Adɛn nti na ɛsɛ sɛ woyɛ ahoboa nnɛ? Asɛm kɛse reba a, frankaa nsi so. Obi nnim da a yare bi bɛbɔ wo mpofirim anaa biribi nti yebegye wo ato ayaresabea. Enti ɛnnɛ a biribi saa ntoo wo no na ɛsɛ sɛ woyɛ ahoboa, na sɛ woyare mpofirim anaa biribi a ɛte saa to wo a, woanya ayaresa a edi mu. Sɛ woyɛ saa a, ɛkyerɛ sɛ wowɔ obu ma nkwa, na Yehowa mmara a ɛfa mogya ho no nso, wugye tom.—Aso 15:28, 29.

Wobɛyɛ dɛn ayɛ ahoboa?

• Bɔ mpae na to wo bo ase hyehyɛ wo mogya kratasin anaa DPA. a Adawurubɔfo a wɔabɔ asu benya DPA kratasin no bi afi onua a ɔhwɛ nhoma so no nkyɛn. Sɛ wɔwɔ mma nso a, wɔbetumi agye mmofra mogya kratasin anaa Identity Card (ic) ama wɔn mma nkumaa

• Sɛ wonyem a, ka kyerɛ w’asafo mu mpanyimfo sɛ wɔmma wo krataa a yɛato din Nsɛm a Wɔde Ma Apemfo (S-401) no bi. Saa krataa no bɛma woahu nneɛma bi a ebetumi asisi wɔ wo nyinsɛn ne w’awo mu, na ama woatumi asisi gyinae pa

• Fa no sɛ worekohu dɔkta, na ebetumi aba sɛ mogyasɛm bɛsɔre anaa wɔbegye wo ato ayaresabea. Ɛba saa a, di kan bɔ w’asafo mu mpanyimfo amanneɛ ansa na bere a wobɛkɔ no aso. Afei ka kyerɛ adɔktafo ne anɛɛsefo no sɛ, sɛ Yehowa Adansefo mpanyimfo no bi ba hɔ sɛ wɔrebɛsra wo a, wopene so; wɔmma wɔn mmra

Dɛn na mpanyimfo betumi ayɛ aboa wo? Wɔbetumi aboa wo ama woahyehyɛ wo DPA kratasin no. Nanso mpanyimfo no rensisi w’ayaresa ho gyinae mma wo. Sɛ asɛm bi wɔ hɔ a ɛsɛ sɛ obiara si ne gyinae wɔ ho nso a, wɔrenka sɛ, ɛyɛ me a anka mɛyɛ wei anaa wei. (Ro 14:12; Ga 6:5) Sɛ wobɔ w’asafo mu mpanyimfo amanneɛ sɛ wuhia ayaresa bi, na ebia mogyasɛm bɛba mu a, ntɛmpa ara wɔne Ayaresabea Ntam Nkitahodi Boayikuw (anaa HLC) bedi nkitaho ama wo.

Dɛn na HLC betumi ayɛ aboa wo? Anuanom a wɔka HLC ho no, wɔama wɔn ntetee a ɛma wotumi boa adɔktafo, alɔyafo ne atemmufo ma wohu nea enti a yɛn gyidi nti, yennye mogya no. Wɔbetumi ne adɔktafo a wɔrehwɛ wo no aka wɔn ti apam ho ahwɛ ɔkwan a wɔbɛfa so asa wo yare a wɔremma wo mogya. Sɛ ɛho behia a, wɔbetumi aboa wo ama woanya dɔkta a ɔbɛhwɛ wo a ɔremma wo mogya.

HWƐ VIDEO A YƐATO DIN MOGYA A YƐDE YƐ ADWUMA WƆ AYARESA MU—SƐNEA YEBETUMI ASI HO GYINAE PA. WUWIE A, BUA ASƐMMISA A EDI SO YI:

• Wohwɛɛ video no, nneɛma bɛn na wubetumi ayɛ nnɛ, na sɛ wuhia ayaresa mpofirim na mogyasɛm ba mu a, woatumi asisi gyinae pa?

  Your answer