NEA ENTI A ƐHO HIA: Nhoma biara a ɛwɔ Nnwinnade Titiriw a Yɛde Kyerɛkyerɛ mu no twe adwene kɔ jw.org so. Wɛbsaet kaad no ne kratawa a yɛato din Ɛhe na Yebenya Nsɛmmisa a Ɛho Hia Paa no Ho Mmuae? no, adɛn nti na yɛyɛe? Ɛne sɛ yɛde bɛtwe afoforo adwene akɔ yɛn wɛbsaet no so. Nhoma a ɛwɔ Nnwinnade Titiriw a Yɛde Kyerɛkyerɛ mu no, wubetumi afa jw.org so de bi ama obi. Nea wubetumi ayɛ ne sɛ, wode bɛmena no wɔ e-mail so anaa wode link no bɛmena no. Wei tumi boa, titiriw bere a yɛredi obi a yɛnte ne kasa adanse no. Bio nso, ebetumi aba sɛ nnipa bi bebisa yɛn nsɛm bi, nanso ebia nhoma a yebenya mmuae no wom no nni Nnwinnade Titiriw a Yɛde Kyerɛkyerɛ no mu. Sɛ yetumi de yɛn wɛbsaet no di dwuma yiye a, ebetumi ama yɛatu mpɔn wɔ yɛn asɛnka adwuma no mu.

SƐNEA WOBƐYƐ NO:

• Fa “BIBLE NKYERƐKYERƐ” afã hɔ yɛ adwuma. Fa no sɛ woredi ɔwofo bi adanse, na ɔpɛ sɛ ohu sɛnea yɛtete mmofra ho nsɛm pii. Kɔ BIBLE NKYERƐKYERƐ > AWARE NE ABUSUA.

• Fa “NHOMA” afã hɔ yɛ adwuma. Fa no sɛ woredi adanse wɔ sukuu mu, na wopɛ sɛ woma sukuufo no mu baako nhomawa a yɛato din Nsɛm 10 a Mmabun Bisa ne Ɛho Mmuae no bi. Kɔ NHOMA > NHOMA NE NHOMAWA.

• Fa “YƐN HO NSƐM” afã hɔ yɛ adwuma. Fa no sɛ woredi obi a wo ne no wɔ adwumam adanse, na ɔpɛ sɛ ɔkenkan nneɛma a yegye di no bi ho nsɛm kakra. Kɔ YƐN HO NSƐM > NSƐM A NKURƆFO TAA BISA.

HWƐ VIDEO A YƐATO DIN SƐNEA YƐDE JW.ORG BEDI DWUMA, NA HWƐ SƐ WUBEHU ƆFÃ A ƐSƐ SƐ WOKƆ WƆ WƐBSAET NO SO KƆHWEHWƐ NSƐM A ƐBƐBOA:

• obi a onnye nni sɛ Onyankopɔn wɔ hɔ

• obi a asiane bi ato no nnansa yi ara

• onua anaa onuawa bi a wagyae asɛnkakɔ

• obi a wudii no adanse, na woasan akɔsra no, na ɔpɛ sɛ ohu sɛnea yenya sika de tua yɛn adwuma no ho ka

• obi a ofi ɔman foforo so a ɔpɛ sɛ ɔkɔ asafo nhyiam bere a wasan akɔ ne man mu