Yeremia 30:1-24
-
Ɔhyɛɛ bɔ sɛ ɔbɛsan de wɔn aba wɔn asaase so na wasa wɔn yare (1-24)
30 Asɛm a efi Yehowa hɔ baa Yeremia nkyɛn ni:
2 “Nea Yehowa, Israel Nyankopɔn no aka ni, ‘Kyerɛw nsɛm a mɛka akyerɛ wo no nyinaa wɔ nhoma mu.
3 Na “hwɛ! Nna bi reba,” Yehowa asɛm ni, “mɛboaboa me nkurɔfo a wɔakyere wɔn kɔ no ano, Israel ne Yuda,”+ Yehowa asɛm ni, “na mɛsan de wɔn aba asaase a mede maa wɔn agyanom no so, na wɔbɛsan abɛtena so bio.”’”+
4 Eyi ne nsɛm a Yehowa ka kyerɛɛ Israel ne Yuda.
5 Nea Yehowa aka ni:
“Yɛate nnipa a wɔn ho repopo nne;Ehu nko ara, asomdwoe biara nni hɔ.
6 Mepa mo kyɛw, mummisa nhwɛ sɛ ɔbarima betumi akyem awo anaa.
Ɛnde, adɛn nti na mihu sɛ ɔbarima hoɔdenfo biara de ne nsa ato n’afuru so*Te sɛ ɔbea a awo aka no yi?+
Adɛn nti na obiara anim ayɛ hoyaa yi?
7 Ao! Ɛda no yɛ hu* sɛ.+
Ɛso bi mmae da;Ɛyɛ amanehunu bere ma Yakob.
Nanso wobegye no afi mu.”
8 “Na ɛda no,” asafo Yehowa asɛm ni, “mebubu kɔndua no mu afi wo kɔn ho, na wo nhama nso, mɛtew mu abien; na ahɔho* remfa no* nyɛ wɔn akoa bio.
9 Wɔbɛsom Yehowa, wɔn Nyankopɔn ne wɔn hene Dawid a meyi no ama wɔn no.”+
10 “Na wo, m’akoa Yakob, nsuro,” Yehowa asɛm ni,“Na mmɔ hu, O Israel.+
Efisɛ megye wo afi akyirikyiri,Na magye wo mma afi asaase a wɔakyere wɔn kɔ so no so.+
Na Yakob bɛsan aba; ɔbɛtena hɔ dwoodwoo, na obiara renteetee no,Na obiara renhunahuna wɔn.”+
11 “Efisɛ meka wo ho, na megye wo,” Yehowa asɛm ni,
“Na aman a mabɔ wo ahwete so no, mɛhyew wɔn nyinaa ase.+Nanso wo de, merenhyew w’ase.+
Mɛteɛ wo so sɛnea ɛfata,Na meremma womfa wo ho nni da.”+
12 Na nea Yehowa aka ni:
“Pira a woapira no, wɔsa a ɛrenyɛ yiye.+
Wo kuru nni aduru.
13 Obiara nni hɔ a ɔbɛka bi ama wo,Wɔrentumi nsa wo kuru no.
Ayaresa biara nni hɔ mma wo.
14 W’adɔfo a wɔnte wo ho gyae no nyinaa werɛ afi wo.+
Wɔnhwehwɛ w’akyi kwan bio.
Efisɛ ɔtamfo abaa na mede abɔ wo,+Na otirimɔdenfo asotwe na mede atwe w’aso,Esiane sɛ wo bɔne so, na w’amumɔyɛ dɔɔso nti.+
15 Adɛn nti na pira a woapira nti, woresu?
Wo yaw no renkɔ da!
Esiane sɛ wo bɔne so, na w’amumɔyɛ dɔɔso nti+Na mayɛ wo saa no.
16 Ɛno nti, wɔn a wɔsɛe wo nyinaa, wɔbɛsɛe wɔn,+Na w’atamfo nyinaa nso, wɔbɛkyere wɔn akɔ.+
Wɔn a wɔfom wo nneɛma no, wɔbɛfom wɔn nneɛma,Na wɔn a wɔsesaw wo nneɛma no, wɔn nso mɛma nkurɔfo asesaw wɔn nyinaa nneɛma.”+
17 “Ɛwom sɛ wɔfrɛɛ wo nea wɔapo no, na wɔkae sɛ:‘Sion a obiara nhwehwɛ n’akyi kwan no ni,’+
Nanso mɛma wo ho atɔ wo na masa w’akuru no,”+ Yehowa asɛm ni.
18 Nea Yehowa aka ni:
“Hwɛ, mereboaboa Yakob ntamadan mufo a wɔakyere wɔn kɔ no ano,+Na mehu ne ntamadan no mmɔbɔ.
Wɔbɛsan akyekye kurow no asi ne bepɔw no so,+Na abantenten no bɛsan asi baabi a na esi no bio.
19 Na wɔbɛte aseda ne ɔserew wɔ wɔn mu.+
Mɛma wɔadɔɔso, na wɔrenyɛ kakraa bi;+Mɛma wɔayɛ bebree,*Na wɔrenyɛ ketewaa bi.+
20 Ne mma bɛsan ayɛ sɛ tete no,Na n’asafo betim wɔ m’anim.+
Me ne wɔn a wɔhyɛ no so no nyinaa bedi.+
21 Ne tumfo befi ɔno ara nkurɔfo mu,Na ne mu na ne hene befi aba.
Mɛma wabɛn na waba me nkyɛn.”
“Anyɛ saa a, hena na obesi ne bo* aba me nkyɛn?” Yehowa asɛm ni.
22 “Na mobɛyɛ me man,+ na me nso mayɛ mo Nyankopɔn.”+
23 Hwɛ! Yehowa ahum de abufuw betu.+Ɛbɛyɛ sɛ mframa dennen a ɛpra nneɛma; ebetwa ne ho wɔ abɔnefo apampam.
24 Yehowa abufuhyew rensan,Gye sɛ wayɛ nea wasusuw wɔ ne komam no awie.+
Awiei nna no mu na mobɛte eyi ase.+
Ase Hɔ Nsɛm
^ Anaa “de ne nsa asi n’asen.”
^ Nt., “Ɛda no yɛ da kɛse.”
^ Anaa “ananafo.”
^ Anaa “wɔn.”
^ Ebetumi nso akyerɛ, “Mɛhyɛ wɔn anuonyam.”
^ Nt., “hena na ɔde ne koma besi awowa.”
