Nnwom 139:1-24
Wɔde ma dwom kyerɛfo. Dawid dwom. Ayeyi dwom.
139 O Yehowa, woahwehwɛ me mu, na wunim me.+
2 Sɛ metena ase a wunim, na mesɔre nso a, wunim.+
Woahu m’adwene fi akyirikyiri.+
3 Mitu kwan oo, meda oo, w’ani tua;*Wunim m’akwan nyinaa.+
4 O Yehowa, ansa na me tɛkrɛma bɛka asɛm bi no,Na wunim ne nyinaa dedaw.+
5 M’anim ne m’akyi nyinaa, wobɔ me ho ban hyia;Wode wo nsa so me mu.
6 Saa nimdeɛ yi boro me ntease so.*
Ɛwɔ soro ma me dodo sɛ medu hɔ.*+
7 Ɛhe na metumi afi wo honhom anim akɔ?Na ɛhe na metumi aguan afi w’anim akɔ?+
8 Sɛ meforo kɔ soro a, wuni;Na sɛ mesɛw me kɛtɛ wɔ Ɔdamoa* mu a, ɛhɔ nso wowɔ hɔ.+
9 Sɛ mede adekyee ntaban tuKɔtena ɛpo akyi noho a,
10 Ɛhɔ mpo, wo nsa na ɛbɛkyerɛ me kwan,Na wo nsa nifa beso me mu.+
11 Sɛ meka sɛ: “Esum ara na ɛbɛkata me so!” a,
Ɛnde esum a atwa me ho ahyia no bɛdan hann.
12 Esum mpo renyɛ sum kabii mma wo,Mmom anadwo bɛhyerɛn sɛ adekyee,+Na esum ayɛ hann ama wo.+
13 Wo na woyɛɛ m’asaabo;Wode me siee* me maame yam.+
14 Meyi wo ayɛ efisɛ sɛnea woyɛɛ me no yɛ hu na ɛyɛ nwonwa.+
Wo nnwuma yɛ nwonwa,+Na minim* eyi paa.
15 Me nnompe anhintaw woBere a woyɛɛ me ahintawee mu;Bere a wonwenee me asaase yam tɔnn no.+
16 Meyɛ mogyatɔw mpo no, w’aniwa huu me;Bere a wɔnwenee m’akwaa nyinaa no, wɔkyerɛw ho asɛmWɔ wo nhoma muAnsa na emu biara mpo reba.
17 Ɛno nti, wo nsusuwii som bo ma me paa.+
O Onyankopɔn, ne dodow nni ano!+
18 Sɛ mise merekan a, ɛbɛdɔɔso asen anwea.+
Sɛ meda sɔre a, mɛkɔ so ara akan.*+
19 O Onyankopɔn, sɛ wukum ɔdebɔneyɛfo a,+
Anka awudifo* befi me ho akɔ,
20 Wɔn na wɔde adwemmɔne keka wo ho nsɛm;*Wɔyɛ w’atamfo a wɔde wo din di agoru.+
21 O Yehowa, metan wɔn a wokyi wo no,+Na wɔn a wɔtew wo so atua no, wɔn ho nyɛ me abofono anaa?+
22 Ɔtan fitaa na metan wɔn;+Wɔyɛ m’atamfo ankasa.
23 O Onyankopɔn, pɛɛpɛɛ me mu, na hu nea ɛwɔ me koma mu.+
Hwehwɛ me mu, na hu me mu dadwen.+
24 Hwɛ sɛ adwene a ɛmfata bi wɔ me mu anaa,+Na fa me si mmeresanten kwan so.+
Ase Hɔ Nsɛm
^ Nt., “wubu ho akontaa.”
^ Anaa “Ɛwɔ soro ma me, na abunkam me ntease so.”
^ Anaa “nimdeɛ yi yɛ me nwonwa dodo.”
^ Anaa “Sheol,” kyerɛ sɛ, adasamma damoa. Hwɛ Nkyerɛkyerɛmu afã hɔ.
^ Ebetumi nso akyerɛ, “Wonwenee me wɔ.”
^ Anaa “me kra nim.”
^ Ebetumi nso akyerɛ, “meda so ara wɔ w’anim.”
^ Anaa “wɔn a wodi mogya ho fɔ.”
^ Anaa “wɔkeka wo ho nsɛm sɛnea wɔn adwene kyerɛ wɔn.”
