Solomon Dwom 1:1-17
1 Nnwom mu dwom;* ɛyɛ Solomon dwom:+
2 “Ma ɔmfa n’ano mfewano mmefew m’ano,Na wo dɔ yɛ dɛ sen nsã.*+
3 Wo ngo yɛ huam papaapa.+
Wo din te sɛ ngohuam a wɔrehwie.+
Ɛno nti na mmabaa dɔ wo no.
4 Fa me di w’akyi;* ma yentu mmirika.
Ɔhene de me aba ne mpia mu!
Ma yɛn ani nnye na yenni ahurusi.
Ma yɛnkamfo wo dɔ nsen nsã.*
Ɛnyɛ nwonwa sɛ wɔdɔ* wo saa.
5 O Yerusalem mma mmea, meyɛ ɔbea tuntum, nanso me ho yɛ fɛ,Mete sɛ Kedar+ ntamadan ne Solomon ntamadan.+
6 Monnhwɛ me hãã, esiane sɛ mibiri nti,Esiane sɛ owia ahye me nti.
Me maame mma mmarima bo fuw me;Wɔma mehwɛɛ bobefuw* so,Na me ara me bobefuw de, manhwɛ so.
7 Wo a matɔ wo dɔ mu,* ka kyerɛ me ɛ.Ɛhe na wode wo nguan kɔ adidi?+Ɛhe na woma wɔda awiabere?
Adɛn nti na ɛsɛ sɛ meyɛ sɛ ɔbea a ɔde ade akata n’anim,*Na mikyinkyin wo nnamfonom nguan mu?”
8 “O mmea mu hoɔfɛfo, sɛ wunnim hɔ a,Kodi nguan no anammɔn akyiNa ma wo mpɔnkye mma nnidi wɔ nguanhwɛfo no ntamadan ho.”
9 “Me komam hemmaa, m’ani so de, wote sɛ ɔpɔnkɔbere* a ɔtwe Farao nteaseɛnam.+
10 Agude ama w’afono ayɛ fɛ,*Kɔnmuade ama wo kɔn mu ayɛ fɛ.
11 Yɛde sika kɔkɔɔ bɛyɛ agude* ama wo,Na yɛde dwetɛ asisi so.”
12 “Bere a ɔhene te ne pon kurukuruwa ho yi,Me sradehuam*+ reyi hua.
13 Mihu me dɔfo sɛ kurobow* kotoku ma+A ɛda me nufu ntam anadwo.
14 Mihu me dɔfo sɛ lele* nhwiren+A ɛwɔ En-Gedi+ bobefuw mu.”
15 “Hwɛ, me komam hemmaa, wo ho yɛ fɛ!
Mise, ahoɔfɛ aguare wo! W’ani te sɛ aburuburuw ani.”+
16 “Aa! Me dɔfo, wo ho yɛ fɛ, na wo ho nso twa.+
Ahaban momono frɔmfrɔm na ɛyɛ yɛn mpa.
17 Yɛn dan* so nnua yɛ sida nnua,Na nnua a egu yɛn dan so* yɛ ɔpopaw nnua.
Ase Hɔ Nsɛm
^ Anaa “Dwom a ɛsen biara.”
^ Anaa “bobesa.”
^ Nt., “Twe me di w’akyi.”
^ Anaa “bobesa.”
^ Kyerɛ sɛ, mmabaa no.
^ Anaa “bobeturo.”
^ Anaa “ɔbea a ɔde awerɛhow ntama akata n’anim.”
^ Anaa “Wo a me kra dɔ wo.”
^ Anaa “me pɔnkɔbere.”
^ Ebetumi nso akyerɛ, “W’afono yɛ fɛ wɔ mmɛsa mu.”
^ Anaa “abotiri.”
^ Nt., “nardo.”
^ Hwɛ Nkyerɛkyerɛmu afã hɔ.
^ Dua bi a wɔyam n’ahaban de yeyɛ nsa ne nan ho ma ɛyɛ kɔkɔɔ. Wotumi nso de hyɛ nneɛma foforo ma ɛyɛ kɔɔ.
^ Anaa “fi kɛse.”
^ Anaa “yɛn mpuran.”
