Numeri 24:1-25
24 Bere a Baalam hui sɛ Yehowa pɛ* sɛ ohyira Israelfo no, wanhwehwɛ ɔkwan a ɔbɛfa so ato wɔn aduru bio,+ mmom ɔde n’ani kyerɛɛ sare so.
2 Bere a Baalam maa n’ani so a ohui sɛ Israelfo tete hɔ mmusua mmusua wɔ wɔn asoɛe hɔ no,+ Onyankopɔn honhom baa no so.+
3 Ɛnna ɔde yɛɛ anwensɛm kae sɛ:+
“Beor ba Baalam asɛm ni,Ɔbarima a wɔabue n’ani no asɛm ni,
4 Nea ɔtee Onyankopɔn asɛm,Nea onyaa ade nyinaa so Tumfo no ho anisoadehu,Nea obutuw hɔ a n’ani gu so no, n’asɛm ni:+
5 O Yakob, hwɛ sɛnea wo tenabea yɛ fɛ;O Israel, hwɛ sɛnea wo ntamadan yɛ fɛ!+
6 Ɛtrɛw kɔ akyiri sɛ abon,*+Ɛte sɛ nturo a ɛwowɔ nsu ho.Ɛte sɛ pɛprɛ nnua a Yehowa adua,Ɛte sɛ sida nnua a esisi nsu ho.
7 Nsu bu fa n’asuhina abien ho,Wɔadua n’aba* wɔ nsu pii ho.+
Ne hene+ nso bɛyɛ kɛse asen Agag,+Na wɔbɛma n’ahenni so.+
8 Onyankopɔn de no fi Egypt reba;Ɔte sɛ ɛkoɔ* mmɛn a ɛboa wɔn.
Ɔbɛwe aman a wɔhyɛ no so no nam,+Ɔbɛbobɔ wɔn nnompe mu, na ɔde n’agyan bebubu wɔn pasaa.
9 Obutuw fam, na ɔda hɔ te sɛ gyata;Ɔte sɛ gyata, na hena na ɔbɛpɛ ne ho asɛm akonyan no?
Wobehyira wɔn a wohyira wo,Na wɔbɛdome wɔn a wɔdome wo.”+
10 Ɛnna Balak bo fuw Baalam. Na Balak bɔɔ ne nsam, na ɔka kyerɛɛ Baalam sɛ: “Mefrɛɛ wo sɛ bɛdome m’atamfo,+ nanso nhyira na wode aguare wɔn mprɛnsa yi nyinaa.
11 Yɛ ntɛm kɔ wo fi. Mekae sɛ mɛhyɛ wo anuonyam paa,+ nanso hwɛ! Yehowa ama anuonyam no abɔ wo.”
12 Ɛnna Baalam ka kyerɛɛ Balak sɛ: “Manka ankyerɛ nnipa a wosomaa wɔn no sɛ,
13 ‘Sɛ Balak de ne fi a dwetɛ ne sika kɔkɔɔ ayɛ mu ma ma me mpo a, merentumi mmu Yehowa asɛm so nyɛ nea me ara mepɛ.* Papa oo, bɔne oo, merentumi mfa me pɛ nyɛ biribiara. Nea Yehowa bɛka no, ɛno ara na mɛka’?+
14 Me de, merekɔ me man mu. Bra na menkyerɛ wo nea nkurɔfo yi de bɛyɛ wo man daakye.”*
15 Ɛnna ɔde yɛɛ anwensɛm kae sɛ:+
“Beor ba Baalam asɛm ni,Ɔbarima a wɔabue n’ani no asɛm ni,+
16 Nea ɔtee Onyankopɔn asɛm,Nea ɔwɔ Ɔsorosoroni no ho nimdeɛ,Nea onyaa ade nyinaa so Tumfo no ho anisoadehu,Nea obutuw hɔ a n’ani gu so no, n’asɛm ni:
17 Mehu no, nanso ɛnyɛ nnɛ;Mede m’ani behu no, nanso ɛnyɛ seesei.
Nsoromma bi+ bepue afi Yakob mu,Na ahempoma bi+ bɛsɔre afi Israel mu.+
Na sɛnea ɛte biara, ɔbɛpaapae Moab moma,*+Na wapaapae mma a wɔyɛ dede no tikora.
18 Ɔbɛfa Edom ayɛ n’agyapade,+Yiw, Seir+ bɛyɛ n’atamfo agyapade,+Na Israel de, ɔbɛda n’akokoduru adi.
19 Yakob mu na obi befi akodi n’atamfo so nkonim,+Na ɔbɛsɛe obiara a ɔbɛka wɔ kurow no mu no.”
20 Bere a ohuu Amalek no, ɔtoaa n’anwensɛm no so sɛ:
“Amanaman no mu nea odi kan ne Amalek,+Nanso ebewie ase no, ɔbɛsɛe.”+
21 Bere a ohuu Kenifo+ no, ɔtoaa n’anwensɛm no so sɛ:
“Baabi a wɔabɔ ho ban na wote, na wo fi wɔ ɔbotan mu.
22 Nanso obi bɛba abɛhyew Kenifo* dwerɛbee.
Ɛrenkyɛ na Asiria abɛkyere wo akɔ.”
23 Na ɔtoaa n’anwensɛm no so sɛ:
“Ɛbɛyɛ dwe! Sɛ Onyankopɔn yɛ saa a, hena na obenya nkwa?
24 Ɛpo so ahyɛn befi Kitim+ mpoano aba,Na wɔbɛteetee Asiria,+Na wɔateetee Eber.
Nanso ɔno nso bɛsɛe korakora.”
25 Ɛnna Baalam+ sɔree, na osiim san kɔɔ baabi a ofi bae. Na Balak nso kɔɔ ne kwan.
Ase Hɔ Nsɛm
^ Nt., “eye wɔ ani so.”
^ Anaa “subon.”
^ Anaa “n’aseni.”
^ Anaa “wuram nantwi.”
^ Nt., “nea efi me komam.”
^ Anaa “wɔ nna no awiei.”
^ Anaa “Moab asontɔrem.”
^ Nt., “Kain.”
