Nhyiam a yɛyɛ no afe biara no, adɛn nti na yɛn ani gye ho saa? Tete no, na nhyiam ahorow a Israelfo yɛ no afe biara no ma wonya hokwan ne wɔn nuanom pii bom som Yehowa. Ɛnnɛ nso, saa ara na ɛte. Sɛ yɛkɔ nhyiam a, ɛma yenya kwan ne yɛn nuanom bom som na ɛma yenya nsɛm a ɛbɛma yɛabɛn Yehowa. Afei nso, ɛma yenya bere ne yɛn nuanom Kristofo bɔ fekuw. Sɛ yɛkɔ nhyiam a yɛyɛ no nnansa no nyinaa bi a, ɛkyerɛ sɛ yɛn ani sɔ nhyehyɛe pa a Yehowa yɛ ma yɛn no.

Sɛ yɛkɔ nhyiam a ɛtete saa ase a, ɛnsɛ sɛ yedwen nea yɛn nko ara benya ho, mmom ɛsɛ sɛ yɛhwɛ sɛnea yɛbɛda ɔdɔ adi na yɛakyerɛ sɛ yedwen afoforo ho. (Ga 6:10; Heb 10:24, 25) Nneɛma a yebetumi ayɛ no bi ne sɛ, yɛbɛboa wɔn a wɔn ani afi ama wɔapɛ baabi atena, anaa yebegyaw nkongua a yebehia nko ara ato hɔ. (Flp 2:3, 4) Sɛ yɛkɔ nhyiam a, ɛma yenya hokwan fa nnamfo foforo. Yɛpɛ a, yebetumi de asi yɛn ani so sɛ, ansa na dwumadi no befi ase, bere a yɛregye yɛn ahome anaa bere a yɛapɔn no, yɛne obi a yennim no bɛbɔ nkɔmmɔ na yɛahu no yiye. (2Ko 6:13) Wɔn a yɛfa wɔn nnamfo wɔ nhyiam a ɛtete saa ase no betumi abɛyɛ yɛn nnamfo daa! Weinom nyinaa da nkyɛn a, sɛ wɔn a wɔnsom Yehowa no hu sɛ yɛdodɔ yɛn ho a, ebetumi aka wɔn ma wɔabɛsom Yehowa.—Yoh 13:35.

HWƐ VIDEO A YƐATO DIN “ƆDƆ TO NTWA DA”! AMANAMAN NTAM NHYIAM NO. WUWIE A, BUA NSƐMMISA A EDIDI SO YI:

• Ahɔho a wɔkɔɔ 2019 amanaman ntam nhyiam no bi no, sɛn na anuanom daa ɔdɔ adi kyerɛɛ wɔn?

• Ɔdɔ ne baakoyɛ a ɛwɔ Yehowa nkurɔfo mu no, dɛn nti na ɛyɛ nwonwa?

• Nhyiam no ase no, sɛn na Akwankyerɛ Kuw no kaa Kristofo dɔ ho asɛm?

• Sɛn na ɔdɔ kann boaa anuanom a wɔwɔ Germany ne South Korea?

• Dɛn na ɛsɛ sɛ yesi yɛn bo sɛ yɛbɛyɛ?