Hiob 38:1-41
38 Ɛnna Yehowa bisaa Hiob wɔ ahum no mu sɛ:+
2 “Hena ni a ɔmpɛ sɛ nkurɔfo hu m’afotu,Na ɔrekeka nsɛm a onni ho nimdeɛ yi?+
3 Yɛ krado sɛ ɔbarima;Merebebisa wo nsɛm bi, na woayi me ano.
4 Bere a metoo asaase fapem no, na wowɔ he?+
Sɛ wunim a, ka kyerɛ me.
5 Hena na osusuw too hɔ; wunim anaa?Na hena na ɔde susuhama susuwii?
6 Ɛdɛn so na wɔde ne nnyinaso sisii,Na hena na ɔde ne ntwea so bo tim hɔ,+
7 Bere a adekyee nsoromma+ boom dii ahurusi,Na Onyankopɔn mma*+ nyinaa bɔɔ ose no?
8 Hena na ɔkaa ɛpo hyɛɛ dan mu too no pon mu,+Bere a epue fii ɔyafunu mu,
9 Bere a mede omununkum kataa ho,Na mede esum kabii kyekyeree ho,
10 Bere a metoo ɔhye maa no,Na misisii apon ne ade a wɔde brambram akyi maa no,+
11 Bere a mekae sɛ, ‘Bɛso ha yi ara, na ntra;Ɛha ara na w’asorɔkye akɛseakɛse no mmɛso’ no?+
12 Woahyɛ mmara ama anɔpa pɛn?*Anaa wo na wokyerɛ adekyee baabi a empue mfi?+
13 Wo na wokyerɛ no sɛ ensuso asaase anoano,Na ɛmporoporow abɔnefo mfi so ngu?+
14 Ɛma asaase sesa te sɛ dɔte a wɔde biribi a ahyɛnsode wɔ ho refa so,Na ɛso biribiara da adi fɛfɛɛfɛ te sɛ ataade a wɔadi adwinni agu mu.
15 Eyi abɔnefo kanea fi wɔn so,Na wɔn basa a wɔama so no bubu.
16 Woasian akɔ baabi a ɛpo fi ba?Anaa woakyin ahwehwɛ subun mu?+
17 Wɔama woahu owu apon?+Anaa woahu esum kabii* apon?+
18 Woahu sɛnea asaase yɛ tɛtrɛtɛ fa?+
Sɛ wunim eyinom nyinaa a, ka kyerɛ me.
19 Ɛhe na hann tenabea wɔ?+
Na ɛhe na esum nso te,
20 Sɛnea ɛbɛyɛ a wode no bɛkɔ ne fi,Na woate akwan a ɛkɔ ne fi no ase?
21 Wugye di sɛ saa bere no na wɔawo wo nti wunim anaa?Anaa wugye di sɛ woadi mfe* bebree nti wunim?
22 Woakɔ adan a wɔkora sukyerɛmma wom mu da,+Anaa woahu adan a wɔkora asukɔtweaa wom da,+
23 Ade a mede asie ama amanehunu bereNe ɔko ne ɔsa da no?+
24 Ɛhe na hann* fi trɛtrɛw kɔ baabiara,Na ɛhe na apuei mframa fi bɔ fa asaase so?+
25 Hena na wayi kwan ama nsuyiri,Na wapae kwan ama omununkum a ɛde osuframa ne aprannaa ba,+
26 Sɛnea ɛbɛyɛ a osu bɛtɔ wɔ baabi a onipa biara nte,Na atɔ agu sare so baabi a nnipa nni,+
27 Sɛnea ɛbɛyɛ a asaase a asɛe pasaa bɛyɛ yiye,Na ama sare afifi?+
28 Osu a ɛtɔ* wɔ agya anaa?+Na hena na ɔwoo obosu?+
29 Hena yam na nsu a akyenkyen fi bae,Na hena na ɔwoo ɔsoro asukɔtweaa,+
30 Bere a nsu ani akyenkyen sɛ ɔbo,Na subun ani akyen denneennen no?+
31 Wubetumi akyekyere Kima nsorommakuw* nhama?Anaasɛ wubetumi asan Kesil nsorommakuw* nhama?+
32 Sɛ nsorommakuw* bere so a, wubetumi adi n’anim de no apue?Na Ayis nsorommakuw* ne ne mma nso, wubetumi akyerɛ wɔn kwan?
33 Wunim mmara a ɛyɛ adwuma wɔ wim?+Anaa wubetumi ama saa mmara* no ayɛ adwuma wɔ asaase so?
34 Wubetumi akasa akyerɛ omununkumAma atɔ osu pii abɛkata wo so anaa?+
35 Wubetumi asoma anyinam ama akɔ?
Na ɛbɛba abɛka akyerɛ wo sɛ, ‘Yɛn ni!’ anaa?
36 Hena na ɔde nyansa hyɛɛ omununkum mu?*+Na hena na ɔde ntease maa wim nneɛma?*+
37 Hena na onim nyansa a enti obetumi akan omununkum?Na hena na obetumi ahwie ɔsoro nhina mu nsu agu,+
38 Bere a mfuturu dan atɛkyɛ na ehwie gu,Na dɔte a abɔ atɔwatɔw keka bom no?
39 Wubetumi akum aboa ama gyata?Anaa wubetumi ama agyata* aduan ama wɔamee,+
40 Bere a wobutubutuw wɔn bon mu,Anaa wɔtetɛw wɔn bon mu kyere mmoa no?
41 Hena na ɔyɛ aduan ma kwaakwaadabi,+Bere a ne mma su frɛ Onyankopɔn,Na aduan a wonnya nni nti, wɔnenam basabasa no?
Ase Hɔ Nsɛm
^ Ɛyɛ Hebri kasakoa a ɛkyerɛ Onyankopɔn abɔfo.
^ Nt., “Woahyɛ mmara ama anɔpa wɔ wo nna mu pɛn?”
^ Anaa “owu sunsuma.”
^ Nt., “nna.”
^ Ebetumi nso akyerɛ, “anyinam.”
^ Anaa “Nyankonsu.”
^ Anaa “Akokɔbaatan-ne-ne-mma.” Ɛbɛyɛ sɛ ɛno ne Pleiades nsoromma a ɛwɔ Taurus nsorommakuw no mu no.
^ Anaa “Nyɛnkrɛnte.” Ɛbɛyɛ sɛ ɛno ne Orion nsorommakuw no.
^ Anaa “Nsorommasɔn.” Ɛbɛyɛ sɛ ɛno ne Osisi Kɛse (Ursa Kɛse) nsorommakuw no.
^ Ebetumi nso akyerɛ, “Ne mmara.”
^ Ebetumi nso akyerɛ, “nnipa mu.”
^ Ebetumi nso akyerɛ, “maa adwene.”
^ Anaa “agyata a wɔn ho yɛ den.”
