Sɛ Bible asuafo ne Yehowa ntam bɛyɛ papa a, ɛsɛ sɛ wɔfa nnamfo pa. (Dw 15:1, 4) Sɛ wɔfa nnamfo pa a, ebenya wɔn so nkɛntɛnso pa ma wɔayɛ nea ɛteɛ.—Mme 13:20; lff adesua 48.

Sɛ woreboa wo Bible suani ama wakwati fekubɔne a, nya tema. Mfiase no, ebia ɛbɛyɛ den ama no sɛ ɔne ne nnamfo dedaw no betwa mu. Enti kyerɛ ne ho anigye na fa no adamfo. Mma ɛnkɔyɛ sɛ, wo ne no sua ade wie a, ɛno ara ne no. Ɛwom ara a frɛ no bisa no ase, kɔsra no, anaa kyerɛw text message mena no. Sɛ wuhu sɛ wo suani no renya nkɔso a, nea wubetumi ayɛ ne sɛ, sɛ wo ne anuanom afoforo rekogye mo ani anaa moreyɛ biribi foforo a, to nsa frɛ no. Ɛba saa a, nnamfo pa a obenya no bɛma n’ani agye, na ɔrente nka sɛ wahwere biribi. (Mr 10:29, 30) Wo nso, sɛ wubehu sɛ Yehowa abusua no mu trɛw ara na ɛretrɛw a, w’ani begye paa.

HWƐ VIDEO A YƐATO DIN BOA WO BIBLE ASUAFO MA WƆNTWE WƆN HO MFI FEKUBƆNE HO NO. WUWIE A, BUA NSƐMMISA A EDIDI SO YI:

• Yɛka fekubɔne a ɛkyerɛ sɛn?—1Kor 15:33

• Sɛn na Jade twaa Kristofo a wɔregye wɔn ani ho mfoni wɔ n’adwenem?

• Sɛn na Neeta boaa Jade ma onyaa nnamfo pa de sii dedaw no anan?