Yeremia 4:1-31
4 “O Israel, sɛ wobɛsan w’akyi a,” Yehowa asɛm ni,“Sɛ wobɛsan aba me nkyɛnNa woayiyi w’abosom fĩ no afi m’anim a,Ɛnde worenyɛ ɔkobɔfo bio.+
2 Na sɛ woka ntamWɔ nokware, atɛntrenee, ne trenee mu sɛ, ‘Sɛ́ Yehowa te ase yi!’ a,Ɛnde amanaman no nam no so benya nhyira,Na wɔbɛhoahoa wɔn ho wɔ ne mu.”+
3 Na nea Yehowa aka akyerɛ Yudafo ne Yerusalemfo ni:
“Mumfuntum asaase pa mfa,Na ɛnsɛ sɛ mokɔ so dua ade wɔ nsɔe mu bio.+
4 Muntwa twetia mma Yehowa,Na muntwa mo koma twetia,+Mo Yuda mmarima ne Yerusalemfo,Anyɛ saa a, nneɛma bɔne a moyɛ nti,M’abufuw bɛdɛw sɛ ogya,Na ɛbɛhyew a obiara rentumi nnum no.”+
5 Monka wɔ Yuda, na mommɔ no dawuru wɔ Yerusalem.
Monteɛm na mommɔ abɛn wɔ asaase no so baabiara.+
Monteɛm denneennen, na monka sɛ: “Mommoaboa mo ano,Na momma yenguan nkɔ nkurow a wɔabɔ ho ban no mu.+
6 Momma ahyɛnsode* so na momfa ani nkyerɛ Sion.
Mompɛ baabi nhintaw, na munnnyina hɔ.”
Efisɛ mede amanehunu fi atifi fam reba,+ ɔsɛe kɛse bi.
7 Wapue te sɛ gyata a ofi ne dɔtɔ mu reba;+Nea ɔsɛe amanaman no atu reba.+
Watu afi ne tenabea sɛ ɔrebɛma w’asaase ayɛ tantaantan.
Ɔbɛsɛe wo nkurow pasaa, na obiara rentena mu.+
8 Eyi nti mumfura awerɛhow ntama,*+Munni awerɛhow* na munsu nteɛteɛm,Efisɛ Yehowa abufuhyew no nnan mfii yɛn so.
9 “Saa da no,” Yehowa asɛm ni, “ɔhene koma betu,+Na atitiriw nso koma betu;Asɔfo bɛbɔ hu, na adiyifo ho bedwiriw wɔn.”+
10 Ɛnna mekae sɛ: “Ao, Awurade Tumfo Yehowa! Ampa, woadaadaa ɔman yi+ ne Yerusalem paa. Wokae sɛ: ‘Mubenya asomdwoe,’+ nanso sekan na ɛda yɛn menem.”*
11 Saa bere no, wɔbɛka akyerɛ ɔman yi ne Yerusalem sɛ:
“Mframa a emu yɛ hyew befi sare so nkoko a ɛso ayɛ kwabokwabo so,Na ɛbɛbɔ afa me man babea* so;Ɛremma mmehuw hwiit so, na ɛremmeyiyi mu fĩ.
12 Mɛma mframa a ano yɛ den paa afi saa mmeae hɔ aba.
Afei mɛka atemmusɛm agu wɔn so.
13 Hwɛ! Ɔbɛba te sɛ omununkum,Ne nteaseɛnam te sɛ mframa a ano yɛ den.+
N’apɔnkɔ ho yɛ hare sen akɔre.+
Asɛm ato yɛn, efisɛ wɔasɛe yɛn awie!
14 O Yerusalem, hohoro wo koma ho fi bɔne ho, sɛnea ɛbɛyɛ a wobegye wo.+
Wobɛkɔ so adwen adwemmɔne akosi da bɛn?
15 Ɛnne bi rekasa fi Dan,+Ɛrebɔ mmusu ho dawuru fi Efraim mmepɔw so.
16 Monka ho asɛm, yiw, monka ho asɛm nkyerɛ amanaman;Mommɔ no dawuru nkyerɛ Yerusalem.”
“Atɛwfo* fi akyirikyiri asaase bi so reba,Na wɔbɛma wɔn nne so atia Yuda nkurow.
17 Wofi afã ne afã nyinaa ba no so te sɛ awɛmfo a wɔwɛn afuw,+Efisɛ watew me so atua,”+ Yehowa asɛm ni.
18 “Wɔde wo ara w’abrabɔ ne wo nneyɛe bɛba wo so.+
Mmusu a ɛbɛba wo so no yɛ nwene sɛ!Efisɛ awura wo koma mu tɔnn!”
19 Me nsono mu oo! Me nsono mu oo!*
Mete yaw kɛse wɔ me komam.*
Me koma rebɔ paripari wɔ me mu.
Mintumi nyɛ komm,Efisɛ mate* abɛn nnyigyei,Ɛyɛ ɔko torobɛnto.*+
20 Amanehunu rekɔ, na amanehunu reba; ɛno ara na yɛte,Efisɛ wɔasɛe asaase no nyinaa.
Mpofirim ara na wɔsɛee me ntamadan,Prɛko pɛ na wɔsɛee ntama a wɔde ayɛ me ntamadan no.+
21 Mɛkɔ so ahu ahyɛnsode* yi akosi da bɛn?Na mɛkɔ so ate abɛn nnyigyei yi akosi da bɛn?+
22 “Efisɛ me man yɛ nkwaseafo;+Wɔmfa me nyɛ hwee.
Wɔyɛ mma agyimifo a wonni ntease.
Ɛba bɔne a, wɔn ani atew,*Na papa de, wonnim ho hwee.”
23 Mehwɛɛ asaase no, na hwɛ! na hwee nni so, na na asɛe pasaa.+
Mehwɛɛ ɔsoro, na na ne hann nni hɔ bio.+
24 Mehwɛɛ mmepɔw, na hwɛ! na ɛrewosow,Na na nkoko rehinhim.+
25 Mehwɛe, na hwɛ! na onipa biara nni hɔ,Na na wim nnomaa nyinaa atutu kɔ.+
26 Mehwɛe, na hwɛ! asaase a nturo ayɛ so ma no adan sare,Na wɔasɛe ɛso nkurow nyinaa.+
Yehowa na ɔyɛe,N’abufuhyew nti na ɔyɛe.
27 Na nea Yehowa aka ni: “Asaase no nyinaa bɛdan amamfo,+Nanso merensɛe no pasaa.
28 Ɛno nti asaase no bedi awerɛhow,+Na ɔsoro beduru sum,+
Efisɛ me na makasa, na me na masi gyinae.Merensesa m’adwene,* na merentwe nsan* nso.+
29 Wɔn a wɔtete apɔnkɔ so ne wɔn a wɔtotow agyan no dede nti,Kurow no nyinaa aguan.+
Wɔakɔhyehyɛ adɔtɔ mu,Na wɔaforo abotan.+
Kurow biara ada mpan,Na onipa biara nte mu bio.”
30 Afei a wɔayɛ wo pasaa yi, dɛn na wobɛyɛ?
Kan no, wufuraa ntama kɔkɔɔ,Wode sika kɔkɔɔ agude hyehyɛɛ wo ho,Wokekaa w’ani ase* tumm sɛnea ɛbɛyɛ a w’ani aba bepuepue yiye.
Nanso w’ahosiesie no nyinaa ankosi hwee,+Efisɛ wɔn a wɔpɛ wo no mpo apo wo.Seesei wɔrepɛ wo akum wo.*+
31 Mete nne bi te sɛ ɔbea yarefo nne,Me ho yeraw me te sɛ ɔbea a ɔrewo n’abakan,Ɛyɛ Sion babea nne; ɔhome a ensi so.
Watrɛw ne nsam, na ɔka sɛ:+
“Asɛm ato me, efisɛ awudifo nti mabrɛ!”*
Ase Hɔ Nsɛm
^ Anaa “frankaa.”
^ Anaa “atweaatam.” Hwɛ Nkyerɛkyerɛmu afã hɔ.
^ Anaa “Mommobɔ mo koko.”
^ Anaa “nanso sekan ato yɛn kra.”
^ Ɛyɛ anwensɛm a wɔde ka ɔman no ho asɛm te sɛ onipa. Ebia wɔde rekyerɛ tema ne ayamhyehye.
^ Kyerɛ sɛ, nnipa a wɔkɔtetɛw kurow bi hwɛ bere a eye sɛ wɔtow hyɛ so.
^ Anaa “Me yam hyehye me! Me yam hyehye me!”
^ Nt., “me koma afasu mu.”
^ Anaa “me kra ate.”
^ Ebetumi nso akyerɛ, “ɔko nteɛm.”
^ Anaa “frankaa.”
^ Anaa “wɔyɛ anyansafo.”
^ Anaa “Merennu me ho.”
^ Anaa “merensan mfi ho.”
^ Anaa “Wototoo w’ani akyi.”
^ Anaa “wɔrehwehwɛ wo kra.”
^ Anaa “me kra abrɛ.”