Kwadwom 3:1-66
א [Aleph]
3 Mene ɔbarima a mede m’ani ahu amanehunu a n’abufuw abaa no de aba no.
2 Wapam me; wama manantew sum mu, na ɛnyɛ hann mu.+
3 Ampa, ɔde ne nsa ko tia me da mu nyinaa.+
ב [Beth]
4 Wama me honam ne me were atwintwam;Wabubu me nnompe mu.
5 Wagye me ho ban; ɔde awuduru a ɛyɛ nwene+ ne amanehunu atwa me ho ahyia.
6 Wahyɛ me ama matena sum mu te sɛ nnipa a wɔawuwu dedaadaw.
ג [Gimel]
7 Wagye me ho ban sɛnea ɛbɛyɛ a merentumi nguan;Ɔde kɔbere nkɔnsɔnkɔnsɔn a emu ayɛ duru agu me.+
8 Sɛ misu hwehwɛ mmoa denneennen a, ontie me mpaebɔ.*+
9 Ɔde abo a wɔapae asisiw m’akwan;Wakyeakyea m’akwantempɔn.+
ד [Daleth]
10 Ɔtetɛw baabi twɛn me te sɛ osisi, te sɛ gyata a wahintaw.+
11 Wayɛ ama maman afi akwan no so, na watetew me mu nketenkete;*Wayɛ me pasaa.*+
12 Wakuntun n’agyan mu,* na ɔde agyan no akyerɛ me so.
ה [He]
13 Ɔde ne kotoku mu agyan* awɔ m’asaabo mu.
14 Madan obi a aman nyinaa hwɛ no serew; wɔde me to dwom daa nyinaa.
15 Ɔde ade a ɛyɛ nwene ahyɛ me ma, na wama awɔnwene akɔ me mu+ aboro so.
[Waw]
16 Ɔde mmosea abubu me se;Wama mabutuw nsõ mu.+
17 Woama asomdwoe abɔ me;* me werɛ afi adepa.
18 Enti meka sɛ: “M’anuonyam ayera, na m’anidaso a ɛwɔ Yehowa mu nso asa.”
[Zayin]
19 Kae m’amanehunu ne sɛnea mayɛ adedamfikyiri no,+ na kae awɔnwene ne awuduru a ɛyɛ nwene no.+
20 Nea ɛbɛyɛ biara, wobɛkae* na woakotow aboa me.+
21 Mekae eyi wɔ me komam. Ɛno nti na mede ntoboase bɛtwɛn no.+
ח [Heth]
22 Yehowa dɔ a enni huammɔ nti na yɛn ase nhyewee,+Efisɛ ne mmɔborɔhunu to rentwa da.+
23 Ɛyɛ foforo anɔpa biara;+ wo nokwaredi dɔɔso.+
24 Maka* sɛ: “Yehowa ne me kyɛfa,+ ɛno nti na mede ntoboase bɛtwɛn no no.”+
ט [Teth]
25 Yehowa ye ma nea ɔde no ayɛ n’anidaso,+ onipa* a ɔhwehwɛ no daa no.+
26 Eye sɛ onipa bɛyɛ komm atwɛn*+ Yehowa nkwagye.+
27 Eye sɛ ɔbarima bɛsoa kɔndua wɔ ne mmeranteberem.+
י [Yod]
28 Sɛ Ɔde to no so a, ma ɔno nko ara ntena hɔ na ɔnyɛ komm.+
29 Ma ɔmfa n’ano mmutuw dɔte mu;+ ebia na anidaso bi wɔ hɔ.+
30 Ma ɔnnan n’asom mma nea ɔbɔ no; ma adapaatwa ntumi no.
כ [Kaph]
31 Efisɛ Yehowa rentow yɛn nkyene daa.+
32 Wama yɛadi awerɛhow de, nanso obehu yɛn mmɔbɔ esiane ne dɔ bebrebe a enni huammɔ no nti.+
33 Efisɛ enni ne komam sɛ ɔbɛma nnipa mma ahu amane anaa ɔbɛhyɛ wɔn awerɛhow.+
ל [Lamed]
34 Sɛ obi pɛtɛw asaase so nneduafo nyinaa wɔ ne nan ase,+
35 Sɛ obi bu ɔbarima atɛnkyea wɔ Ɔsorosoroni no anim,+
36 Sɛ obi sisi obi wɔ n’asɛnni mu a,Ne nyinaa Yehowa nsosɔ so.
מ [Mem]
37 Hena paa na obetumi aka biribi ama aba mu bere a Yehowa nhyɛe?
38 Nneɛma bɔne ne nneɛma pa;N’abien no rentumi mmom mfi Ɔsorosoroni no anom mma.
39 Adɛn nti na ɛsɛ sɛ onipa a ɔte ase nwiinwii wɔ ne bɔne+ ho nsunsuanso ho?
נ [Nun]
40 Momma yɛnhwehwɛ yɛn akwan mu na yɛmpɛɛpɛɛ mu,+ na yɛnsan nkɔ Yehowa nkyɛn.+
41 Momma yɛmma yɛn koma ne yɛn nsa so nkyerɛ Onyankopɔn wɔ soro+ na yɛnka sɛ:
42 “Yɛayɛ bɔne, na yɛatew atua,+ na woamfa ankyɛ.+
ס [Samekh]
43 Wode abufuw asiw yɛn kwan;+Woadi yɛn akyi akunkum yɛn, na woanhu yɛn mmɔbɔ.+
44 Wode omununkum asiw ɔkwan a ɛba wo nkyɛn no, sɛnea ɛbɛyɛ a yɛn mpaebɔ remfa mu.+
45 Woama yɛadan nwura dodow ne sumina* wɔ amanaman no mu.”
פ [Pe]
46 Yɛn atamfo nyinaa serew yɛn.*+
47 Ehu ne amoa na atwa yɛn ho ahyia,+ amamfo ne ɔsɛe.+
48 Me man babea a wɔasɛe no nti, nsu nam m’ani ase waawaa.+
sע [Ayin]
49 M’ani tew ara na ɛretew nisu; ennyae,+
50 Kosi sɛ Yehowa besi ne ti ase afi soro ahwɛ.+
51 Nea m’ani ahu ama me* werɛ ahow, me kurow mma mmea nyinaa nti.+
צ [Tsade]
52 M’atamfo ahwehwɛ me akyere me sɛ anomaa, nanso menyɛɛ hwee.
53 Wɔatwa me nkwa so wɔ amoa mu; wɔtotow abo boroo me.
54 Nsu bu faa me ti so, na mekae sɛ: “Mawu awie!”
ק [Qoph]
55 O Yehowa, mebɔɔ wo din frɛɛ wo fii amoa ase tɔnn.+
56 Tie me nne; misu frɛ wo sɛ boa me na ma minnya ahotɔ a, nsisiw w’aso.
57 Ɛda a mefrɛɛ wo no, wutwiw bɛnee. Wokae sɛ: “Nsuro.”
ר [Resh]
58 O Yehowa, woadi m’asɛm* ama me. Woagye me nkwa.+
59 O Yehowa, woahu bɔne a wɔde ayɛ me. Mepa wo kyɛw, bu atɛntrenee ma me.+
60 Woahu wɔn aweredi nyinaa, ɛpɔw a wɔabɔ wɔ me ho nyinaa.
ש [Sin] anaa [Shin]
61 O Yehowa, woate wɔn adapaatwa, ɛpɔw a wɔabɔ wɔ me ho nyinaa;+
62 Woate wɔn a wɔsɔre tia me no anom asɛm ne huhuhuhu a wɔyɛ wɔ me ho daa nyinaa no.
63 Hwɛ wɔn. Sɛ wɔte hɔ oo, wogyina hɔ oo, wɔto dwom de bɔ me akutia!
ת [Taw]
64 O Yehowa, wubetua wɔn ka sɛnea wɔn nnwuma te.
65 Wobɛma wɔn koma ayɛ den; ɛno ne nnome a wode bɛba wɔn so.
66 Yehowa, wubetiw wɔn wɔ w’abufuw mu, na woasɛe wɔn afi wo soro ase.
Ase Hɔ Nsɛm
^ Anaa “osiw me mpaebɔ kwan.”
^ Anaa “Wama mayɛ sɛ kurow a abɔ.”
^ Ebetumi nso akyerɛ, “wama mayɛ sɛ asaase a ada mpan.”
^ Nt., “Watia n’agyan so.”
^ Nt., “mma.”
^ Anaa “me kra.”
^ Anaa “wo kra bɛkae.”
^ Anaa “Me kra aka.”
^ Anaa “ɔkra.”
^ Anaa “Eye sɛ onipa de ntoboase twɛn.”
^ Anaa “bɔɔla.”
^ Anaa “bue wɔn anom wɔ yɛn so.”
^ Anaa “me kra.”
^ Anaa “me kra asɛm.”
