Yesaia 66:1-24
66 Nea Yehowa aka ni:
“Ɔsoro yɛ m’ahengua, na asaase yɛ me nan ntiaso.+
Enti ofi bɛn na mubetumi asi ama me,+
Na homebea bɛn na mode bɛma me?”+
2 “Me ara me nsa na ayɛ nneɛma yi nyinaa,Na saa ara na ɛyɛe a ne nyinaa bae,” Yehowa asɛm ni.+
“Enti, nea mɛhwɛ no neObi a ɔbrɛ ne ho ase a ne honhom abubu; nea m’asɛm nti ne ho popo.*+
3 Nea okum nantwi no te sɛ nea okum onipa.+
Nea ɔde oguan bɔ afɔre no te sɛ nea obu ɔkraman kɔn mu.+
Nea ɔde afɔrebɔde ba no te sɛ nea ɔde prako mogya ba.+
Nea ɔhyew ɛhyɛ*+ de yɛ nkae no te sɛ nea ɔkankye de hyira obi.*+
Wɔapaw wɔn ankasa akwan,Na wɔn ani gye akyiwade ho.*
4 Enti mɛfa akwan bi so atwe wɔn aso,+Na nneɛma a wosuro no, ɛno ara na mede bɛba wɔn so.
Efisɛ bere a mefrɛe no, obiara annye so;Bere a mekasae no, obiara antie.+
Wɔkɔɔ so yɛɛ bɔne wɔ m’ani so,Na nea m’ani nnye ho na wɔpawee sɛ wɔbɛyɛ.”+
5 Muntie Yehowa asɛm, mo a n’asɛm nti mo ho popo:*
“Mo nuanom a me din nti wɔtan mo na wɔpo mo no kae sɛ, ‘Anuonyam nka Yehowa!’+
Nanso Ɔbɛba na wama mo ani agye,Na wɔn mmom na wɔn ani bewu.”+
6 Gyegyeegye bi wɔ kurow no mu, na dede bi wɔ asɔrefi hɔ!
Ɛyɛ Yehowa na ɔretua n’atamfo ka sɛnea ɛsɛ wɔn.
7 Awo nnya nkaa no no, na wawo dedaw.+
Onnya ntee awo mu yaw* no, na wawo ɔbabarima.
8 Hena na wate asɛm yi bi pɛn?
Hena na wahu biribi a ɛte sɛ eyi pɛn?
Wɔwo asaase da koro anaa?
Anaa wɔwo ɔman prɛko pɛ?
Nanso awo kaa Sion pɛ na ɔwoo ne mma mmarima.
9 “Mɛma abofra abedu awode ano a meremma wɔnwo no anaa?” Yehowa na waka.
“Anaa mɛma awo aka obi na mato n’awode mu?” Wo Nyankopɔn na waka.
10 Mo a modɔ Yerusalem nyinaa,+ mo ne no nni ahurusi+ na mo ani nnye.
Mo a moredi ne ho awerɛhow nyinaa, mo ne no nni ahurusi kɛse,
11 Efisɛ mubenum n’awerɛkyekye nufu amee,Na mobɛtwe nufu no mii, na moanya anigye wɔ n’anuonyam mmoroso no mu.
12 Na nea Yehowa aka ni:
“Mɛma wanya asomdwoe te sɛ asubɔnten+Na wanya amanaman anuonyam te sɛ nsu a ayiri.+
Mubenum nufu, na wobeturu mo wɔ wɔn nkyɛnmu.Na wobegyigye mo agoru wɔ wɔn nan so.
13 Sɛnea ɔbea kyekye ne babarima werɛ no,Saa ara na mɛkɔ so akyekye mo werɛ;+Na Yerusalem nti, mo werɛ bɛkyekye.+
14 Mubehu eyi, na mo koma ani begye,Mo nnompe bɛyɛ kama te sɛ sare momono.
Na Yehowa nkoa behu ne nsa,*Na n’atamfo de, n’ani bɛbere wɔn so paa.”+
15 “Na Yehowa bɛba te sɛ ogya,+Na ne nteaseɛnam bɛba te sɛ ahum,+Na ɔde anibere betua wɔn ka n’abufuw mu,Na ɔde ogya a ɛredɛw aka wɔn anim.+
16 Na Yehowa de ogya bebu atɛn,Yiw, ɔde ne sekan bekunkum ɔhonam nyinaa;*Na wɔn a Yehowa bekunkum wɔn no bɛdɔɔso.
17 “Wɔn a wɔtew wɔn ho na wodwira wɔn ho kɔ nturo* mu,+ na wokodi nea ɛwɔ mfinimfini no akyi, na wɔwe prakonam+ ne nneɛma a ɛyɛ akyiwade ne nkura+ no, wɔn nyinaa awiei bɛba abom,” Yehowa na waka.
18 “Minim wɔn nnwuma ne wɔn adwene. Enti mereba abɛboaboa amanaman ne kasa horow nyinaa mu nnipa ano, na wɔbɛba abehu m’anuonyam.”
19 “Na mede sɛnkyerɛnne bi besi wɔn mu, na mɛsoma wɔn a wonyaa wɔn ti didii mu no bi akɔ amanaman no mu; wɔbɛkɔ Tarsis,+ Pul ne Lud,+ wɔn a wokuntun agyan no nkyɛn. Wɔbɛkɔ Tubal ne Yawan;+ wɔbɛkɔ nsupɔw a ɛwɔ akyirikyiri, wɔn a wɔntee me ho asɛm na wonhuu m’anuonyam no nkyɛn. Na wɔbɛka m’anuonyam wɔ amanaman mu.+
20 Wɔde mo nuanom nyinaa befi amanaman nyinaa mu abrɛ Yehowa+ sɛ akyɛde. Wɔbɛtenatena apɔnkɔ so, ɔko nteaseɛnam mu, nteaseɛnam a wɔakuru so mu, ne mfurumpɔnkɔ ne yoma a wɔn ho yɛ hare so, na wɔaba Yerusalem, me bepɔw kronkron no so sɛnea Israelfo de wɔn akyɛde gu ade* a emu tew mu ba Yehowa fi no,” Yehowa na waka.
21 “Na mɛpaw wɔn mu bi nso ayɛ wɔn asɔfo ne Lewifo,” Yehowa na waka.
22 “Na sɛnea ɔsoro foforo ne asaase foforo+ a mereyɛ no bɛkɔ so agyina m’anim no, saa ara na mo asefo* ne mo din bɛkɔ so agyina,” Yehowa na waka.+
23 “Na ɔsram foforo biara ne homeda biara,Ɔhonam* nyinaa bɛba abebu nkotodwe wɔ m’anim,”*+ Yehowa na waka.
24 “Na wobefi adi akɔhwɛ nnipa a wɔtew me so atua no afunu;Mmoawa a adɔre afunu no renwu,Na ogya a ɛhyew wɔn no nso, ɛrennum da,+Na wɔbɛyɛ abofonode ama nnipa* nyinaa.”
Ase Hɔ Nsɛm
^ Anaa “m’asɛm ho hia no.”
^ Anaa “wɔn kra ani gye akyiwade ho.”
^ Ebetumi nso akyerɛ, “nea oyi ohoni ayɛ.”
^ Hwɛ Nkyerɛkyerɛmu afã hɔ.
^ Anaa “n’asɛm ho hia mo.”
^ Anaa “awoko yaw.”
^ Anaa “tumi.”
^ Anaa “nnipa nyinaa.”
^ Kyerɛ sɛ, nturo soronko bi a wɔsom abosom wom.
^ Anaa “ɔsɛn.”
^ Nt., “aba.”
^ Anaa “Nnipa.”
^ Anaa “bɛba abɛsom me.”
^ Nt., “ɔhonam.”
