Nnwom 6:1-10
Wɔde ma dwom kyerɛfo sɛ wɔmfa asanku nto wɔ Seminit* so. Dawid dwom.
6 O Yehowa, mfa abufuw nka m’anim,Na mfa abufuhyew nteɛ me so.+
2 Hu me mmɔbɔ, O Yehowa, na mayɛ mmerɛw.
O Yehowa, sa me yare,+ na me nnompe rewosow.
3 Mabotow* dodo;+O Yehowa, mise, enkosi da bɛn?+
4 O Yehowa, san bra begye me;*+Wo dɔ a enni huammɔ nti, gye me ɛ.+
5 Awufo ntumi mmɔ wo din;*Hena na obeyi wo ayɛ wɔ Ɔdamoa* mu?+
6 Masi apini abrɛ;+Me nisu fɔw me mpa anadwo mũ nyinaa;Me nisu yiri fa me kɛtɛ.+
7 Awerɛhow ama m’ani ayɛ wusiwusi;+Nkurɔfo reteetee me nti m’ani so atan me.
8 Amumɔyɛfo nyinaa, mumfi me so nkɔ,Na Yehowa bɛte me su.+
9 Yehowa betie me nkotosrɛ;+Yehowa bebua me mpaebɔ.
10 M’atamfo nyinaa ani bewu na ehu atɔ wɔn so;Aniwu nti, wɔbɛsan wɔn akyi prɛko pɛ.+
Ase Hɔ Nsɛm
^ Hwɛ Nkyerɛkyerɛmu afã hɔ.
^ Anaa “Me kra abotow?”
^ Anaa “begye me kra.”
^ Anaa “ntumi nkae wo.”
^ Anaa “Sheol,” kyerɛ sɛ, adasamma damoa. Hwɛ Nkyerɛkyerɛmu afã hɔ.
