofi aman pii mu atrɛw m’atena mu agu wo so,Na wɔde m’asau beyi wo.
4 Megyaw wo ato asaase so;Mɛtow wo akyene asaase petee so.
Mɛma wim nnomaa nyinaa abesisi wo soNa mɛma wuram mmoa a wɔwɔ asaase nyinaa so awe wo nam amee.+
5 Mɛpete wo nam agu mmepɔw soNa mede wo funu ahyɛ abon mu ma.+
6 Mogya a ebetu wo no, mɛma adonnɔn asaase no ara akodu mmepɔw so,Na ɛbɛhyɛ nsubɔnten ma.’*
7 ‘Sɛ midum wo sɛ kanea a, mɛkata ɔsoro na mama ne nsoromma ayɛ tumm.
Mede omununkum bɛkata owia so,Na ɔsram renhyerɛn bio.+
8 Wo nti mɛma ɔsoro nkanea a ɛhyerɛn nyinaa ayɛ tumm,Na mede esum bɛkata w’asaase so,’ Awurade Tumfo Yehowa asɛm ni.
9 ‘Mɛma nnipa pii koma abotow, efisɛ mɛma wɔakyere wo nkurɔfo akɔ aman foforo so,Aman a wunnim so.+
10 Mɛma nnipa pii ho adwiriw wɔn,
Na sɛ mihim me sekan wɔ wɔn ahemfo anim a, ehu bɛka wɔn ma wɔn ho apopo.
Da a wobɛhwe ase no, wɔn ho bɛwosow biribiri;Obiara besuro sɛ ne nkwa befi ne nsa.’
11 Nea Awurade Tumfo Yehowa aka ni:
‘Babilon hene bɛtwe ne sekan wɔ wo so.+
12 Na mɛma akatakyi, atirimɔdenfo a wɔhyɛ aman so nyinaa+De wɔn sekan akunkum wo dɔm.
Wɔbɛma Egypt ahohoahoa no adan animguase na wɔatɔre ne dɔm nyinaa ase.+
13 Mɛtɔre ne nyɛmmoa ase afi wɔn nsu bebree no ho,+Na onipa anaa ayɛmmoa biara nan remfono nsu no bio.’+
14 ‘Saa bere no, mɛma wɔn nsu ani atew,Na wɔn nsubɔnten asen sɛ ngo,’ Awurade Tumfo Yehowa asɛm ni.
15 ‘Sɛ mepra nea ahyɛ Egypt asaase so ma nyinaa ma ɛda mpan,+Na mikunkum wɔn a wɔtete so nyinaa a,Wobehu sɛ mene Yehowa.+
16 Eyi yɛ awerɛhow dwom,* na nnipa bɛto nso;Mmea a wofi amanaman mu na wɔbɛto.
Wɔbɛto Egypt ne ne dɔm nyinaa ho awerɛhow dwom,’ Awurade Tumfo Yehowa asɛm ni.”
17 Afei afe a ɛto so 12, bosome no da a ɛto so 15 no, Yehowa ka kyerɛɛ me sɛ:
18 “Onipa ba, bɔ bena wɔ Egypt dɔm ho na ma onsian nkɔ fam, wɔne aman akɛse mma mmea a wɔrekɔ amoa* mu no.
19 “‘Hena na wo ho yɛ fɛ sen no? Sian kɔ fam kɔda momonotofo* mu!’
20 “‘Wɔn a sekan akunkum wɔn no mu na wobewuwu.+ Wɔde no ama sekan; montwe ɔne ne dɔm nyinaa nkɔ.
21 “‘Akatakyi no mu atitiriw befi Ɔdamoa* mu tɔnn akasa akyerɛ ɔne n’aboafo. Wobesian akɔ fam akɔdeda te sɛ momonotofo a wɔde sekan akunkum wɔn.
22 Asiria ne n’asafodɔm nyinaa wɔ hɔ. Wɔn adamoa atwa ne ho ahyia. Wɔn nyinaa awuwu sekan ano.+
23 N’ada wɔ amoa* mu tɔnn, na n’asafodɔm atwa n’adamoa ho ahyia. Wɔn nyinaa awuwu sekan ano, efisɛ wɔmaa ehu baa ateasefo asaase so.
24 “‘Elam+ ne ne dɔm a wowuwui wɔ sekan ano no nyinaa wɔ hɔ. Wɔde wɔn momonoto kɔ asaase ase tɔnn. Wɔn na wɔmaa ehu baa ateasefo asaase so. Afei, animguase bɛka wɔne wɔn a wɔrekɔ amoa* mu no nyinaa.
25 Wɔde ne mpa asi wɔn a wɔakunkum wɔn no mfinimfini, na ne dɔm nyinaa atwa n’adamoa ho ahyia. Wɔn nyinaa yɛ momonotofo a wowuwui wɔ sekan ano, efisɛ wɔmaa ehu baa ateasefo asaase so; na animguase bɛka wɔne wɔn a wɔrekɔ amoa* mu no nyinaa. Wɔn a wɔakunkum wɔn no mu na wɔde no toe.
26 “‘Ɛhɔ na Mesek ne Tubal+ ne wɔn dɔm* nyinaa wɔ. Wɔn adamoa* atwa ne ho ahyia. Wɔn nyinaa yɛ momonotofo a wɔde sekan ahwirew wɔn mu, efisɛ wɔmaa ehu baa ateasefo asaase so.
27 Akatakyi a wɔyɛ momonotofo a wɔawuwu no, ɛnyɛ wɔn mu na wɔbɛdeda? Wɔn na wɔde wɔn akode sian kɔɔ Ɔdamoa* mu tɔnn. Wɔde wɔn ti bɛto wɔn sekan so,* na wɔn bɔne aba wɔn nnompe so, efisɛ wɔyɛ akatakyi a wɔmaa ehu baa ateasefo asaase so.
28 Wo de, wɔbɛsɛe wo wɔ momonotofo mu, na wo ne wɔn a wowuwui wɔ sekan ano akɔda.
29 “‘Ɛhɔ na Edom+ ne n’ahemfo ne n’abirɛmpɔn nyinaa wɔ. Wɔn tumi nyinaa akyi no, wɔde wɔn kaa wɔn a sekan akunkum wɔn no ho; wɔn nso bɛda momonotofo ne wɔn a wɔrekɔ amoa* mu no nkyɛn.+
30 “‘Ɛhɔ na atifi fam abirɛmpɔn* ne Sidonfo nyinaa wɔ.+ Eyinom na wɔn tumi a ɛma wɔn ho yɛ hu nyinaa akyi no, wɔne awufo asian kɔ fam tɔnn wɔ animguase mu. Wɔde wɔn momonoto bɛkɔ akɔda wɔn a sekan kunkum wɔn no mu, na wɔde wɔn animguase bɛkɔ akɔka wɔn a wɔrekɔ amoa* mu no ho.
31 “‘Farao behu eyinom nyinaa, na nea ɛbɛto ne dɔm no nyinaa bɛma ne werɛ akyekye.+ Wɔde sekan bekunkum Farao ne n’asraafodɔm nyinaa,’ Awurade Tumfo Yehowa asɛm ni.
32 “‘Farao maa ehu baa ateasefo asaase so, enti wobesie ɔne ne dɔm nyinaa aka momonotofo ho, wɔn a sekan akunkum wɔn no,’ Awurade Tumfo Yehowa asɛm ni.”
Ase Hɔ Nsɛm
^ Nt., “wɔn nsubɔnten.”
^ Anaa “kwadwom.”
^ Anaa “gyatanini.”
^ Nt., “Nea ɛsɔn fi wo mu no bɛhyɛ nsuka ma.”
^ Anaa “kwadwom.”
^ Anaa “ɔdamoa.”
^ Anaa “wɔn a wontwaa wɔn dua.”
^ Anaa “Sheol,” kyerɛ sɛ, adasamma damoa. Hwɛ Nkyerɛkyerɛmu afã hɔ.
^ Anaa “ɔdamoa.”
^ Anaa “ɔdamoa.”
^ Anaa “ɔdamoa.”
^ Nt., “N’adamoa.”
^ Nt., “ne ne dɔm.”
^ Anaa “Sheol,” kyerɛ sɛ, adasamma damoa. Hwɛ Nkyerɛkyerɛmu afã hɔ.
^ Ebetumi aba sɛ na ɛyɛ asraafo a sɛ wowu a, wɔde wɔn sekan ka wɔn ho sie wɔn de hyɛ wɔn anuonyam.
^ Anaa “ɔdamoa.”
^ Anaa “mpanyimfo.”
^ Anaa “ɔdamoa.”
